Kalaallit Københavnimi kollegiaqalernissaannut
suliniut unitsinneqarallartoq
Københavnimi
kalaallit ilinniartut
kollegiassaat 2024-mi
naammassineqassasut
ukiup ataatsip matuma
siorna oqaatigineqarpoq.
Maannali paasinarsivoq
inissiat akisuallaartut.
Tamanna pakatsinarpoq,
Inuit Ataqatigiit sinnerlugit
Folketingimut ilaasortaq
oqarpoq. Københavnimi
Kalaallit Illuutaat
piffissaq eqqorlugu
iliuuseqarsimanngitsoq
taanna isumaqarpoq.
Pilersaarutaasimagaluarpoq
Frederiksbergimi »Bycampus«-imi
kalaallinut ilinnialerlaanut inissiat 25-30-t
atorneqassasut. Taakkuli attartornerat
inissiamut ataatsimut qaammammut 8.000
koruuneqarpoq.
Aarhusimi Odensemilu kalaallit ilinniarnerminni aallartittut ukiumi siullermi kollegiani inissaqarnissaannik periarfissinneqartarput, taamaalillutik kalaaleqatiminnik najugaqateqarsinnaalerlutik. Ilinnialernermi toqqissisisimanerusumik aallartinnissaq periarfissaasarluni.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
Københavnimili tamanna periarfissaanngilaq. Folketingimi partiit marluk, Inuit Ataqatigiit aamma Siumut, Københavnimi inissaaleqinerup aaqqiivigineqarnissaa anguniarlugu ukiuni arlalinni kimigiiserput.
Kalaallit Illuutaannut tapiissutit
Politikerit taakku marluk Danmarkimi aningaasanut inatsimmi 1,5 millionit koruuninik 2021-mi 2022-milu illikartitsipput. Københavnimi Kalaallit Illuutaat kollegiamik pilersitsinissamut imaluunniit suleqateqarnikkut illoqarfiit pingaarnersaanni kollegianik 25-30-nik pissarsinissamut periarfissanik misissuisinnaanissaanut aningaasat atorneqassallutik. Aalborgimi Københavnimilu Kalaallit Illuutaannut ukiuni pingasuni atugassanik 6 millionit koruuninik aningaasaliisoqarnera iluatsippoq.
Ineqarniarneq ilinniagaqarnermut ulluinnarnilu
inuunermut sunniuteqarpoq
Analyse Danmarkip misissuinera naapertorlugu kalaallit ilinniagaqartut inissaqarniarneq pissutiga-
lugu ilinniakkaminnik unitsitsineq ajorput. Ilinniartulli inissaqarniarneq pillugu paasisaqarniarner-
minni piffissaq annerusoq atortariaqartarlugu misigisarput:
– 57 procentit ilinniarnertik sunnerneqartartoq isumaqarput
– 48 procentit ulluinnarni inuunertik sunnerneqarsimasut isumaqarput
– 39 procentit aningaasatigut inuunerminnik ataqatigiissaarinissaq ajornakusoortinnerat misigaat
Aalborgimi Kalaallit Illuutaanni Hadsundsvejimi Idrætsbyenimi kollegianik inissianik sukkasuumik pilersitsisoqarpoq. Københavnimilu Kalaallit Illuutaanni februaarimi 2023-mi nalunaarutigineqarpoq NGO-p Housing Foundation Copenhagenip »Bycampus«-imi, Rolighedsvejip, Bülowsvejip Åboulevardenillu akornanni Frederiksbergimi sanaartorneqartumi, kalaallit ilinniartut ataatsimoorfissaat 2024-mi iserterfigineqarsinnaanngussasoq.
Attartornermut 8.000 koruunit
Sanaartorneq ukiup affaanik maanna kinguaattoorpasippoq. Ajornerpaarli uaniippoq Københavnimi Kalaallit Illuutaata aamma Housing Foundation Copenhagenip isumaqatiginninniarnerat ilinniartut iluaqutigisaannik inerneqanngilaq.
– Housing Foundation Copenhagen oqaloqatigilluarsimavarput kollegianut piumasaqaativut naammassisimammatikkit. Tassa imaappoq, nunanit tamalaaneersut ataatsimoorfissaattut ineqarfiussasoq. Tamatuma saniatigut inissiat pequteqariissapput. Ajoraluartumik akigitinniagaq ukioq manna februaarimi aatsaat paasivarput, tassanilu inimut ataatsimut attartornermut akiliut 6.000 koruunit aamma 8.000 koruunit akornaniissalluni. Peqatigiiffiit ataatsimeeqatigineranni Avalaap peqataaffigisaani tamanna qaqippara. Taakku kingorna allagaqarlutik paasitippaatigut akisuallaartoq, soorlu uanga aamma taama ilimagisimagiga, pisortaq Leise Johnsen oqarpoq, allanillu periarfissanik ujartuilersimanerarpoq.
– Isumaginninnermut Ineqarnermullu Aqutsisoqarfimmi aperinikuuvunga kalaallit ilinniartut kollegiani inissaannut aningaasaliissutit atorlugit ineqarnermut akiliutit akisuut akilerneqarsinnaanngortinneqarsinnaanersut, itigartinneqarpugulli.
Kalaallit ilinniagaqartut namminneq inissarsiorneranni ikiorneqartarnissaannik suliniut maanna suliarineqarpoq.
– Kalaallit Illuutaanni mail-ikkut adressimik pilersitsinissaq sulissutigaarput, taamaalilluni kalaallit ilinniartut inissarsiornerminni nammineeratik maani sulisumit ikiorneqarsinnaanngorniassammata. Taassuma Isumaginninnermut Ineqarnermullu Aqutsisoqarfimmit akuerineqarnissaa maannakkut anguniarparput, Leise Johnsen oqarpoq. Ilinniartut kollegianut amerlanngitsunut, soorlu Amagerimi Øresundskollegiamut, Morbærhavenimut Albertslundimiittumut aamma Herlev kollegiamut ikiortarnissaat taassuma naatsorsuutigaa.
Aammattaaq ilinniartut atugarissaarnerannut tunngatillugu apeqqut, Københavnimi Kalaallit Illuutaannit aamma aaqqinniarneqartoq tassaavoq ilinniartut pisariaqartitaannik tapersersuisinnaasumik atorfinitsitsinissaq.
Naammaginanngilaq
Christiansborgimi Inuit Ataqatigiit sinnerlugit Folketingimut ilaasortap Københavnimi Kalaallit Illuutaanni suliniutit naammaginartinngilai:
– Allamik ataavarnerusumik aaqqiissutissarsisariaqarput. Naammaginanngilaq oqaannarneq ilinniartut inissaaleqineranni ikiortimik sulisoqalernissaq. Aarhusi Odenselu assigalugit kollegianik pilersitsisoqartussaagaluarpoq. Isumaqarpunga Københavnimi Kalaallit Illuutaat piffissaq eqqorlugu iliuuseqarsimanngitsoq, pakatsissutigaaralu pitsaanerusumik aaqqiissutissarsisimanngimmata. Aamma isumaqarpunga ineqarnermut akiliutip annertuallaarneranik paasisaqarneq kingusippallaartukkut pisoq. Politikerit suliap ingerlanerani aamma paasitinneqarsimasinnaagaluarnersut eqqarsarnartoqartippara. Immaqa ikiuussimasinnaagaluarpugut. Avalalli qanittukkut Folketingimut isumakuluutini pillugit allagaqarmat aatsaat paasivara, Aaja Chemnitz oqarpoq.
Suliap ingerlarnga uggornartoq
Kalaallit Illuutaanni Leise Johnsenip pitsaanerusumik aaqqiissutissarsinissaq kissaatigaa.
– Uggornarpoq Frederiksbergimi taamaaliortoqarsinnaasimanngimmat, sanaartortitsisorli namminersortuugami ineqarnermut akiliut nammineq aalajangersinnaavaa.
Housing Foundation Copenhagenilli paasissutissiinera aallaavigalugu ilinniartut nunanit tamalaaneersut ineqarnermut 8.000 koruuneernissartik ajornartorsiutiginngilaat.
Københavnimi kalaallit ilinniartut ukiut tamaasa 35-t missaat ilinnialernerminni inissamik amigaateqartarput. Tamannalu ilinnialernissap aallartikkiartornerani uippakajaarsitsilersarpoq toqqissisimajunnaarsitsillunilu. Naggataatigullu ilinniarnerup aallartinnerani uivertitsisinnaasarpoq ilinniarnermillu unitsitsiinnarnermik kinguneqarluni.