Kalaallisut innuttaassuseqarneq pas-imut allanneqartalissaaq
Danmarkimi inatsisinik atortitsinermut ministereqarfik kalaallit pas-iini kalaallisut innuttaassuseqarnerup allassimasalernissaanut piareersimavoq. Ministerip iliusaa kalaallit politikerit arlallit nersualaarpaat.
Peter Hummelgaardip kalaallisut pass-inik nalimmassaanera kalaallinit politikerinit arlalinnit nersualaarneqarpoq. Inatsisinillu atortitsinermut ministeri Aaja Chemnitzilu uani takuneqarsinnaapput.
Assi: Allattoqarfik (IA)
Innuttaasut pas-iini kalaallisut innuttaassuseqarneq allassimasinnaanersoq misissoqqullugu Inatsisinik atortitsinermut ministerip Peter Hummelgaardip (S) atorfilittani ukioq manna siusinnerusukkut qinnuigai.
Isumassarsiaq piviusunngussaaq, taamaalilluni kalaallit pas-iini inuiaassuseq kalaallisut qallunaatullu allassimasinnaanngissaaq, ministeriaqarfik ilisimatitsivoq:
– Nalunngilara kalaallit inuiaassutsiminnik pingaartitsisuusut. Tamanna paasilluarlugulu ataqqivara, Peter Hummelgaard oqarpoq.
Isumaginninnermut, ilaqutariinnermut, suliffeqarnermut nunamullu namminermut naalakkersuisoq passip imarisaa nutaaq namminiilivinnissamut alloriarnertut isigineqarsinnaasoq isumaqarpoq.
- Kalaallit Nunaata kinaassutsiminik namminerlu nunat tamalaat akornanni imminut ilisaritissinnaaneranik isuma tapersersorneqarpoq. Aamma innuttaasut tulluusimaarnerulissutigisinnaavaat ataqatigiinnerulersillugillu, tamannalu inuiaqatigiit ataqatigiinnerannut ineriartornerannullu pingaaruteqarpoq, Jess Svane (S) oqarpoq.
Kalaallit folketingimi ilaasortat marluk suliniut nuannaarutigaat. Suliaq IA-p qaqittarsimammagu tamanna sunniuteqartoq Aaja Chemnitzip oqapoq. Kalaallit Nunaata pas-imut tunngasut nammineq akisussaaffigiligassagai Aki-Matilda Høegh-Dam (S) isumaqarpoq.
Inatsisinik atortitsinermut ministereqarfik naapertorlugu allannguut 2024-p naannginnerani atuutilersinneqassaaq.
Kalaallisut pas-i pillugu paasissutissaq
Qallunaatut innuttaassusillit Kalaallit Nunaanni najugaqartut kalaallisut imaluunniit qallunaatut passeqassanerlutik toqqarsinnaavaat.
Kalaallit pas-iata saqqaani allassimavoq “Danmark – Kalaallit Nunaat”, qallunaallu pas-iata saqqaani allassimavoq “Danmark – Den Europæiske Union”.
Inuiaassutsimut tunngatillugu qallunaatut kalaallisulluunniit pas-eqarneq assigiinngissuteqanngilaq. Taakkunani marlunni inuiaassuseq qallunaatut maanna allassimavoq.
Savalimmiormiut pas-iini qallunaatut savalimmiormiutullu inuiaassuseq allaqqareerpoq.
Najoqqutaq: Inatsisinik atortitsinermut ministereqarfik
