Inuussutissat ineqarnermullu akit qaffakkiartornerat naatsorsuinermi paasineqartoq

Ukiumi ataatsimi kingullermi akit qaffakkiartorneranni inuussutissat akii ineqarnermullu akiliut siuttuupput.

Naatsorsueqqissaartarfiup atuisunut akit naleqqersuutaat pillugit naatsorsuusiaani, tamanut saqqummiunneqaqqammersumi, takuneqarsinnaavoq.

Atuisut tamakkiisumik atuinerat agguaqatigiissillugit naatsorsuisoqarpoq, ukiullu tamaasa juulip aallaqqaataani januaarillu aallaqqaataani akit qanoq innerannik takussutissiisarluni.

Juulip aallaqqaataaniit ukiup ataatsip ingerlanerani akit 3,6 procentimik qaffassimapput.

Inuussutissat akii ineqarnermullu akiliutip naleqqersuutip qaffariaataanut sunniuteqarnerpaapput, tassalu inuussutissanut akit 4,2 procentimik qaffariaateqartut ineqarnermut akiliut 5,8 procentinik qaffariaateqarput, Naatsorsueqqissaartarfik allappoq.

Ikummatissaq aningaasartuuteqarnerulersitsisoq

AAMMA ATUARUK

Akit qaffakkiartorput – isertitalli malinnaavallaanngillat

Ineqarnermut tunngasut akitsoraluttuinnarnerannut ikummatissap akitsoraluttuinnarnera pissutaasinnaavoq, tamatumalu kingunerisaanik kiassarnermut angallannermullu aningaasartuutit qaffassimapput.

- Innuussutissanut akini qaffariaat pingaartumik kaffit, nersussuit immuinit nerisassiat neqaatalu akisunerulernerannik peqquteqarpoq, Naatsorsueqqissaartarfik allappoq.

Ukiup ataatsip ingerlanerani akit qaffannerat ukiut siuliunut sanilliullugu qaffannerulaarsimanerat takussutissami takuneqarsinnaavoq.

Akit qaffakkiartornerat oqallisaasaqaaq isornartorsiorneqakulasarlunilu. Siusinaarlutik soraarnerussutisiallit Nuummi juunimi akerliussutsimik tamanna aamma takutitsiffigaat.

Ukiut qulit kingulliit ingerlaneranni ulluinnarni pisariaqartitat ilaasa akisunerulernerat aningaasarsiat qaffakkiartornerannit annertunerungaatsiarsimanerat Sermitsiami upernaaq aamma allaaseraarput.

Aningaasaqarnermut Siunnersuisoqatigiit 2025-mi aningaasat naleerukkiartornerat 2024-mut sanilliullugu appasinnerulaarnissaat naatsorsuutigaat.