Iperagaasoq

- Marlunngornermi ullaakkut nalunaarfigineqaratta Paul ingerlaannaq sianerfigalugu ministereqarfiup aalajangiinera pillugu ilisimatipparput. Maanna qaangiummat soorunami nuannaajallaqalunilu eqqissiallappoq. Suleqatiga Julie Stage nulianut sianerlunilu qaninnertut suleqatigisartagai aamma ilisimatippai.

Japanimi oqartussaasut Paul Watsonip Japanimi pineqaatissinneqarnissaanik qinnuteqaataat akuerineqassanngitsoq Inatsisinik atortitsinermut ministereqarfiup marlunngornermi ullaakkut aalajangernerata kingorna Paul Watsonip eqqartuussissuserisua Jonas Christoffersen taama Sermitsiamut oqaluttuarpoq. 

- Maanna ilaquttaminut Frankrigimiittunut piaarnerpaamik angerlassaaq,“ Jonas Christoffersen nangippoq. 

Paul Watsonili iperagaavinngilaq, tassami eqqartuussissuserisua naapertorlugu Japanimiit Interpol aqqutigalugu nunat allat malissinnaasaannik noqqaassuteqarpoq. 

Ataatsimut isigalugu naliliineq 

Inatsisinik atuutsitsinermut ministereqarfiup Japanimiut tunniussinissamut noqqaassuteqarnerannik Inatsisinik atortitsinermut itigartitsineranut tunngavilersuutit assigiinngitsuupput. 

Ilaatigut suliaq ukiut 14-it matuma siorna aallartittoq pineqarpoq, pinerlunnerlu taama ilungersunartiginngilaq. Naggasiutigalugu Paul Watsonip tigummigallarneqareernerata Japanimi pillaatisiassaanut ilanngaatigineqarnissaa Japanimi oqartussaasut neriorsuutigisinnaanngilaat. 

Inatsisinik atortitsinermut ministeri Peter Hummelgaard tusagassiuutinut nalunaarummi ima oqarpoq:

– Japanip Paul Watsonip tunniunnissaanik qinnuteqaataa akuerineqassanngitsoq Inatsisinik atortitsinermut ministereqarfik ullumi aalajangerpoq. Aalajangiineq suliami pineqartumi pissutsit ataatsimut nalilersorneri tunngavigalugit pivoq. Inatsisinik atortitsinermut ministereqarfiup isumaa naapertorlugu, tunniussinissamik aalajangiisoqarnissaata tungaanut Paul Watsonip tigummigallarneqarnissaa eqqarsaatigalugu, pissutsit qanoq ittuunerat , taakkulu ukiut 14-it sinnerlugit matuma siorna pisimasuuneri eqqarsaatigalugit, piffissaq Paul Watsonip Kalaallit Nunaanni tigummigallarneqarnera Japanimi kiffaanngissuseqarnermut pillaatitut pineqaatissiissutigisaanut ilanngaatigineqassasoq qulakkiissallugu pingaaruteqarsimavoq.

Tigummigallarneqarnini pillugu taarsiivigineqarnissaa

Paul Watson Japanimi tigusarinninnissamut peqqussut tunngavigalugu juulip naanerani Nuummi tigusarineqarpoq. Arfanniat umiarsuaata 2010-mi Sikuiuitsumi Kujallermi innarlerneqarnera taamaalillutillu inuttat suliaminnik unitsitsisariaqarnerat pillugu unnerluutigineqarniassammat Japanimiut tunniunneqarnissaa piumasaraat. Akerliunermi inuttaq ataaseq annikitsumik ajoquserpoq. 

Jonas Christoffersen naapertorlugut sivisuumik tigummigallarneqarnera pillugu taarsiiffigitinnissamik qinnuteqarnissaq ”naatsorsuutigineqarsinnaavoq”. 

– Maanna kiffaanngissutsimik arsaarinnissutigineqaqattaarsimanera inatsisinut naapertuunnersoq pillugu suliaq Eqqartuussiviit qullersaannit suliarineqarpoq. Qanoq inerniliisoqassanersoq utaqqisariaqarparput. Kisiannili Kalaallit Nunaanni Eqqartuussivimmi Nunattalu Eqqartuussiviani eqqortumik pineqarsimasoq isumaqanngilagut. Paasisinnaavarput suliap oqartussanit suliarineqarnera sivisusimammat. Kisianni qaammatit tallimat qaangiuttut maannamut pisimanera paasiuminaatsipparput. Suliaq soqutaanngitsoq ukiullu 14-it matuma siorna pisimasoq oqartuaannarnikuuvugut. 

Japanimi oqartussat Inatsisinik atuutsitsinissamut ministereqarfiup Paul Watsonip iperagaanissaanik aalajangernera ajuusaarutigalugu pingasunngornermi nalunaarput.