Jens-Frederik: Kilitsissiaqarneq akuerineqarsinnaanngilluinnarpoq
USA-p Kalaallit Nunaanni kilitsissiaqarniarneranut tunngasoq Naalakkersuisut siulittaasuata Jens-Frederik Nielsenip (D) maanna qisuariarfigaa.
Foto: Oscar Scott Carl
- Iligisanut kilitsissiaqaniarluni oqalunneq akuerineqarsinnaanngilluinnarpoq. Aammalu ataqqinninnginnerulluni, Jens-Frederik Nielsen Sermitsiamut oqarpoq.
Allaaserisaq Wall Street Journal-imi saqqummersoq, tassa namminiilivinnissamik suliniutit amerikamiullu pisuussutinik piiaasinnaanerannik qanoq isumaqartoqarnersoq paasiniarlugit USA-mi atorfilittat isertortumik paasiniaasartut Kalaallit Nunaanni kilitsissiaqalernissamik qinnutigisimanerannut allaaserisaq taama qisuariarfigaa.
Amerikamiut aallartitaat nunanut allanut ministeriaqarfimmi sisamanngornermi ataatsimeeqatiginerani Kalaallit Nunaata isummernera ersarissumik oqaatigineqartoq Jens-Frederik Nielsen oqarpoq.
- Ataatsimiittoqarpoq, Kalaallit Nunaannut tunngasut eqqartorneqartillugit Kalaallit Nunaata peqataanissaa pingaaruteqartoq erseqqissassallugu.
- Ataatsimiinnermi peqataavugut, Kalaallit Nunaatalu qanoq isumeqarnera erseqqissarneqarpoq. Kalaallit Nunaat kilitsissiaqarniarnermut qanoq isiginninnera ersarilluinnarpoq. Tamanna akuerineqarsinnaanngilaq ataqqinninngitsuliornerullunilu, Naalakkersuisut siulittaasuat oqarpoq.
Kalaallit Nunaat allatigut aamma qanoq qisuariarsinnaasoraajuk?
- Maannakkut ersarissumik oqariartuuteqartugut isumaqarpunga. Kilitsissiaqarnissaannut killiliivugut. Tamanna qisuariarfigineqassajunnarsivoq, taamaalisoqarpallu qanoq pissanersugut nalunarumaanngilaq.
- Ataqqinnittumik oqalunneq iliuutsillu ataqqinnittut. Tassa kissaatigisarput. Ingammik iligisanut suleqatinullu tunngatillugu, Jens-Frederik Nielsen oqarpoq.
USA-p Nuummi aallartitaqarfiata matuneqarnissaa eqqaaneqarpoq. Tanna qanoq isumaqarfigaajuk?
- Iligisamit kilitsissiaqalersaartoqarnera akuersaanngilluinnaripput akuersaanngilluinnaripput paasitinnissaa taanna maanna pingaarnerpaasoq isumaqarpunga.
- Aallartitaqarfiup matunissaa eqqartorneqarpoq. Suli tassunga killinngilagut, pissutsilli malinnaaffigeqqissaarpagut, Jens-Frederik Nielsen oqarpoq.
