KL

DK

Kalaallisut passeqalersinnaaneq inuiaassutsimut apeqqusiisoq

Pas-imi inuiaassutsip kalaallisut allasimasinnaanngornissaa ajunngilaq. Kikkunnulli tamanut atuutissanngitsoq Inatsisartullu avaqqullugit aamma atuutilersinneqassanngitsoq Kuno Fencker isumaqarpoq.

Kuno Fencker: Pasimut nutaamut iluarsaassineq periarfissatsialaavoq oqallinnermut annertunerusumut, kinaassusersi qanoq ittuunersut pillugu.
Morten Okkels Tusagassiortoq
Saqqummersinneqarpoq

 Kalaallit Nunaanni passini kalaallisut inuiaassuseqarneq qallunaatut inuiaassusillit assigalugit allaqqasinnaanngornissaanut nutaarsiassaq kalaallit politikkeriisa arlallit sapaatip-akunnerani kingullermi nuannaarutigaat.

Naalakkersuisup Jess Svanep (S) folketingimilu ilaasortat Aki-Matilda Høegh-Damip (S) aamma Aaja Chemnitzip (IA) danskit inatsisinik atortitsinermut ministeriata Peter Hummelgaardip (S), passinut politikkikkut akisussaasup, suliniutaa nuannaarutigaat.

Inatsisartunut ilaasortap Kuno Fenckerip periarfissaq nutaaq aamma nuannaarutigaa. Aammali eqqunngitsumik atoraanni ajoqusiisinnaasoq mianersoqqussutigaa. Passimi ataatsimoornermut takussutissaasoq Kuno Fencker tusagassiorfimmut politikkimik sammisaqarfiusumut Altingetimut isummersorluni allappoq.

– “Kalaaliunerup” passemi allassimasinnaanera kikkunnit tamanit Kalaallit Nunaannut attuumassuteqanngitsunit atorneqarsinnaalissanersoq apeqqutaavoq. Kikkut “kalaaliunersut” erseqqissumik nassuiarneqanngikkuni inuiaassutsitsinnik pigisatsinnik annaasaqarnissaq aarlerinarsinnaaavoq, allappoq.

Aammattaaq Inatsisartut, Kalaallit Nunaannut kalaallinullu tunngasunik isumaginnittussatut qinerneqarsimasut, avaqqullugit aalajangiisoqarsimanera Kuno Fenckerip isornartorsiorpaa.

Oqallinneq kalaallit kinaassusaat pillugu apeqqummut ersersitsinissamik periarfissiissasoq Kuno Fenckerip neriuutigaa.

– Naalakkersuisut Inatsisartuillu kajumissaarpakka pissutsit maanna atuuttut tunngavigalugit kina inatsisitigut kulturikkullu kalaaliunersoq nassuiaqqullugu, allappoq.

kuno fencker inuiaqatigiit samfund nationalitet pas identitet

ATORFIIT Se alle jobs

Powered by Labrador CMS