Issittumi Siunnersuisoqatigiit Kalaallit Nunaannit aqunneqassasoq: Nunat tamalaat akornanni unammilligassaqarnerani suliassaq pingaarutilik
Issittumi Siunnersuisoqatigiinni siulittaasuuffik Kunngeqarfik Danmarkip ullumi tiguaa, Kalaallit Nunaallu tassani siuttuussaaq.
Vivian Motzfeldtip (S) Kunngeqarfiup Danmarkip Issittumi Siunnersuisoqatigiinni siulittaasuuffimminut tunngatillugu suliniutissai apriilip aqqarngani saqqummiuppai.
Assi: Jensine Berthelsen
Naalakkersuisut Danmarkip Issittumi Siunnersuisoqatigiinni siulittaasuuffik tiguppagu suliniutissai qaammat kingulleq saqqummiuppaat.
Siulittaasuuffik nunanut allanut ilisimatusarnermullu naalakkersuisup Vivian Motzfeldtip (S) kunngeqarfik sinnerlugu ullumi tigussavaa.
Siulittaasuuffik Norgep ukiuni kingullerni marlunni siulittaasuuffigimmagu tunniussineq Tromsømi pissaaq. Tassanilu Norgep nunanut allanut ministerianit Espen Barth Eidemit Vivian Motzfeldtimut tunniunneqassalluni.
- Kunngeqarfiup Issittumi Siunnersuisoqatigiinni siulittaasuuffimminik maanna aallartitsisinnaanera ataqqinaataangaarpoq. Nunat tamalaat akornanni pikkunartorsiornerup nalaani sulinermut issittumi innuttaasunut iluaqutaassaaq.
- Norge ukiuni kingullerni pingaarutilimmik suliaqarsimanera angusimasaalu pillugit qutsavigaara. Savalimmiut Danmarkilu suleqatiglaugit Issittumi Siunnersuisoqatigiinni sulinermi ataatsimoorluta akisussaaffimmik tigusinissarput qilanaaraara, Vivian Motzfeldt tusagassiuutinut nalunaarummi oqarpoq.
Aatsaat taama pingaaruteqartigisoq
Allariikkatsitut Kunngeqarfik Danmark siulittaasuuffimmik tigusivoq, Kalaallit Nunaatalu taanna siuttuuffigissallugu. Savalimmiut siulittaasup tulliatut inissippoq.
- Kalaallit Nunaat Danmarkilu qanimut suleqatigalugit siulittaasup tulliatut inissinneqarnerput siulittaasoqarfimmi suut pingaartinneqarnersut ersersinneqarput, Siunnersuisoqatigiit siunissaata qulakkeerneqarnissaa suliniutigineqarluni Issittumilu Nunanilu avannarlerni nunat tamalaat suleqatigiinnerisa aatsaat taama pingaaruteqartiginerani timitaliisoqarluni, Savalimmiut nunanut allanut inuussutissarsiornermullu ministeri Sirið Stenberg (Tjóðveldi) oqarpoq.
Kunngeqarfiup Issittumi Siunnersuisoqatigiinni siulittaasuuffik akisussaaffigilerpaa, Issittumilu nunat inuiaallu unammilligassaannut ataatsimut aaqqiissutissanik suliaqartussanngorluni.
Inissisimaffik pingaarutilik
Issittumi Siunnersuisoqatigiit sulinerat Ruslandip Ukraine 2022-mili tiguarmagu unammilligassaqalerpoq. Sulineq aallaqqaammut unittoorpoq, Norgeli pissutaalluni sulineq arriitsumik aallartikkiartoqqilerluni.
Suliap ingerlateqqilernissaa pingaaruteqartoq qallunaat nunanut allanut ministeriat Lars Løkke Rasmussen (Moderaterne) isumaqarpoq, taannalu Issittumi Siunnersuisoqatigiit ukiuni aggersuni pingaaruteqarluinnartussaasut oqarpoq.
- Piffissami nunap immikkoortuini suleqatigiinnerup unammillernartorsiorfiani Norge Issittumi Siunnersuisoqatigiinni sulinerup aallarteqqinnissaa anguniarlugu iliuuseqangaatsiarsimavoq. Kalaallit Nunaat Savalimmiullu peqatigalugit ukiuni marlunni tulliuttuni siulittaasuuffigisassatsinni suliassap pingaarutillip ingerlateqqinnissaa qilanaaraara, oqarpoq.
Kunngeqarfik Danmark Issittumi Siunnersuisoqatigiinni aappassaanni siulittaasuuvoq, siullermik 2009-miit 2011-mut.
Siulittaasoqarfiup tigummineqarnerani issittumi aallartitatut toqqagaaqqammersoq Kenneth Høegh atorfilittat qaffasissumik inissisimaffillit ataatsimeersuarneranni, aamma issittumi atorfilittat qullersaannik imaluunniit SAO-mi siulittaasumik taaneqartartumi, siulittaasunngussaaq. Savalimmiullu SAO-mi siulittaasup tulliatut inissisissalluni.
Nunatta nalunaaqutaa naapertorlugu siulittaasuuffimmik tunniussineq nal. 14.30 aallartissaaq.
