IPS 2024-mi pisunut: Inatsit nutaaq pisuni pingaarnerpaavoq
Assigiinngisitsinnginnissaq pillugu inatsit nutaaq Kalaallit Nunaanni naligiissitsinermut siuariarnerujussuuvoq, IPS – Inuit Pisinnaatitaaffii pillugit Siunnersuisoqatigiit 2024-mut ukiumoortumik nalunaarusiaminni allapput.
Siulittaasuusimasoq Qivioq Løvstrøm inuit innarluutillit illersuisuattut atorfinimmat Tukumminngiaq Olsen Lyberth 2025-mi siulittaasunngorpoq.
Assi: Leiff Josefsen
IPS-ip – Inuit Pisinnaatitaaffii pillugit Siunnersuisoqatigiit – 2024-mut nalunaarusiani piareerpaa. Ukioq LGBTQIA+-it pisinnaatitaaffiinut pingaarutilik.
- Sipineq+ aamma Inuit Pisinnaatitaaffii Pillugit Siunnersuisoqatigiit suleqatigalugit nunatsinni LGBTQIA+-iunermi pissutsit qulaarpagut minnerunngitsumillu sutigut pisinnaatitaaffiisa eqquutsinneqannginnerat ersarissarlugu. Tamanna massakkumut immikkoortitaannginnissaannut illersuinissamut amigartumut tikkuussisuusimavoq, immikkoortitaasunut annertuumik kinguneqartarsimalluni, Siunnersuisoqatigiit siulittaasuat Tukumminngiaq Olsen Lyberth allappoq.
Innuttaasut immikkoortinneqartutut misigisimasut Naligiissitaaneq pillugu aalajangiisartunut maalaaruteqarsinnaanermik periarfissaqalernerattut ukioq taanna eqqaamaneqassaaq:
- IPS-imiit Kalaallit Nunaanni siullermeerluni naligiissitaanermut assigiinngisitsinnginnissamullu inatsip atuutsilersinneqarnissaanut suliniut malinnaaffigisimavarput, Inatsisartullu upernaakkut katersuunneranni akuersissugineqarmat assut nuannaarutigalugu. Inatsit inuit pisinnaatitaaffii eqqarsaatigalugit annertuumik siuariartoqarneranik takutitsivoq – inunnut LGBTQIA+-iusunuinnaanngitsoq aammali innuttaasunut tamanut, siulittaasoq oqarpoq.
Suliniutit allat
Innuttaasunut sammisunik 2024-p suliaqarfiunissaa siunnersuisoqatigiit pingaarnersiorsimavaat, tassunga inuit pisinnaatitaaffii pillugit festivalertitsineq ”Tamat Festivaliat” aaqqissuunneqarluni. IPS-ip paasissutissiinera naapertorlugu Nunatsinni innuttaasut assigiinngiiaartunik ukiullit 2.000-it pallillugit sammisaqartitsinermi peqataapput, ilaatigut qitinnermik ilinniartitsisoqarlunilu filmertitsisoqarluni.
Naartunaveersaatinik atuisitsinerup, spiralilersuinertut aamma nalunnginneqartup, misissuiffigineqartariaqartoq siunnersuisoqatigiit oqariartuutigisarpaat. Inuit innarluutillit meeqqallu pillugit oqaaseqartartut suleqatigalugit innarluutit takussaanngitsut aamma sammineqarput.
Nunap inoqqaavisa pisinnaatitaaffiinik taakkualu Kalaallit Nunaannut qanoq sunniuteqartarnerat pillugit ilisimasanik siammarterinissaq siunnersuisoqatigiit 2025-mi suliniutaannut pingaarnernut ilaassaaq.
