Annertuumik innarluuteqartup Lindap Ivaaqqami najugaqartup, kinguaassiutitigullu atornerlunneqartarsimanermi kingunerisaanik 2. september 2022-mi erneriataarnikup anaanaa, Maibritt Lothsen suli ilaqutariittut pisinnaatitaaffitik pillugit sorsuuteqarpoq. Maanna nukappiaraq marlunnik ukioqalertussannngorpoq, erninerullu kingorna nukappiaqqap anaanani suli takunikuunngilaa.
- Kiisaluunniit ilisimajunnaarpara uagut suli pisinnaatitaaffeqarnersugut, tassami qanorluunniit tamaviaaraluaraangama paniga ernutaralu pillugit, angusaqarsinnaanngilanga.
Annertuumik innarluuteqartup Lindap Ivaaqqami najugaqartup, kinguaassiutitigullu atornerlunneqartarsimanermi kingunerisaanik 2. september 2022-mi erneriataarnikup anaanaa, Maibritt Lothsen suli ilaqutariittut pisinnaatitaaffitik pillugit sorsuuteqarpoq. Maanna nukappiaraq marlunnik ukioqalertussannngorpoq, erninerullu kingorna nukappiaqqap anaanani suli takunikuunngilaa.
- Kiisaluunniit ilisimajunnaarpara uagut suli pisinnaatitaaffeqarnersugut, tassami qanorluunniit tamaviaaraluaraangama paniga ernutaralu pillugit, angusaqarsinnaanngilanga.
- Paniga tassanngaannaq meerartaarmat, sukkanerpaamik pisortat ikiuunnialerput, kisianni ikiugaat allaapput, panigalu ikiorneqarani. Suli tassa pinerluffigitiffimmini Ivaaqqami najugaqartinneqarpoq. Taannaannaanngilarli, aamma suli Ivaaqqami sulisunit kissaatigineqanngitsutut tusaaniarneqanngitsutullu inissisimatinneqarpunga. Taamaattumik paniga qanillugu najugaqaraluarlungaluunniit, ilaqutariittut inooqatigiittutut periarfissaqartitaanerput killeqaqaaq. Allamik kissaateqanngikkaluarpunga, qulakkeerusutara tassaavoq paninnut atugassarititaasut pitsaasuunissaat, Maibritt Lothsen oqaluttuarpoq.
Inatsisitigut pissutsit pillugit ikiorserneqanngillat
Maibritt Lothsenip ernuttani najugaqatigilissallugu arlaleriarluni oqariartortarsimagaluarpoq. Ernutaa maanna meeqqat angerlarsimaffianni najugaqarpoq. Suliamut tunngatillugu inatsisitigut siunnersorteqanngilaq:
- Pisortat ingerlatsiviisa tungaannit, pingaartumik Kommune Kujallermit, piffissami sivisoorujussuarmi sullinneqarneragaasarpunga inissisimanerput pillugu. Arlaleriarlungalu oqartussanut allakkatigut saaffiginnittarpunga kissaatigalugu ernuttama uanniilernissaa, taamaalillutalu pingasuulluta (anaana, panik, erninnguaq, aaqq.) ataatsimoorluta ilaqutariittut inuuneq ingerlassinnaalerniassagatsigu. Kisianni allakkakka akineqarneq ajorput, maannaluunnniimmi nalulerparaluunniit kommunit, namminersorlutik oqartussat isumaginninnermullu aqutsisoqarfik pilluta sunik suliaqarnersut. Manna tikillugu paasitinneqanngilanga ilaqutariittut inuuneqarnissarput pillugu akuerisaalluta inuuneqarsinnaanersugut.
Maibritt Lothsen sakkortuumik isornartorsiuteqareersoq Sermitsiap Kommune Kujallermi inunnik isumaginninermut immikkoortortaqarfik akissuteqaqqullugu saaffigaa. Inunnik isumaginninnermut immikkoortortaqarfimmi pisortaq ilisimatitsivoq suliani inunnut ataasiakkaani tunngassutilinni kommuni oqaaseqarsinnaanngitsoq.
- Qulakkeerusuinnaraluarpara ernuttama anaanani ilinniassagaa. Tassami qanorluunniit innarluuteqartigigaluarpat, anaanaq meerarlu imminnut ilinniarnissaminnut periarfissinneqartariaqarput. Tassami taakku arlaannaatigulluunniit pinerluttuliornikuunngikkat, kiisa misigisimalerpunga ilaqutariittut uagut pisortaninngaaniit pillagaasugut. Tassa pisortat tungaannit sumiginnagaaginnanngilagut, aammali inatsisitigut pisinnaatitaaffigut pillugit siunnersortigisinnaasatsinnik peqanngilagut. Ataatsimut isigalugu misigisimavunga ilaqutariittut pisinnaatitaaffigut pillugit eqqunngitsuliorfigitittutut misigisimaannaleqqavunga, Maibritt Lothsen oqarpoq.
Ernuttap tamaviaarutiginera
Sermitsiami allagaatit suliamut tunngasut tigummineqarput. Taakkunanilu allassimavoq nukappiaraq inunngoqqammernermini ulloq unnuarlu angerlarsimaffimmut inissinneqassasoq aalajangerneqarsimasoq.
Kommune Kujallermit allagaq nukappiaqqamut oqartussaassuseqartussatut toqakkamut, tassani erseqqissaatigineqarluni Maibritt Lothsen ernutaminut oqartussaasutut inissisimanissani kissaatiginngikkaa. - Tamanna ilumuunngilaq, kommunemit sianerfigineqarpunga psykologimut oqaloqateqarnerma nalaani, ilisimatinneqarpunga ernutara DIH-mut misissortikkiartorlugu aallarunneqalersoq, kingusinnerusukkut paasinarsivoq ernutara ulloq unnuarlu angerlarsimaffimmut nuutsinneqarsimasoq uanga avaqqutiinnarlunga, Maibritt Lothsen oqaluttuarpoq.
Allakkami Kommuni oqarpoq, Maibritt Lothsenip ernuttaminut akisussaassusilittut inissikkumasimanngitsoq.
- Tamanna ilumuunngilaq, uanga ernuttama inunngornerata nalaani tuparujussuaqqagaluarlunga, taamaattorli ernuttama tununnissaanik aalajangernikuunngisaannarpunga aamma allanit oqartussaaffigineqalernissaanik aalajangerneq avaqqullunga ingerlanneqarpoq. Taamani pisut uivernertut ingerlanneqarput, kisianni uanga ernutara panigalu sinnerlugit aalajangiiniarsarisaraluarpunga, kisianni maannamut annertuumik nukippassuarnik atuigaluarlunga, uagutsinnut iluaqutissiisinnaasunik angusaqarnissara iluatsinngitsoorpoq.
Kisianni qanoq pisoqassava, ernuttavit panivillu pisariaqartitaat qulakkeerneqassappata?
- Piviusunngortissinnaarusukkaluarpara, kissaatigaaralu panigalu Nuummiilissasugut, tassanimi ernuttara najugaqarpoq, taava uagut pingasuulluta ilaqutariittut inuuneq aallartissinnaassagaluarparput.
Maibritt Lothsen aamma oqaluttuarpoq oqaasiinnartigut ilisimatinneqarsimalluni meeraq pingasunik ukioqalereerpat ulloq unnuarlu angerlarsimaffimmiit akisussaasumut angerlartinneqarsinnaasoq. Taama iliortoqarsinnaaneranut tunngatillugu allakkatigut uppernarsaammik piumasimagaluarpoq, sulili allakkanik uppernarsaataasunik tunineqarsimanani.
Suliaq pillugu Sermitsiap Kommune Kujalleq oqaaseqartinniarsimagaluarpaa, kommunimili inunnik isumaginninnermut immikkoortortaqarfimmit ilisimatitsissutigineqarpoq inunnut ataasiakkaanut tunngasuni oqaaseqartoqarsinnaanngitsoq. Sermitsiap paasiumagaluarpaa meeraq ilaqutaasunit akisussaaffigineqarumasoq sooq pingasunik ukioqaleqqaarluni meeqqat angerlarsimaffiannit angerlartinneqartariaqarnersoq.
