J. D. Vance-ip nulia Nuummut Sisimiunullu tikeraassaaq
Sermitsiap paasitinneqarnera naapertorlugu Avannaata Qimussersua amerikamiut vicepræsidentiata nuliata isiginnaassavaa. Sermitsiallu ilisimatinneqarnera naapertorlugu, Kalaallit Nunaanni oqartussat tikeraarnissamik ilisimatinneqarsimapput, angalanerlu pisortatigoortumik ingerlanneqassanngilaq inuttullu angalanerussalluni.
Usha Vance maani ataatsimoorpoq uinilu, USA-p vicepræsidentia JD Vance.
Assi: Leah Millis/Reuters/Ritzau Scanpix
Januaarimi Donald Trumpip ernera, Donald Trump Jr., Nuummut tikeraarpoq. Maanna ilisimatinneqarnerput naapertorlugu Amerikap naalakkersuisuisa qullersaqarfiannut qanitaasoq Kalaallit Nunaannut tikeraartussanngorpoq.
Sermitsiap paasitinneqarnera naapertorlugu tamatumuuna J. D. Vancep, Donald Trumpip tullersortigisaata nulia Usha Vance, tikeraartussanngorpoq.
Taamaalilluni aamma Usha Vance tassaavoq USA-mi arnat sallersaasa tullia.
Siusinnerusukkut saqqummiunneqarnikuuvoq USA-p qimussimik sukkaniunneq Avannaata Qimussersua tapersersorusukkaa, Sermitsiallu ilisimatinneqarnera naapertorlugu qimussertartut kattuffiata tapersersuerusunneq akuersaarsimavaa, tamannalu ingerlanneqarsimalluni USA-p aallartitaqarfia Nuummiittoq aqqutigalugu, taamaalillutillu Avannaata Qimussersuani aningaasatigut tapersersorneqarnissartik akuerisaasimavaagaat.
Usha Vancep tikeraarnera pillugu nutaarsiassaq takkuppoq, sapaatip akunnerata siuliata naanerani nunatsinni sumiiffinni arlalinni præsident Trumpip Kalaallit Nunaannut oqaaseqaatai akerlilerlugit akerliussutsimik takutitsisoqarnerata kingorna.
Soqutiginninneq annertoq
Donald Trump Kalaallit Nunaannut soqutiginninnera annertoorujussuuvoq, taassumalu anguniarpaa. USA-p nuna pigisarilerlugulu aqutarilissagaa.
Taamaattoq Kalaallit Nunaanni politikerit ataatsimoorlutik arlaleriaqalutillu itigartitsisarput, kingullertigullu partiit siulittaasuisa ataatsimoorlutik oqaaseqaateqarnermikkut tamanna ersersippaat.
Ilisimatinneqarnerput naapertorlugu sillimaniarnermik suliaqartut aqagu Nuummut tikissapput, taakku J. D. Vancep nuliata angalaqataasalu tikeraarneranni ikiuutissallutik. Sermitsiallu paasitinneqarnerra naapertorlugu Usha Vance Nuummeeqqaassaq, tamatumalu kingorna Sisimiunut ingerlaqqissalluni, tassani Avannaata Qimussersua, arfininngornermi marsip 29-anni aallartittussaq, isiginnaassallugu.
Præsidentip ernerata Donald Trump Jr.-ip Nuummiinnermini Naalakkersuisut sinniisaanik naapitsinngilaq.
Sermitsiamillu paasisagut naapertorlugit, J. D. Vance-p nulia aamma Kalaallit Nunaannit pisortatigoortumik sinniisunik naapitsissamaanngilaq.
