Kalaallit Nunaanni pineqaatissinneqarsimasunut inissiisarfinni inissat amerlanerulersinneqassasut
Danmarkimi pineqaatissiisarnerup allanngortinneqarnissaa Kalaallit Nunaannut aamma sunniuteqassaaq. Pineqaatissinneqarsimasunut inissiisarfinni inissat amerlineqarnissaat Naalakkersuisut qilanaaraat.
Naaja H. Nathanielsenip Kalaallit Nunaanni pineqaatissinneqarsimasunut inissiisarfinni inissaqarnerulernissaq nuannaarutigaa
Assi: Oscar Scott Carl
Danmarkimi inatsisinik atortitsinermut ministerip Peter Hummelgaardip (S) siunnersuutini, ‘Straf og forebyggelse i et trygt samfund’ (Inuiaqatigiinni toqqissisimaffiusuni pillaanerit pinaveersaartitsinerillu, aaqq.) saqqummiuteqqammerpaa. Taanna pinerlunnerit arlallit pillugit pineqaatissiissutit sukaterneqarnerinik Danmarkimilu parnaarussivimmik nutaamik sanaartortoqarnissaanik ilaatigut imaqarpoq.
Naalakkersuisut pilersaarutaat nutaat aamma Kalaallit Nunaannut sunniuteqassapput.
Kalaallit Nunaanni Pinerluttunik Isumaginnittoqarfiup maannakkut siunissamilu piffissami sivisuumi suliassaqarpallaarneranut aaqqiissutissatut Kalaallit Nunaanni pineqaatissinneqarsimasunut inissiisarfinni inissaqartitsiniarluni 70-inik nutaanik pilersitsisoqassasoq aaqqissuusseqqinnermi siunnersuutigineqarpoq.
Isertitsiviit matoqqasut ammasullu pineqarput, taakkualu pilersinneqarnissaat naatsorsuutigineqarpoq, ilaatigut pinerluuteqarsimasunut inissiisarfiit pioreersut allilernerisigut, aammali pinerluuteqarsimasunut inissiisarfiit nutaat pilersinnerisigut.
Politikkikkut kissaataangaatsiartoq
Naalakkersuisut nalunaarut qujamasuutigaat:
– Ingammik sualuttumik pinerluuteqarsimasut pillugit pineqaatissinneqarsimasut amerlanerusunik inissaqartinneqarnissaat Naalakkersuisut sivisuumik politikkikkut kissaatigisimavaat. Tamannali anguniarlugu pineqaatissinneqarsimasunut inissiisarfinni, ulikkaaqqareersuni, inissaqartitsisoqaqqittariaqarpoq, inatsisinik atortitsinermut naalakkersuisoq Naaja H. Nathanielsen (IA) oqarpoq.
– Taamaammat Kalaallit Nunaata kissaataasa tusarneqarnissaat qilanaareqaara, kiisamilu taama pisoqarpasimmat nuannaarutigaara. Aamma Naalakkersuisut piviusunngortitsinermut peqataatinneqarnissaat nuannaarutigalugulu qilanaareqaara, nangilluni oqarpoq.
Europami Siunnersuisoqatigiit Nuummi inissiisarfimmi nutaami ajornartorsiutit isornartorsioreeraallu pineqaatissinneqarsimasunut inissiisarfiit tatineqartut eqqartorneqaqqilerput. Tassani pinerlussimasut ilaat ineeqqani inummut ataatsimut naatsorsuussani ineqatigiiaartinneqarput.
