Israel Gaza pillugu piffissaliussaq nallertinnagu: Piumasaqaatit ilaat suli oqaluuseraagut
Ikiuiniaqatigiiffiit piffissap nallinnginnerani Israelimik isornartorsiuipput. Israel naapertorlugu USA-mik oqaloqateqarneq ingerlaannarpoq.
Israelip USA-p piumasaqaatai eqqortinngikkai nunani tamalaani ikiuiniaqatigiiffiit arlallit oqarput, pissutsillu qaammatini 13-ini sorsunnermi aatsaat taama ajortigisut isumaqarput, nutaarsiassaqartitsivik AP allappoq.
(Toqqorsivimmiit assi). - Assi: Amir Cohen/Reuters
Israelip Gazami inunnik isumaginninnerup pitsaanerulersinnissaanik USA-p piumasaqaataasa amerlanersaat - tamaasaanngitsorli - naammassisimallugit isumaqarpoq.
Taama Israelimi atorfilik USA-p sakkutooqarnikkut ikiuisinnaanerata ulluni 30-ni killilerneqarsimasup marlunngornermi qaangiutinnginnerani ataasinngormat tusagassiorfimmut Reutersimut oqarpoq. Tamatuma kingorna Amerikamiut sakkutooqarnikkut ikiuinerat killilersulerneqarsinnaavoq.
Piumasaqaatit ilaat suli oqaloqatigiissutigineqartut atorfilik oqarpoq. Oqaloqatigiissutigineqartut isumannaallisaanermut tunngasuupput, atorfilik tusagassiortunut oqarpoq.
Lastbiilit 50-iniit 100-nut amerlassusillit ullormut niuerniarlutik isertinneqartarnissaat Amerikamiut piumasaqaataannut Israelip naammassiumanngikkunaraluagaanut ilaavoq.
Niuertut Palæstinamiunit sakkutooqatigiinnit Hamasimit aqunneqarmata niuerneq matuneqarsimasoq atorfilik oqarpoq.
Aammattaaq containerit matoqqasut eqqunneqarsinnaassanngillat atorfilik oqarpoq. Tamannattaaq isumannaallisaanikkut nalorninartoqarneranik peqquteqarpoq.
USA-lli oktobarip 13-ianni Israelimut allakkamini ulluni 30-ni ikiuiniarnermi pitsaanerulersitsiniarluni piumasaqarnerata kingorna atorfilik naapertorlugu apeqqutit amerlanerit oqaluuserineqarput.
Gazamut killeqarfiup ikaartarfiisa tallimaat ammarneqarumaartoq taakkununnga ilaasoq atorfilik oqarpoq.
Illuatungaanilli nunat tamalaat ikiuiniaqatigiiffiisa arlallit Israel piumasaqaatinik eqqortitsinngitsoq oqaatigaat. Qaammatini 13-ini sorsunnermi pissutsit aatsaat taama ajortigisut isumaqarput, nutaarsiassaqartitsivik AP allappoq.
Naak ikaartarfiit tallimaat marlunngornermi ammarneqartussatut neriorsuutigineqartoq Gazami innuttaasut amerlasuut tuperni inunnik ulikkaartuni inuupput, ikiuiniaasullu nunap avannaanut isersinnaanerat killilersorneqarpoq, nalunaarummi allassimavoq.
Israelip pissutsit pitsanngorsarniarlugit iliuuseqarsimanera sapaatip-akunnerani kingullermi USA-p nunanut allanut tunngasunut naalakkersuisoqarfimmit nalunaarutigineqarpoq. Maluginiarnartumilli allannguuteqartoqanngilaq.
Israelip nunanut allanut ministeriata Gideon Saarip USA-p aallartitaa ataatsimeeqatigisimallugu ataasinngornermi oqarpoq. „Amerikamiut ikinngutivut peqatigalugit isumaqatigiissinnaalluta ajornartorsiullu aaqqikkumaartoq“ upperalugu Saar oqarpoq.
Maanna iliuuseqartoqanngippat Gazap avannaa kaannersuaqarfiusinnaasoq nunarsuarmi nerisassat isumannaatsuunissaat pillugu immikkut ilisimasallit tallimanngornermi mianersoqqusipput.
/ritzau/Reuters
