Qiuutit marluk, qilerut aappalaartoq nuannaarlunilu silaannarmi nillertumi nillerneq. Taama Nuummi Inuussutissanut Aqutsisoqarfiup allaffiata allagartaa qulaarneqarpoq.
Aalisarnermut, piniarnermut, nunalerinermut imminullu pilersornermut naalakkersuisoq Peter Borg (D), inuussutissanullu ministeri Jacob Jensen (venstre) qilerummik aappalaartumik qiorsinermikkut allaffimmik nutaamik pisortatigoortumik ammaapput.
Qiuutit marluk, qilerut aappalaartoq nuannaarlunilu silaannarmi nillertumi nillerneq. Taama Nuummi Inuussutissanut Aqutsisoqarfiup allaffiata allagartaa qulaarneqarpoq.
Aalisarnermut, piniarnermut, nunalerinermut imminullu pilersornermut naalakkersuisoq Peter Borg (D), inuussutissanullu ministeri Jacob Jensen (venstre) qilerummik aappalaartumik qiorsinermikkut allaffimmik nutaamik pisortatigoortumik ammaapput.
Ministerit marluk taakku tamatuma pinissaa ullualunnik sioqqullugu ilaatigut uumasut nakorsaqarnerannut immikkoortumi suleqatigiinnissamik isumaqatigiissut nutaaq naapillutik atsiorpaat.
Isumaqatigiissut nunatsinni uumasut nakorsaasa amerlanerulernissaannik qularnaarinissamik neriunaatilik.
- Uumasut nakorsaqarnerannut immikkoortumi immikkoortut ilaat piffissami aggersumi annertusarneqassapput, tassa sulisunik paarlaateqatigiiffigineqassapput. Tamakku assersuutigalugu tassaasinnaapput uumasut nakorsaat, Jacob Jensen oqarpoq.
Inuussutissanut ministereqarfiup Aalisarnermullu, Piniarnermut, Nunalerinermut Imminullu pilersornermut Naalakkersuisoqarfiup akornanni suliassaqarfinni attuumassuteqartuni sulisunik piginnaasanillu paarlaateqatigiittarnikkut suleqatigiinnerup nukittorsarnissaa, isumaqatigiissummut ilaatigut siunertaavoq.
Atorfinitsitsiniarneq ajornakusoortoq Uumasut nakorsassaaleqineq nunatsinni ilisimaneqarpoq. Kujataani savaatillit siusinnerusukkut aalajangersimasumik tamaani uumasut nakorsaqannginnera avannaanilu qimmiutillit piffimmi uumasut nakorsaqannginnera arlaleriarlutik ajornartorsiutigisarpaat.
Tamatuma uumasut nakorsaannut inuussutissanullu oqartussaasut uumasut nakorsaannik piffissani sivikitsuni paarlatsitut atorfinitsitsisalerneraat kinguneraa.
Isumaqatigiissullu aqqutigalugu immaqa ungasinnerusumut aaqqissuusiortoqassaaq.
- Tamanna sulisunik paarlaateqatigiittarnissami, piginnaasanik paarlaateqatigiittarnissami, amerlanerusunik iliniartitsisarnerni siunertaavoq, taamaalilluni Kalaallit Nunaanni ataavartumik uumasunut nakorsaqalersinnaavoq, tamannalu aamma uumasunut nakorsaqarnermut immikkoortuni allani atuussinnaavoq, Jacob Jensen oqarpoq.
Taamattaaq Peter Borg isumaqatigiissummik iluarisimaarinnippoq.
- Uumasut nakorsaannik amigaateqartilluta taakku sulisuinik atuisinnaanermut periarfissaqalernissarput neriuutaavoq. Nunatsinni immikkoortumut sulisussanik atorfinitsitsiniartarneq ajornartorsiutaavoq, taanna oqarpoq.
Nuummi allaffiup nutaap allagartaa taama isikkoqarpoq.
Foto: Hanna Hviid
Oqartussaaffinnik tigusineq Inuussutissanut uumasullu nakorsaannut oqartussaaffik suli tiguneqanngilaq, taamaammallu akisussaaffik Danmarkimi ministereqarfimmiippoq.
Kalaallilli Nunaata namminneerluni piffissap ilaani oqartussaaffik tigusinnaagaa neriuutaavoq.
- Piffissap ingerlanerani piareernermi oqartussaaffik tiguneqassasoq ungasissoq isigalugu kissaataavoq, tamannali maanna pisinnaanngilaq, mannalu siunissami oqartussaaffimmik tamakkiisumik tigusisinnaanermut aqqummi alloriarneq siulliusutut isigaara, Peter Borg Nuummi Inuussutissanut Aqutsisoqarfiup allaffianik ammaaneq innersuussutigalugu oqarpoq.
Taamattaaq isumaatigiissut nutaaq tamatuma tungaanut alloriarnertut Jacob Jensenip isigaa. Sivisunerusumik naammassinnissinnaassutsimik annertusaaneq suliassat amerlanerusut tigusinnaanerannut periarfissiisinnaasoq taassuma neriuutigaa.
