Inuussutissarsiortut politikerinut mianersoqqusipput: Aningaasaqarnikkut ingerlatasi uungaannaq isigalutillu ulorianarput
Aningaasanut inatsisip nutaap akileraartarnikkullu aaqqissuusseqqinnerup aningaasaqarnermut innuttaasunullu kingunerlutsitsisinnaanerat Sulisitsisut ernummatigaat.
Aningaasanut inatsimmi pitsaasunik siunnersuuteqarpoq, aningaasaqarniarnermili periusissiaq nalorninartoqarpallaartoq, GE-mi pisortaq Christian Keldsen isumaqarpoq.
Assiliisoq: Leiff Josefsen
Aningaasanut inatsit IA-p Siumullu aningaasanut inatsit sapaatip akunnerata aallartinnerani isumaqatigiissutigereeraallu pilersaarutit malillugit ullumi tallimanngornermi Inatsisartuni taasissutigineqarpoq.
Sulisitsisulli maanna aningaasaqarnermut politikki Kalaallit Nunaata siunissaanut ernumanartoqartippaat:
- Akileraartarnermut aaqqissuusseqqinnerup aningaasalersorneqannginnera ajornartorsiutaangaatsiarpoq, tamannalu ulorianarpoq. Politikerimmi akiligassat kingusinnerusukkut akilerneqartussanngorlugit qimaannarpaat. Qineqqusaartoqalernera takuneqarsinnaavoq, Sulisitsisut pisortaat Christian Keldsen oqarpoq.
Inuit aningaasanik amerlanerusunik, niuernermi iluaqutissaminnut atorsinnaasaannik, pigisaqarnissaat ajunngeqaaq, ilaa?
Aap, aningaasat amerlanerusut tigummiinnagassanngortinnissaat imminermini ajunngilaq. Akileraarutilli tungaatigut aaqqissuusseqqittoqartariaqarlunilu aningaasalerneqarluartariaqarpoq. Taamaanngippat akit inunnut ikiorniakkannut ajoqutaaginnartumik qaffassinnaapput.
Pisortat akisussaaffeqarnerulissasut
Siunissami aalisarnermut aningaasat pisortanit aningaasaliissutigineqartut amerlinissaat Christian Keldsenip aamma ernummatigaa:
- Ineriartortitsineq namminersortut aningaasaataannik ullumikkut aningaasalersorneqartarpoq, tamannali aalisarnermut inatsimmit killilerneqarsimavoq. Tamatuma kingunerisaanik maanna pisortat aningaasaataat amerlanerusut aalisarnermut atorneqartussaarpasipput. Tamanna ilaatigut aningaasaqarnerup assigiinngiiaarnerulernissaanik anguniagamut akerliulluinnarpoq, aammali aningaasat amerlanerusut maanna inuussutissarsiummut ataatsimut attuumassuteqartinneqarmata nunatta karsianut navianaateqarpoq, oqarpoq.
Sulisitsisulli aningaasanut inatsimmi aamma ajunngitsunik takusaqarsinnaapput. Assersuutigalugu ilinniartitaaneq politikerinit salliutinneqassaaq, pisortallu ingerlatsiviisa aaqqissuunneqarnerisa isornartorsiorneqarsinnaanerat ammaassiffigissavaat. Aningaasaqarnermulli politikki ajorluinnarpoq.
Sermitsiamit Aningaasaqarnermut Akileraartarnermullu Naalakkersuisoq Erik Jensen (S) Sulisitsisunit aamma Inatsisartuni illuatungiliuttut isornartorsiuinerannut akissuteqartikkumagaluarparput. Akissuteqarnissaminulli ulapippallaarpoq, naalakkersuisoqarfik nalunaarpoq.
