Iranip nunani allani toqutseriarsimanera Danmark nunallu allat 13-it assuaraat

Danmark aamma nunat allat 13-it, ilaatigut USA aamma Tuluit Nunaat ilanngullugit, Iranip naalagaaffiata navianartorsiortitsineranut assuarliipput.

Sisamanngornermi ataatsimoorussamik tamanna nalunaarutigineqarpoq, ilaatigut Tuluit Nunaata naalakkersuisuisa nittartagaanni saqqummiunneqarluni.

- Europami aamma Amerikap Avannaani inuit toqoriarneqartarnerinut, tigusariniarneqartarnerinut, kanngunarsarniarneqartarnerinullu Iranip paasiniaasartuisa iliuuserisaanut akerliulluta ataatsimoorluta assuaraarput, nunat namminiussusiannik innarliinerummat unioqqutitsinerullunilu, ataatsimoorussamik nalunaarutigineqarpoq.

Danmarkip, USA-p aamma Tuluit Nunaata saniatigut Albania, Østrigi, Belgia, Canada, Tjekkia, Finland, Frankrig, Tyskland, Holland, Spania Sverigelu ataatsimoorussamik taamak nalunaaruteqartuupput.

Politiit paasiniaasartui (PET) naapertorlugu ilisimaneqarluarpoq, Iranip Europami najugaqartunik Iranimiut naalagaaffiup akerlerisaannik paasiniaasartoqartoq - aamma Danmarkimi.

Taama PET 1. juli naliliivoq.

Taakku inunnut navianartorsiortitsinerat PET naapertorlugu Iranip paasiniaasartuinit toqqaannartumik pinnani, aammali Iranip paasiniaasartuinit attaveqartunit allanik ilaqarput.

- Taakku paasiniaasartut nunarsuarmi pinerluttuliortut kattuffiinik suleqateqarneruleriartuinnarput Europami aamma Amerikap Avannaani tusagassiortunik, juutinik, siusinnerusukkullu atorfilinnik saassussisarnerminni. Tamanna akuerineqarsinnaanngilaq, nunat 14-nit taakku ataatsimoorussamik nalunaarutiminni erseqqissaatigaat.

- Taamaattoqarnera nunatut namminiussutsitsinnut saassussinertut isigaarput, kikkulluunniit saassunniarneqaraluarpata. Suleqatigiissutigissavarput iliuutsinik taamaattunik pinaveersaartitsinissarput, Iranimi oqartussat kaammattorpagut piaarnerpaamik iliuutsinik inatsisinik unioqqutitsisunik nunatsinni tamani unitsilluinnaqqullugit.