NALILIINEQ NUTAAQ
Kalaallit Nunaata nittartakkatigut pinerluffigineqarsinnaanerata aarlerinassusaa annertuvoq
Kalaallit Nunaannut nittartakkatigut saassussisoqarsinnaanera aamma isertorluni alapernaarsuisoqarsinnaanera aarlerinaatilerujussuuvoq, Center for Cybersikkerhed naliliivoq.
- Ingammik ransomwaremik saassussinerit suliffeqarfimmut ataasiakkaanut eqqugaasumut annertuumik kinguneqarsinnaapput. Aammali Kalaallit Nunaannut tamarmut inuiaqatigiinni suliassat pingaarutillit eqqugaappata, Center for Cybersikkerhed allappoq.
Leiff Josefsen
Kalaallit Nunaanni oqartussaasut suliffeqarfiillu nittartakkatigut alapernaarsuiffigineqariaraluarsinnaanerat pinerluffigineqariaraluarsinnaaneralluunniit ukiuni marlunni tulliuttuni ilimanaateqarluarpoq.
Center for Cybersikkerhed, Danmarkimi Illersornissamut tunngasuni paasiniaasartoqatigiivi, navianartorsiortitsinernik naliliinermini nutaami taama inerniliivoq.
Kalaallit Nunaata Issittup qeqqani inissisimanera taavalu nittartakkatigut saassussinerit ilungersunartut arlallit naliliinermi tunngavigineqarput. Center for Cybersikkerhedip KNR-imut 2023-mi decembarimi nittartakkatigut saassussineq, KNR-ip radiokkut tv-kkullu aallakaatitsineranik ajornartorsiortitsisimasoq, assersuutitut eqqaavaa.
Nittartakkatigut alapernaarsuisarneq eqqarsaatigalugu Ruslandi Kinalu aarlerinartorsiortitsinerat Center for Cybersikkerhedip eqqaavaa:
- Naalagaaffiit Ruslanditut Kinatullu ittut nunat allat sillimaniarnermut illersornissamullu politikkii immikkut soqutigisarpaat, immaqalu Kalaallit Nunaata naalagaaffeqatigiinnermut naalagaaffinnullu allanut attaveqarneranut tunngasunik ilisimasanik pissarsinissartik soqutigisinnaavaat. Nittartakkatigut alapernaarsuisoqarsinnaanera eqqarsaatigalugu suliffeqarfiit tamakkuninnga ilisimasallit pineqarnissaat aarlerinaateqarneruvoq.
Kinguneri ajorluinnarsinnaapput
Nittartakkatigut Alapernaarsuinerup paasissutissanik mianernartunik isertuussanillu katersinermik siunertaqartartut qarasaasiakkut pinerlunnerit aningaasarsiornissamut tunngassuteqarajupput, assersuutigalugu qarasaasiaq atorsinnaajunnaarseriarlugu aningaasanik akileeqqusisoqartarluni.
Saassussinerit taamaattut ransomware-mik taaneqartarput, ullumikkullu navianarnerpaatut isigineqarlutik.
Inuiaqatigiinni pingaarutilinnik sullissisut saassunneqarpata kinguneri ilungersunarsinnaapput. Center for Cybersikkerhed-ip Tysklandimi napparsimmaviit pingasut 2023-mi decembarimi nittartakkatigut saassunneqarneri innersuussutigai.
- Saassussinermi napparsimmaviup atortui arlallit, ilaatigut pinasuartumik immikkoortortaqarfik, sunnerneqarput, Center for Cybersecurity allappoq.
Aalerinartua piffissap sivikitsup iluani annertuserataannaasoq
Qarasaasiatigut saassussinerit aseruatiterinermik kinguneqartut Center for Cybersecurityp aamma misissorpai, taakkulu paasissutissanik aserorterinermik, pigisanik ajoqusiinermik allaallu inunnik ajoqusiinermik toqutaanermilluunniit kinguneqarsinnaasuupput.
Tassani ulorianartorsiortitsisoqarnera annikitsuararsuuvoq, allanngoriaannaavorli, ima naliliisoqarpoq:
- Kalaallit Nunaannut nittartakkatigut taama saassusisoqarsinnaanerata aarlerinartoqarnera piffissap sivikitsup iluani annertusisinnaavoq. Tassa Naalagaaffiup siunertaa allanngorpat.
- Assersuutigalugu Ruslandip Ukrainellu akornanni sorsunnerup kingunerisaanik isumannaallisaanikkut pissutsit Ruslandip NATO-llu akornanni sakkutooqarnikkut akerleriinnertut ingasatsikkaluttuinnarpata taama pisoqarsinnaavoq. Ingammik akerleriinneq Kalaallit Nunaannut Issittumulluunniit tunngassuteqarpat, Center for Cybersikkerhed allappoq.
Naliliineq uani atuarneqarsinnaavoq.
