Isumaqatigiissut nutaaq 15 mia. kr.-inik naleqartoq Issittup illersorneqarneranik nukittorsaassaaq
Umiarsuit issittorsiutit pingasut dronellu isorartuumut angalasinnaasut marluk Issittumi isumaqatigiissummut 15 milliardit koruuninik naleqartumut aningaasaliissutigineqartut ilagaat.
Nunanut allanut tunngasunut Naalakkersuisoq, Vivian Motzfeldt (S), naammagisimaarinnippoq ilaatigut Issittumi Tunngaviusumik ilinniarfimmi ilinniartunngorsinnaasut amerlineqartussanngormata.
Assiliisoq: Emil Helms/Ritzau Scanpix
Piffissami sivikinngitsumi isumaqatigiinniartoqareersoq Issittumi illersornissaq pillugu isumaqatigiissut maanna naammassineqarpoq.
Taamak ilisimatitsivoq Illersornissamut ministeri, Troels Lund Poulsen (V) ataasinngornermi ualikkut kingusissukkut tusagassiortunik katersortitsinermi.
Isumaqatigiissummi 15 milliardit koruunit missaanni aningaasaliisoqassasoq, taanna ilisimatitsivoq.
Aningaasaliissutit ilaatigut atorneqassapput umiarsuarnut issittorsiutinut nutaanut pingasunut aamma dronenut ungasissumut ingerlaarsinnaasunut marlunnut, oqaatigineqarpoq.
Umiarsuit nutaat siunissami Danmarkip sakkutuuisa umiarsuai Thetis-klassemik pineqartartut sisamaasut taarsissavaat, umiarsuit takku tamarmik pisoqalillutillu aserfallassimammata.
Danskit nalakkersuisuisa aamma isumaqatigiissummut peqataasut akornanni tamanna isumaqatigiissutigineqarpoq, Alternativet aamma Enhedslisten kisimik peqataanngillat.
Tusagassiortunik katersortitsinermi Nunanut allanut tunngasunut Naalakkersuisoq, Vivian Motzfeldt (S) peqataavoq. Taanna oqarpoq, umiarsuit nutaat pingasut issittumi illersuinermut "nukittorsaanermik" qulakkeerinnittuusut.
- Aammattaaq ilisimavarput, isumannaallisaanikkut politikkikkut pissutsit allanngorsimammata, tamannalu eqqarsaatigalugu iliuuseqartariaqarpugut.
- Uannut pingaarnersiuinermi pingaaruteqarsimavoq umiarsuit nutaat Issittumiittussat pissarsiarinissaat. Nalunngilara qanoq pingaaruteqartigisut. Nunatsinni innuttaasut ataasiakkaat isumannaatsuunissaannut pingaaruteqarluinnarput, Vivian Motzfeldt oqarpoq.
Taamatuttaaq nunatsinni Naalakkersuisut nuannaarutigaat, Issittumi tunngaviusumik ilinniarfimmi (Arktis Basisuddannelsemi) ilinniartut amerlineqarnissaat isumaqatigiissutigineqarmat:
- Ilinniarneq assut isumaqarlunilu pingaaruteqarpoq, ilinniartullu malinnaaviginissaat qilanaaraara, taanna oqarpoq.
Sirius Patruljen aamma Canadian Rangers
Qimusserlutik nunatta avannaarsuani alapernaarsuisartut Sirius Patruljekkut aaqqissuussaanerata allannguutissat aamma isumaqatigiissutaavoq, Vivian Motzfeldt tusagassiortunik katersortitsinermi oqarpoq:
- Sirius Patruljemut kalaallit peqataasalernissaat ukkatarineqarpoq. Soorunami. Taamaaliortussaavugut.
- Naalakkersuisut kissaatigaat sumiiffimmi ilisimasat atorlugit avinngarusimasuni, pingaartumik Kalaallit Nunaata kangiani avannaarsuanilu, najugaqartut atorluarneqarnissaat pissusissamisoorpoq, Vivian Motzfeldt oqarpoq, aamma oqaluttuarpoq Canadian Rangersinut assingusumik aaqqissuussisoqassanersoq misissorneqassasoq.
Troels Lund Poulsen paasissutissiivoq, Issittoq pillugu isumaqatigiissut ullumi ataasinngornermi saqqummiunneqartoq isumaqatigiissutip immikkoortuisa siullersariinnaraat Issittumi aamma Atlantikup Avannaani illersornissaqarfiup annertusaanerani.
- Pingaaruteqarpoq oqaatigissallugu, pisariaqartoq annertunerusumik iliuuseqartoqarnissaa aamma politikkikkut suliniutit annertunerusut aallartinneqarnissaat. Aalajangiupparpullu taanna 2025-mi aasamut suliarissallugu.
Illersornissamut ministeri nangippoq, nutaamik umiarsualiisarnernut pilersaarut aamma suliarineqartoq. Isumaqatigiinniarnerit tassunga tunngasut marsimi aallartissapput.
