Isertitat agguaqatigiissillugu qaffakkiartorput - angutit arnallu akissarsiaat assigiinngilluinnarput
2023-mi agguaqatigiissillugu inuttut isertitat 13.000 koruunit missaannik qaffassimasut, tassa 4,5 procentimik qaffassimasut, Naatsorsueqqissaartarfik naatsorsueqqissaarnermi nutaami allappoq.
Isertitat pisissutaasinnaasut pitsaasumik ineriartortut Naatsorsueqqissaartarfiup naatsorsuinerata aamma takutippaa.
Assiliisoq: Leiff Josefsen
Naatsorsueqqissaartarfiup saqqummersitaani nutaami innuttaasut 2023-mi isertitaat nalilersorneqarput. Ukioq manna isertitat qaffassimapput, kisianni angutit arnallu akornanni aamma sumiiffinni assigiinngitsuni isertitat akornanni suli annertuumik assigiinngissuteqartoq, naatsorsueqqissaarnermi aamma takuneqarsinnaavoq.
Inuttut isertitat agguaqatigiissillugu 13.000 koruuninik qaffassimapput 292.000 koruuninngorlutik, tassa 2022-mut sanilliullugu 4,5 procentimik qaffassimapput.
Soorlu takussutissiami ataani takuneqarsinnaasoq, kommunini assigiinngitsuni isertitat assigiinngilluinnartuupput.
Takussutissiaq: Naatsorsueqqissaartarfik
Kommunini tamani Kommuneqarfik Sermersuumi inuit isertitaat annertunerpaapput. Qeqqata Kommuniani isertitat qaffasissusaat nuna tamakkerlugu agguaqatigiissinnerisa annertoqataannik inissisimapput. Kommune Kujallermi, Kommune Qeqertalimmi aamma Avannaata Kommuniani nuna tamakkerlugu agguaqatigiissitsinermit isertitat 14-21 pct.-inik appasinnerusut, Naatsorsueqqissaartarfik allappoq.
Kommunikunut 18-inut, maannakkut distriktinik taaneqartartunut, Naatsorsueqqissaartarfiup nuna aggormagu assigiinngissutit suli erseqqinnerulerput.
Nuup distriktiani isertitat qaffasinnerpaapput, 2023-mi inuit isertitaat katillugit 363.000 koruuniusimallutik, tamannalu agguaqatigiissillugu isertitaqarnerpaap tullianit Sisimiunit 20,8 procentimik qaffasinnerusoq, Naatsorsueqqissaartarfik allappoq. Isertitakinnerpaaffiusoq tassaavoq Qaanaaq, tassani innuttaasut agguaqatigiissillugu 185.000 koruuninik isertitaqarmata.
Takussutissami tulliuttumi distriktit imminnut sanilliullugit qanoq inissisimanerat takuneqarsinnaavoq:
Takussutissiaq: Naatsorsueqqissaartarfik
Isertitat pisissutaasinnaasut qaffakkiartorput
Nioqqutissat kiffartuussinerillu akiinit isertitat qaffakkiartornerunersut Naatsorsueqqissaartarfiup naatsorsorsimavaa, tassanilu aamma innuttaasut atuinissamut periarfissaasa pitsaasumik ineriartorsimanerat takuneqarsinnaavoq. 2022-mulli 2023-mullu kisitsisit suli naatsorsorneqarsimanngillat:
Malugiuk: Isertitat pisissutaasinnaasut naatsorsorneqarput inuit isertitaasa tamarmiusut (akileraannginnermi il.il) aamma nuna tamakkerlugu naatsorsuutini atuisunut akit naleqqersuutaannut iluarsaassat tunuliaqutaralugit. Najoqqutaq: https://bank.stat.gl/INNPI501
Takussutissiaq: Naatsorsueqqissaartarfik
Arnat angutillu akornanni assigiinngissut 25 procentiusoq
Naatsorsueqqissaartarfiup angutit arnallu isertitaat aamma naatsorsorpaat.
2023-mi akileraarutit suli ilanngaatiginagit angutit agguaqatigiissillugu 321.000 koruuninik isertitaqarsimasut Naatsorsueqqissaartarfik allappoq. Arnat agguaqatigiissillugu 258.000 koruuninik isertitaqarsimapput.
Tassa angutit nuna tamakkerlugu arnat aningaasarsiaannit 25 procentit missaannik angutit amerlanerusunik aningaasarsisarput, Naatsorsueqqissaartarfik allappoq.
Takussutissiaq: Naatsorsueqqissaartarfik
Angutit sulisinnaasut arnanut sulisinnaasunut sanilliullugit amerlanerunerat, ukiunilu inuussutissarsiorfiusinnaasuni angutit amerlanerungaatsiartut isertitaqarnerusullu naatsorsuutini eqqarsaatigineqanngitsoq naatsorsueqqissaartarfik erseqqissaavoq, killormulli ukioqqortunerit akornanni isertitakinneruffiusunilu arnat amerlanerupput, taamaattoq piviusumi isertitani nikingassutaat kisitsisit tamakkiisut takutitaannit malunnaateqarujussuanngitsut Naatsorsueqqissaartarfik naliliivoq.
