Kalaallit takornarialerisut misigisassarsiortitsinerit pillugit ataatsimeersuarnermi peqataasut
Adventure Elevate North America 2025 Denverimi ingerlanneqarmat Kalaallit Nunaat USA-mut aallartitaqarpoq.
Kalaallit misilittakkanik avitseqateqarniarlutik niuernikkullu nutaanik attaveqalerniarlutik angalassisartut, angalanernik aaqqissuisartut allallu nunarsuarmit tamarmeersut naapippaat.
Assi: VisitGreenland
USA-mit toqqaannartumik timmisartuussisoqarsinnaalerpat Amerikami avannarlermiut amerlanerujussuit Kalaallit Nunaannut siunissami tikittalernissaat naatsorsuutigineqarpoq. Tamanna soorunami inuussutissarsiortunut nutaanik periarfissaqalersitsillunilu unammilligassaqartitsissaaq.
Ataatsimeersuarneq nunanit tamalaanit peqataaffigineqarpoq, tamatumuuna nunanit 46-nit peqataaffigineqarluni. Misigisassarsiorluni takornariarneq tassaavoq takornariaqarneq pinngortitamik, avatangiisinik, timip aalaneranik nunamilu misigisanik pingaartitsiffiusoq.
Kalaallit Nunaannit aallartitat Visit Greenlandimit ataqatigiissaarneqarput, taakkualu ilagaat Arctic Circle Treks, Hotel SØMA, Mikami Guest Houses, Travel by Heart, Two Ravens, Destination Disko Bay, Destination Arctic Circle, Explore North Greenland kiisalu Visit Greenland.
Siunissami tikeraartussanut attaveqaat
– Kalaallit Nunaannit suliffeqarfiit qulingiluat peqataanerat – piffissamik, nukinnik pimoorussinermillu atuinikkut - takornariartitsinerup siunissaanut aningaasaliinissamut piumassuseqarnermut uppernarsaataavoq. Suliniut nunani tamalaani niuerfinnut isernissamut periarfissanik nukittorsaataaginnarani, aammali inuussutissarsiornermut inuiaqatigiinnullu tikeraartunik tigusisussanut naleqarnerulersitsisinnaavoq, Visit Greenland naliliivoq.
Peqataasussat Visit Greenlandip NALIK Venturesillu ataatsimut angalanissamut tapiissuteqartarnissaannik qinnuteqarnissamut periarfissaqarput.
– Kalaallit nunat tamalaat akornanni Adventure Elevate-tut ittunik aaqqissuussanut peqataagaangamik siunissami tikeraartussanut suleqataasunullu attaveqarnermik pilersitsisarput – aamma Kalaallit Nunaata sunik isumaqarneranik takutitsisarput, Visit Greenland erseqqissaavoq.
Timmisartoq ilaasartaat siulleq New Yorkimiit Nuummut toqqaannartumik tikittussat arfininngornermi juunip 14-iani tikissangatinneqarpoq.
