MISISSUINEQ NUTAAQ
Kalaallit Nunaanni Politiit ilungersungaatsiartut
Kalaallit Nunaanni Politiit 90 procentii pisumi suliaqarfimminni inunnut nalunngisaminnut tunngasunik suliaqarsimapput.
Thin Blue Line Denmark peqatigiiffiuvoq Danmarkimi, Kalaallit Nunaanni Savalimmiunilu politiiusimasut maannakkullu politiiusut timikkut tarnikkullu ajoqusersimasut ilaqutaallu tapersersornissaat pingaarnertut siunertaralugu suliaqarfiusoq. Taakku Kalaallit Nunaanni immikkoortortaqarfittaavat maajimi atulerpoq.
Assi: Thin Blue Line Denmark
Pinerlineqartut pinerluttullu inuttut ilisarisimasat, qaammammut arlaleriarluni pisut sakkortuut suliamullu qanippallaarneq pissutigalugu suliaqarsinnaannginneq.
Kalaallit Nunaanni politiit, politiinut ikiortit kommunefogedillu amerlasuut oktobarimi 2025-mi misissuinermi annertuumi, Thin Blue Linemit ingerlanneqartumi, peqataasut taama ulluinnarsiuteqarput.
Thin Blue Line Denmark tusagassiuutitigut nalunaarummini allappoq.
Thin Blue Line Denmark peqatigiiffiuvoq Danmarkimi, Kalaallit Nunaanni Savalimmiunilu politiiusimasut maannakkullu politiiusut timikkut tarnikkullu ajoqusersimasut ilaqutaallu tapersersornissaat pingaarnertut siunertaralugu suliaqarfiusoq.
Misissuinermit tigulaakkat.
THIN BLUE LINE DENMARK INFOGRAFIK 2025
Annaassinnaasimanngisanut pisuusutut misigineq
TUSAANNGA
Imminut toqunnissamik eqqarsaateqaruit Tusaannga attaveqarfigiuaannarsinnaavat.
Kinaassutsimik isertuussillutit akeqanngitsumik ulloq unnuarlu sianersinnaavutit: 80 11 80. SMS-ikkut: 1899.
Aperineqartut quliugaangata qulingiluat minnerpaamik qaammammut ataasiarlutik marloriarlutilluunniit sakkortuumik misigisaqarsimapput, affaallu inuk nalunngisartik pineqartillugu suliaqarsinnaanatik misigisimagaluarlutik allat ikiuisinnaannginnerat pissutigalugu sulisariaqartarlutik.
Misissuinermi peqataasut ilagaat 46-nik ukiulik Patrick, siornatigut Kalaallit Nunaanni politiiunikoq.
- Suliffinni ajornerpaaq tassaavoq imminut toquttut amerlassusaat, tassami illoqarfimmi inuit tamaasa ilisarisimagakkit. Ingammik sapaatip-akunnerata naanerani akissarsiffiup kingorna imigassartortut amerligaangata sulineq sakkortusigaangat.
- Illoqarfimmi politiituaalluni sapaatip-akunnerata naanerani imminut toqussimasunut toqoriarsimasunullu tunngatillugu nalunaartut arlaqarsinnaasarput. Nalunngikkaluarlugu pisuussuteqarnanga annaassimasinnaanngisakka pillugit suli misigisarpunga, tusagassiuutitigut nalunaarummi oqarpoq.
Nanertuut nipaatsumik nammataralugu
MISISSUINERMIT TIGULAAKKAT
- Kalaallit Nunaanni Politiini atorfillit siornatigullu atorfeqarnikut, politiinut ikiortit kommunefogedillu 134-t akissuteqarnerannik misissuineq tunngaveqarpoq.
- 90 procentit sulinerminni nalunngisaminnut tunngasunik suliaqarsimapput.
- 50 procentit inuk pineqartoq nalunngisarinera pissutigalugu suliamik suliaqarsinnaanngitsutut, allaniilli suliarineqarsinnaanngimmat, suliarisariaqarlugu misigisimapput.
- Sivisuumik sulisariaqarneq suliffimmilu tatineqarneq.
- Nakuusernerit, ajutoornerit, kinguaassiuutitigut atornerluinerit imminut toqunnerit pillugit suliat akulikitsut sakkortuut.
Politiit sulinerminni tatineqaqisut, sivisuumik pigaartuusartut inuillu allat peqatiginagit avinngarusimasumiitillutik sulisariaqartartut misissuinerup aamma takutippaa.
Taamaattumik Kalaallit Nunaanni politiit, politiit ikiortaat kommunefogedillu ajoqusersimasut ilaqutaallu pisariaqartumik ikiorneqarnissaat qulakkeerniarlugu Thin Blue Line Denmarkimiit suliniut annertusineqarpoq.
- Kalaallit Nunaanni politiit amerlasuut nanertuut nipaatsumik nammatarineqartartoq erseqqarippoq. Iliuuseqarfigineqartariaqarpoq.
- Taamaattumik sivisuallaamik pisariaqartitsisimasut amerlanerusut ikiorserneqarnissamik suliniut annertusivarput, Thin Blue Linemi Denmarkimi pisortaaneq Stinne Ølshøj oqarpoq.
Thin Blue Line Denmarkip isumaginninnermut siunnersortaasa Kalaallit Nunaanni politiit ajoqusersimasut arlallit maanna attaveqarfigilereerpaat, aamma ataasiakkaanut katsorsaasartunik qallunaatut kalaallisullu oqaluttunik pilersitsisimavoq.
Thin Blue Line Denmark Kalaallit Nunaanni politiit ilaqutaallu annertunerusumik ikiorsinnaajumallugit Danmarkimi nuna tamakkerlugu katersuiniartoqarpoq. Uani atuaruk.
