J. K. Rowling aqqusaarmat

Atuakkiortoq Tuluit Nunaanneersoq J. K. Rowling, nukappiaraq Harry Potter pillugu atuakkianik tusaamaneqarluartunik atuakkiortuusoq, umiarsuarminut nuannaariartaammut Samsaramut ilaalluni Kalaallit Nunaata sineriaani aggustimi avannamukaarujoorpoq. Umiarsuaq aqqutaani Ilimanami neriniartarfimmut Koksimut tikillunilu Uummannap kangerluini kisaqqasarpoq. J. K. Rowling sapaatip-akunnerini sisamani Kalaallit Nunaanniissimalluni, nunalu tikissimasaani kusanarnerpaajusoq, inuit nittartakkakkut naapittarfianni X-imi nammineq allappoq. Ileqqut alutornartut, uumasut immikkuullarissut inuillu nuannersut, inussiarnersut ikiuiumatuullu angalanermini naapissimallugit ilanngullugu allappoq.

Ikkussaq 1,2 milliorneriarluni takutinneqarsimasoq kalaallisut allassimavoq: ”Nunani tikeraarnikuusanni kusanarnerpaaq tikeraaqqammerpara, sapaatit akunneri tallimat iluanni. Ileqqusi oqaluttuatoqqasilu soqutiginarluinnartut, uumasut immikkuullarissut, kiisalu kalaallit naapitatta asseqanngitsumik kiinnertarnerat, tikilluaqqusisarnerat, ikiuukkumatusarnerat, inuppalaarnerallu puigunngisaannassavakka. Oqaaseq qujanaq annikipporluunniit. Qujanarujussuaq.”

Filmertarfik aqqartarfillu 

J. K. Rowlingip umiarsuaa nuannaariartaat 88,5 meterinik takissuseqartoq amutsivimmiit Oceanco-miit sananeqarlunilu Espen Øinomit Norgemeersumit ilusilersorneqarpoq. Umiarsuaq nuannaariartaat aallaqqaammut Infinity-mik ateqarsimagaluarpoq, J.k. Rowlingilli umiarsuaq 150 millionit dollarsilerlugu 2023-mi pisiarigamiuk allamik atserpaa.

Samsara, Indiami upperisarsiornermi inuunermillu isiginnittaasermi ilisimaneqarluartutut oqaasiusoq inuullu inunngorneranik, toquneranik inunngoqqinneranillu oqaluttuartuusoq, 20 knob angullugu sukkassuseqarsinnaavoq.

Ilaasut aqqaneq-marluk inuttallu 26-it umiarsuarmi ilaasinnaallutillu taamatuttaaq naluttarfeqarlunilu, filmertarfeqarlunilu, qulimiguulimmut mittarfeqarlunilu aamma angisuumik aqqartarfeqarpoq.

 Naqitat 500 millionit 

J. K. Rowlingip Harry Potter pillugu atuakkiai, 1997-imiit 2007-imut saqqummersinneqartut, naqitat 500 millionit sinnerlugit tunineqarsimallutillu oqaatsinut 80-init amerlanerusunut nutserneqarsimapput. Rowling atuakkat nangeqattaartut saniatigut aamma oqaluttualianik inersimasunoortunik allattarlunilu ateruseq Robert Galbraith atorlugu pissanganartulianik nangeqattaartunillu atuakkiornikuuvoq.

J.K. Rowling arlalinnik nersornaaserneqarsimavoq, matumani The Order of the British Empire, Companion of Honour, Legion d’Honneur, Hans Christian Andersenip nersornaasiuttagaa, Robert F. Kennedyp nersornaasiuttagaa ’Ripple of Hope’ kiisalu Blue Peter saqqarmioq guultiusoq.

Ajunngitsuliorneq

Ajunngitsuliornermut aningaasaateqarfini Volant aqqutigalugu suliniaqatigiiffiit arlallit tapersersorpai, ajunngitsuliornermullu aningaasaateqarfik Lumos, nunarsuarmik meeqqanut angerlarsimaffeqaranilu ornittagaqanngitsumik ilaqutariillu ataatsimuuleqqinnissaanik sulissuteqartoq, nammineerluni pilersissimavaa.

Atuakkanik atuartarfiup Wordery-p naatsorsuutai naapertorlugit atuakkiani 7 milliardit koruuninik iluanaaruteqarfigisimavai, aningaasaatimili ilarujussui ajunngitsuliornermut tunniuttarlugit ilisimaneqarpoq – namminermi oqarneratuut: "Pisariaqartitanniit annertunerujussuarmik pisimaguit ileqqorissaarnikkut akisussaaffeqartariaqarputit."

Allaaserisaq Motoorimi saqqummersinneqarpoq. Motoori uani atuarsinnaavat.