Jens-Frederik: Pingaaruteqarpoq uivilinnginnissarput
Demokraatit siulittaasuat, naalakkersuisooqatigiilernissamik isumaqatigiinniarnerit kingorna Naalakkersuisut siulittaasuatut inissinnissaminut ilimanarluinnartoq, eqqissisimanissamik kajumissaaruteqarpoq: - Ilumoorpoq suli aalajangiisinnaasunik Naalakkersoqanngitsugut, kisianni aamma eqqaamassavarput nunatsinni partiit ataatsimoorluta USA-mit kimigiiserfigineqarnerput pillugu isumaqatigiissuteqaratta, taamaattumik iliuuseqarsinnaanngitsutut inissisimavinngilagut, taanna Sermitsiamut oqarpoq.
- Naalakkersuisooqatigiinnik pilersitsinissaq pillugu nangittumik arriitsumik tuaviussaagut, taamaaliornikkut qajannaatsumik suleqatigiinnissamik isumaqatigiissusiornissaq qulakkeersinnaanerussavarput, avataanillu kimigiiserfigineqarneq pillugu sukkasuumik iliuuseqarnissamut killitsinneqannginnissarput pingaaruteqarpoq, Demokraatit siulittaasuat Jens-Frederik Nielsen oqarpoq.
Assi: Leiff Josefsen
Jens-Frederik Nielsen (D), naalakkersuisooqatigiiliornissamut isumaqatigiinniarnerit naammassippata Naalakkersuisut siulittaasuattut inissinnissaminut ilimanaateqarluartoq manna eqqissisaavoq:
- Ilumoorpoq suli aalajangiisinnaasumik Naalakkersuisoqanngitsugut, avataanit kimigiiserfigineqarneq piinnarlugu, nalunngilarpummi pipallatamik eqqarsaatigilluagaanngitsumillu iliuuseqassagutta sanngiinnerulissutigiinnarsinnaagipput, Jens-Frederik Nielsen oqarpoq nangillunilu:
- Taamaattumik aalajangiusimavara piffissaq pisariaqartitarput atorlugu isumaqatigiinniarnerput nangissagipput politikkikkut isumaqatigiissummik pitsaasumik attanneqarsinnaasumillu angusaqarniarnitsinni, ilisimavarpummi ullut 45-it isumaqatigiinniarnernut periarfissaqarluta.
Jens-Frederik Nielsenip kingumut erseqqissaatigaa nammineq kissaatiginerpaagini siammasissumik naalakkersuisooqatigiiliornissaq, erseqqissarlugulu isumaqatigiinniarnerni partiit tamarmik suli peqataasut.
Charmeoffensivimik ersarissumik
Jens-Frederik Nielsenip amerikamiut tikeraarniarnerat allamik isumaqartinngilaa annertuumik iluareqqusaarnerusoq:
- Amerikamiut nalunngilaat isumaqatigiinnialeruttortugut aammalu suli kommuninut qinersinissaq naammassinngikkipput, kisianni periarfissamik takusimapput Kalaallit Nunaannut tikeraarnissaminnut, tamannalu kingumut takutitseqqiinnarpoq inuiaqatigiinnik kalaallinik qanoq ataqqinninngitsiginersut, Jens-Frederik Nielsen oqarpoq nangillunilu:
- Taamaattorli tikeraarniarneq, "inuttut tikeraarnertut" aaqqissuussaaneragaasoq, tassaavoq iluareqqusaarluni iliuuseqarneq, aammalu tamanna sunnertiffigissagutsigu, assersuutigalugu sukkalisaarluta naalakkersuisooqatigiinnik pilersitsinissamik iliuuseqassagutta tikeraarniarneq taanna piinnarlugu, kimigiiserfigineqarnitsinni suli sanngiinnerusumik inississinnaavugut, taamaattumik eqqissisimasumik tiguinnassagipput kaammattuutigissavara ataatsimoorullugulu nunarsuarmioqatigiinnut nangittumik erseqqissassagipput nunarput nioqqutissaanngitsoq aammalu nunatsinnut oqartussaassuseqarneq nammineq uagut inuiaqatigiittut pigisarput arsaarinnissutaasinnaanngitsoq, ataqqisassaasoq innarlerniagassaanngitsorlu.
