Issittumi imartamik aqutsinermut sunniuteqarnissamik isumaqatigiissut qulakkeerissaaq

Ukiuni qulikkaani arlalissuarni, nunarsuarmiut silap pissusiata allanngorneratigut ajornartoornerit malunnaatilimmik qisuariarfigineqartarnerat annertusiartorpoq, tamatumalu malitsigisaanik Issittumi imartap, nunap issittullu silaannaata sammineqarnerat annertusiartuinnarpoq.

Issittup imartaa pingaartumik eqqumaffigineqarpoq, sikup aakkiartornera aammalu issittumi immap uumasuisa naasuisalu sunnerneqarnerat alaatsinaanneqarnerulerluni. Taamaakkaluartoq issittumi inuusut namminneerlutik sunniuteqaqataasinnaanerat issittumerpiaq allannguutit pillugit nunarsuarmioqatigiit suliniarneranni.

Maanna suliniaqatigiiffik naalakkersuinermut attuumassuteqanngitsoq ICC Greenland suliniuteqarnerulernissamik aamma taamaalilluni sunniuteqarnerulernissamik anguniagaqarnerulersinnaanngorpoq, tamannalu pisinnaalerpoq Ocean North Kalaallit Nunaat (ONKN) 1,7 millionit koruuninik ICC Greenlandimut 2024-mut tunissuteqarmat aammalu suleqatigiilersut isumaqatigiissutigimmassuk isumaqatigiissut sivitsorneqarsinnaasut ukiut sisamat tikillugit.

- Isumaqatigiissutip matuma siunertaraa nunarsuami imaani uumasoqatigiiaaqarfimmik annerpaamik aammalu innarlersimannginnerpaamik, Issittup Imartaanik, attassiinnarnissamut suliniutip patajaallisarnissaa. "Issittumi suliniut" aqqutigalugu ICC-p aamma nunap inoqqaavisa qanimut suleqatigiinnissaannik pilersitsisoqarpoq, uumasoqatigiiaarfiit attanneqarnissaat aamma mianerineqarnissaat siunertaralugu, ICC Greenland aamma ONKN tusagassiuutitigut nalunaaruteqarlutik ilisimatitsipput.

Imartamik aqutsinermi peqataanissamut sunniuteqarnissamullu nukittorsaataassaaq

ICC Kalaallit Nunaat aamma ONKN ilisimatitsipput aningaasat taakkua ICC Kalaallit Nunaata nunani tamalaani peqataasarneranut pitsanngorsaanissamut atorneqassapput, tassunga ilanngullugu ICC-p nunani tamalaani qitiusumik oqalliffianni Inuit peqataanerunissaannut annertusaanermik suliniuteqarnera, soorlu Naalagaaffinni Peqatigiinni nunani tamalaani imarsiornermut kattuffimmi (IMO), aamma Issittup Imartaata Qiterpasissuata nalimmassarneqanngitsumik aalisarnermik pitsaaliuineq pillugu isumaqatigiissut pillugu ”Central Arctic Ocean Fisheries Agreement” (CAOFA) suliami, issittup imartaata qiterpasissuani aalisarnermik illersuinissamik ukkataqartumik. 

Taassuma saniatigut ICC-p Pikialaarsuarmik ingerlatsinermi Inuit aqutsinerat siuarsarniarlugu suli suliaqarnera qulakkeerniarlugu tapersiisoqarpoq.

Pinngortitap illersorneqarnera aamma Inuit sunniuteqarnerulernerat

Isumaqatigiissuteqartut isumaqatigiissut aqqutigalugu qulakkeerniarpaat issittup imartaani uumasoqatigiit naasullu illersorneqarnissaannik piujuartinneqarnissaannillu sulissutiginninnerup annertusarneqarnissaa.

Jens Immanuelsen, ONKN-imi siulersuisut siulittaasuat isumaqatigiissut pillugu ima oqarpoq:

- ICC Kalaallit Nunaat peqatigalugu taamatut suleqateqalernerput tulluusimaarutigaarput, tamatumalu issittup imartaani illersuinissamut pimoorussinitsinnut takussutissaavoq. Isumaqatigissut una siunissami kinguaariinnut uumassuseqatigiiaat immikkuullarissut attanneqarnissaannut anguniakkatsinnut patajaallisaassaaq.

Sara Olsvig, Inuit Circumpolar Council-imut nunani tamalaani siulittaasoq aamma Hjalmar Dahl ICC Kalaallit Nunaannut Præsidenti oqarput:

- Nuannaarutigaarput, ICC Kalaallit Nunaat ukiorpaalunni ICC-p nunani tamalaani imartanik aqutsinermi sulineranut peqataasinnaalissammat taamaalilluni Inuit sinnerlugit annertuumik sunniuteqarnissaq qulakkeersinnaallugu.