Inuusuttunut kommunalbestyrelseqalernissaanut siunnersuut ingerlaqqittoq
Inuusuttunut kommunalbestyrelsimik pilersitsinissamik Steffen Johansenip (N) siunnersuutaa Qeqqata Kommuniani kommunalbestyrelsimi sapaatip-akunnerata siuliani oqaluuserineqarpoq. Siunnersuut soqutigineqarluni suliareqqitassatut Aningaasaqarnermut ataatsimiititaliamut ingerlateqqitassanngortinneqarpoq.
Qeqqata Kommunia
Steffen Johansenip Naleqqameersup siunnersuutaa kommunalbestyrelsimi pingaaruteqartutut nalilerneqarpoq, inuusuttullu politikkikkut aallussinerulernissaanut periarfissatut nalilerneqarluni.
Kommunalbestyrelsimi suleqatigiit ataatsimiinnermi erseqqissarpaat inuusuttut Nakuusaaqqat aqqutigalugit politikkikkut partiilersoratik isummersorsinnaasut.
Isumaqarlutilli kommunalbestyrelsi inuusuttut politikkimik soqutiginarsaanissaminnut sulinerusinnaasut.
Kommunalbestyrelsimi ilaasortat aalajangerput Avannaata Kommunia, Kommuneqarfik Sermersoorlu inuusuttunut kommunalbestyrelseqaramik isumassarsiorfigineqassasut.
Inuusuttunut kommunalbestyrelseqalerpat ukiumut aningaasartuutit 112.000 koruunit missaanissangatinneqarput.
Siunnersuut tamakkiisumik akuerineqaqqaartigani Aningaasaqarnermut ataatsimiititaliamut suliareqqitassanngortinneqarpoq.
