Kalistat Lund: Inuit silap pissusiata allannguutaanit eqqugaanerpaat tusarnaarneqartariaqarput – aamma taarsiiffigineqartariaqarput
Naalakkersuisoq, Kalistat Lund, Bruxellesimi Green Overseas Climate Finance Forumimi oqalugiartut pingaarnerit ilagaat. Inuit nunat silap pissusaata allanngoriartornerata kinguneri qanimut misigisimagaluarlugit aningaasanik pissarsisinnaannginnerat oqlaugiaammini sammivaa.
Foto: Departementet for Landbrug, Selvforsyning, Energi og Miljø
Green Overseas Climate Finance Forum, oktobarip arfineq-aappaanit aqqarngata tungaanut Bruxellesimi ingerlanneqartoq EU-p aamma Tuluit Nunaata nunat imarsuaq ikaarlugu nunaatigisaasa nunallu immikkoortuisa silap pissusianut aningaasaliiffigineqarsinnaanerinut tunngasuuvoq.
Ukioq manna Silap Pissusianut Isumaqatigiissutip ataani silap pissusia pillugu isumaqatiginninniarnerit nunat peqataasut, “nunanut suliffissuaqarfiusunut” aamma “nunanut ineriartortitanut” agguarneqarput. Agguaanermi tassani nunat, Kalaallit Nunaattut ittut – aamma Nunat Inoqqaavi nunarsuarmit tamaneersut – pingaartumik silap pissusianut aningaasaliissutit pineqartillugit, silap pissusia pillugu isumaqatiginninniarnerni immikkoortiterinerit pioreersut avataaniittut eqqarsaatigineqartanngillat.
Naalakkersuisoq Kalistat Lund-ip Kalaallit Nunaanni – aammalu nunaniS peqataasuni allani – silap pissusiata allannguutaanik ullut tamaasa misigisaqartarnitta, illuatungaatigullu oqaluttuarisaanerput peqqutigalugu silap pissusianut aningaasaliissutinik pissarsisinnaannginnitta ajornartoorfiunera aallaavigaa.
Naalakkersuisoq Kalistat Lund oqalugiarnermini oqarpoq, nunanut, silap pissusia pillugu isumaqatiginninniarnerni immikkoortiterinerit pioreersut avataaniittunut silap pissusianut aningaasaliisernernik pilersitsinissamut piffissanngortoq.
- Nunat Green Overseas Climate Finance Forum-imut peqataasut assigiissuterpassuaqarput. Oqalugiaatinni assigiissutigut eqqartorpakka, aammalu ataatsimoorluta nipimik, nukittuunngorluni sakkortuunngorlunilu annertusisinnaasumik pilersitsinissarput, taamaalillutalu nunanit tamalaanit isiginngitsuusaaginnarneqannginnissarput neriuutigalugu oqaatigaara, Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund oqarpoq nangillunilu:
- Tamanna taamaallaat naligiimmik naapertuuttumillu allannguinikkut, aammalu naligiimmik naapertuiffiusumillu inuiaqatigiit akiuussinnaasunngorlugit nukittorsarnerisigut pisinnaavoq. Taamaattumik ataatsimoorluta silap pissusiata allannguutaasa kingunerinut ikiorserneqarnissarput noqqaassutigisariaqarparput. Silap pissusiata allannguutaasa ullut tamaasa sunnigaannut – tassalu inuiaqatitsinnut – iluaqutaasumik.
