Avannaata
Kommuniani Demokraatit Inatsisartunut qinersinermi siuariarnertik
nuannaarutigaat.
- Demokraatit Inatsisartunut
qinersinermi angusarisimasaat nuannaarutigeqaarput, kommunimulli
qinersinissamut qinigassanngortittut politikkikkut takorluukkavut erseqqissumik
saqqummiunniarlugit ilungersortariaqarlutalu sapinngisarput tamaat
iliuuseqartariaqarluta ilisimavarput, Lena Ravn Davidsen oqarpoq.
Avannaata
Kommuniani Demokraatit Inatsisartunut qinersinermi siuariarnertik
nuannaarutigaat.
- Demokraatit Inatsisartunut
qinersinermi angusarisimasaat nuannaarutigeqaarput, kommunimulli
qinersinissamut qinigassanngortittut politikkikkut takorluukkavut erseqqissumik
saqqummiunniarlugit ilungersortariaqarlutalu sapinngisarput tamaat
iliuuseqartariaqarluta ilisimavarput, Lena Ravn Davidsen oqarpoq.
Taanna
attaviitsup borgmesterillu Palle Jerimiassenip partiimut ilanngulluni
kommunimut qinigassanngorteqqinniarluni aalajangernissaata tungaanut
qinigaaffimmi matumani Demokraatit Avannaata Kommuniani kommunalbestyrelsianut
ilaasortaatitaanni kisiartaavoq.
- Borgmesterinngortitsinissaq
sulissutigaarput, kisianni soorunami qinerneqarnerpaaq
borgmesterinngortussaavoq. Naak toqqaannartumik oqaloqatiginngikkaluarlugu
qinerneqarnerpaaq borgmesterinngortartoq partiit akornanni ileqqorineqarpoq,
Lena Ravn Davidsen oqarpoq.
Demokraatit
Avannaata Kommuniani nunaqarfiit innuttaasunullu tamarmik
ineriartortinneqarnissaat qulakkeerniarlugu qineqqusaartut taanna nassuiaavoq.
- Qineqqusaarnitsinni kommunimi
innuttaasut tamaasa sullinniarpagut. Inuit ilaat kommunip avinnissaa
qinersissutigissallugu isumaqarput, taamaammat najugaqarfiit innuttaasullu
tamarmik ineriartornissaat qulakkeerniarlugu qineqqusaarluta piffissarujussuaq
atorlugu nassuiaattarpugut. Najugaqarfiit ataasiakkaat pineqanngillat,
kommunili ataatsimut pineqarpoq, Lena Ravn Davidsen oqarpoq.
Sanaartorneq
sanaartortup tamakkiisumik akisussaasuuneratigut qulakkeerneqassasoq
Kommunalbestyrelsip kommunimi sanaartornermut suliniutimini sanaartortup
tamakkiisumik akisussaasuunissaa qinigaaffimmi matumani atussallugu
aalajangersimavoq.
- Avannaata Kommuniani sanaartornerit
sanaartortumit tamakkiisumik akisussaasuuneratigut ingerlanneqartalissasut
kommunalbestyrelsip qinigaaffiup naanerani, decembarimi, aalajangerpaa. Tamanna
inoqarfinni tamani sanaartornerup qulakkeernissaanut iluaqutaassangatinneqarpoq,
tassami pingaarnertut sanaartornermut imaluunniit sanaartornernut tamanut
neqerooruteqaraanni neqerooruteqartut ikippallaartarput. Taamaammat suliat
sanaartortumik tamakkiisumik akisussaaffigineqarlutik ingerlanneqartalerpata
unammillernerusoqassasoq isumaqarpugut, Lena Ravn Davidsen oqarpoq.
Sanaartornermik
suliassat suliarinnittussarsiuunneqartalernissaat kissaatigineqartoq
imaqarniliami allassimavoq. Avannaata Kommuniani perusuersartarfinni puussiat
ikuallassinnaasut atorlugit suliniut iluatsinngitsoormat nunaqarfiit arlallit
eqqakkanut aqqusiorifigineqarnissaat Lena Ravn Davidsenip qineqqusaarutigaa.
- Ilulissat pitsaasumik eqqakkanut
aqquteqareerpoq, tassanilu Namminersorlutik Oqartussat inoqarfinni tamani
kuuffeqarfiliornissamut qulakkeerinninniarnermi peqataanissaat
pingaaruteqarpoq, oqarpoq.
Inuk
timikkut tarnikkullu peqqissoq
Lena Ravn Davidsenip, Ilulissani assammik arsartartut sungiusaasuattut aamma
ilisimaneqartup, qineqqusaarnermini innuttaasut peqqissuunissaat pingaartippaa.
- Timersornermut timersortarfinnullu
atugassarititaasut pitsanngorsarnerisigut inuit timikkut tarnikkullu
peqqissusiat nukittorsassavarput. Inoqarfippassuit timersortarfeqarnissaminnik
unammillernartoqarput, nunaqarfippassuarnilu sanaartornissaq ajornakusoortarluni.
Taamaammat siunertamut tamatumunnga aningaasaliissuteqarnissaq
sulissutigissavara, Lena Ravn Davidsen oqarpoq.
Partiip
qinigassanngortitai aamma inuussutissarsiornermik siuarsaaniarlutik
qineqqusaartut taanna nassuiaavoq.
- Namminersortunik
inuussutissarsiortunik amerlanerusunik kommunimi peqalernissarput Avannaata
Kommuniani inuussutissarsiornermut siunnersuisoqatigiinnik pilersitsinikkut
namminersortullu inuussutissarsiornerannik tatisinngitsumik sinaakkutinik
pilersitsinikkut sulissutigissavarput. Tamanna qineqqusaarutigaarput, Lena Ravn
Davidsen oqarpoq.
