Justitsministeria eqqartuussiviillu qullersaat utaqqisitsipput
Ulluliisoqarnikuunngilaq kingusinnerpaamik qaqugu justisministeri Peter Hummelgaard (soc. dem.) aalajangiissanersoq, aamma Eqqartuussiviit Qullersaqarfiat (højesteret) suli ulluliinngilaq qaqugu Paul Watsonip pilluni suliaq tassani saqqummiutissaneraa, Kalaallit Nunaata Eqqartuussisuuneqarfiata suliassamik suliarinninneranut tunngatillugu maalaaruteqarnikuugami misiliinissaminullu akuerisaanikuulluni.
Paul Watson ernumassivoq ilaquttani ilaginagit Nuummi pineqaatissinneqarsimasunut isertitsivimmi juullisiortariaqalersinnaanerminut.
Assiliisoq: Leiff Josefsen
Arfernik illersuiniaq Paul Watson suli utaqqisinnaassuseqartariaqarpoq siunissamini qanoq pisoqassanersoq pillugu paasisaqarnissaminut. Tassami inatsisit atuutsinneqarnerannut ministeri ulluliinikuunngilaq kingusinnerpaamik qaqugu aalajangerumaarnerluni, Watson Japanimut tunniunneqassanersoq tunniunneqassannginnersorluunniit .
Tamatuma saniatigut Naalagaaffiup eqqartuussisuuneqarfia suli aalajangiinngilaq, qaqugu Paul Watsonip nunatsinni eqqartuussivinnit pineqarnini pillugu Naalagaaffiup eqqartuussisuuneqarfianut saqqummiunneqassanersoq.
Maanna Paul Watsonip ernumassutigilerpaa, pineqaatissinneqarsimasunut inissiisarfimmi juullisiortariaqalersinnaanini, eqqartuussineq decembarip aappaanni, ulloq taanna aamma 74-inik ukioqalerluni inuuissiornermini, ullumikkutut eqqartuussinerup assinganik pisoqassappat, tassa tigummigallaanera sivitsuinermik inerneqassappat.
Juullinnginnerani akissutisinissaq aalajangiisoqarnissaalu naatsorsuutigineqarpoq
Ullumikkut eqqartuussinerup kingorna, Watsonip tigummigallagaanera decembarip sisamaata tungaanut sivitsorneqarpoq, tamatuma kingorna eqqartuussissuserisoq illersuisuusorlu Finn Meinel, oqaloqatigaarput:
- Uagut naatsorsuutigaarput Højesteretip aalajangiinissaa juullertinnagu pissasoq, taamaattumik neriuuteqarpugut, Højesteretimit aamma Justitsministeriamit aalajangiisoqarnissaa juullertinnagu piumaartoq.
Watsonip nammineq aarleqqutigaa, maani Nuummi pineqaatissinneqarsimasunut inissiisarfimmi juullisiortariaqassalluni, taamaalillunilu ilaquttaminik juullisioqateqanngitsoornissani, qanoq iliussavisi tamanna pinngitsoortinniarlugu?
- Uagut arlalinnik aqqutissiorpugut. Justitsministeriamut oqaaseqaatinik tunniussivugut, aamma Højesteretimi, tassanilu eqqartuussissuserisut Jonas Christoffersen aamma Julie Stage annertuunik allakkatigut saqqummiussereerput.
Taavami qanoq pisoqassava, utaqqinissinni Watsonip Japanimut tunniunneqarnissaa pillugu justitsministeri aalajangeriataassappat, Højesteret suli ulluliinngitsoq?
- Taava uagut eqqartuussivinnut ingerlateqqissavarput justitsministerip aalajangigaa, taamaalilluta periarfissinneqassaagut takutissallugit allagaatit amerlanerusut, taakkumi uagut isumarput naapertorlugu takutitsipput taanna unnerluussutigineqartunut pisuussuteqanngitsoq.
Sermitsiamit Justitsministeria attaveqarfigaarput apeqqutigalugu, qanittumi aalajangiisoqassanersoq, Watson tunniunneqassanersoq imaluunniit tunniunneqassannginnersoq pillugu. Akissummik erseqqissumik pissarsinngilagut, kisianni naqissuserneqarpoq suliaq ingerlanneqartoq.
