Ilinniartut Kalaallit Nunaanneersut 22-it
Issittumi tunngaviusumik ilinniagaq maajimi Kangerlussuarmi aallartippaat. Taakku
ilagaat Mads Mortensen 21-nik ukiulik Nuummeersoq, ilinniakkamik
isiginnissinnaanernik arlalinnik takunnissinnaasoq.
Ilinniartut Kalaallit Nunaanneersut 22-it
Issittumi tunngaviusumik ilinniagaq maajimi Kangerlussuarmi aallartippaat. Taakku
ilagaat Mads Mortensen 21-nik ukiulik Nuummeersoq, ilinniakkamik
isiginnissinnaanernik arlalinnik takunnissinnaasoq.
– Pingasoriarlunga ilinniarnertuunngorniaraluarpunga, iluatsinngilarli. Aasianni
ilinniarfinnik nittarsaassisoqarmat Issittumi tunngaviusumik ilinniagaq
paasisaqarfigineruniarlugu takuniaavunga.
- Misilitsereerama qinnuteqarpunga
ilinnialertussanngorlungalu, uannullu eqqortuusoq paasivara. Illersornissaqarfimmi,
politiini qatserisartunilu ingerlaqqissallunga qularinngilara, Mads Mortensen, ilinniagaqarnissaminik
periarfissaqanngitsutut imminut isigisarsimasoq, oqarpoq.
– Maannali ilinniarsimasutut suliffeqarsinnaanera takusinnaalerpara.
Qajannaatsuuneq pissuserinnerlu
Issittumi tunngaviusumik ilinniarneq
immikkoortunik pingasunik qaammatini arfinilinni sivisussuseqartunik
immikkoortoqarpoq, kingornalu qaammatini arfinilinni sivisussuseqartumi
siunissami qanoq pisoqarumaarneranik misissuinissamut neqeroorfigineqarluni.
Tassa katillugit ukiumi ataatsimi.
Ilinniarfik sakkutuunut tamanut tunngaviusumik
ilinniarnertut taaneqarpoq, tassa ilinniartut sakkutuut pingasut
assigiinngitsut pillugit ilisimasaqalertarput, soorluttaaq politiit
qatserisartullu akornanni piginnaasanik ilinniartartut. Ilinniartut aamma
inuussutissarsiutigalugu biilersinnaanermut allagartartaarnissamut, dronemik
ingerlatsisinnaanermut allagartartaarnissamut, ikiueqqaarnermik
pikkorissarnernut, pujuliornermut aqqartartutullu allagartartaarnissamut aamma
umiatsiamik ingerlatsisinnaanermut allagartartaarnissamut periarfissaqarput.
– Ilinniarfik nukittunermik ineriartortitsinermillu kinguneqarpoq.
Inuusuttunut piumasaqaateqarlutalu naatsorsuuteqarpugut, tamannalu pitsaasumik
kinguneqartartoq misigisarparput. Assersuutigalugu ilinniartut piffissaq
eqqorlugu takkuttarput, allanullu tunngatillugu aamma kajumissuseqarluarneq
angusaqarusunnerlu misigisarpavut. Ilinniartut ilinniagaqarnerminni
suliffigisinnaasaminnik paasisaqartarlutillu ilinniakkaminnik
naammassinninnerminni allaanerusumik annertunerusumillu periarfissaqalertarput,
Issittumi tunngaviusumik ilinniarfiup naalagaa pisortaalu Simon Kohfelt oqarpoq.
Upalungaarsimasunit politiinut
Ilinniartut Issittumi tunngaviusumik ilinniarnermik naammassinnittut
nalinginnaasumik piumasaqaatigineqartartoq malillugu
ilinniarnertuunngorniaratik politiinut qinnuteqarsinnaalersut Simon Kohfeltip assersuutigalugu
eqqaavaa.
– Ilinniartut ilaasa ilinniakkaminnik ingerlatitseqqinniarnerminni
iluaqutigisinnaavaat.
Issittumi tunngaviusumik ilinniarnermi
ilinniartut siulliit maajimi 2025-mi soraarummiissapput, tassanilu aamma
ilinniartut aappaat aallartissapput. 18-ileereersimasut Kalaallit Nunaannilu
najugallit Ilinniarfimmut qinnuteqarsinnaapput. Qallunaatut oqalussinnaaneq
piumasaqaataanngilaq, kisianni timikkut misilitsittoqartarpoq aamma kalaallisut
qallunaatulluunniit allattariarsorluni silassorinnermut misilitsittoqartarpoq,
taamaalillunilu illersornissamut tunngaviusumik peqqissutsimut piumasaqaatit
naammassineqartarlutik.
