Kangerlussuaq pillugu utaqqiisaagallartumik isumaqatigiissuteqartoqarpoq

Kangerlussuup mittarfiata ukiuni pingasuni atorneqarnera illersornissaqarfiup akilerniarpaa.

Ukiaru timmisartuussinerit Nuummut nuunneqarpata, Kangerlussuup mittarfianik atuineq Illersornissaqarfiup akilertalerniarpaa.

Illersornissaqarfiup Kangerlussuarmik atuinera pillugu tunngaviusumik isumaqatigiissutit arlallit atsiorneqareerput, taakkualu saniatigut maanna utaqqiisaasumik isumaqatigiissuteqartoqarpoq, tassa ukiuni pingasuni mittarfimmik atuinermut Illersornissaqarfiup akiliiumaarneranik.

Taama illersornissamut ministeri Troels Lund Poulsen folketingimi ilaasortamut Aaja Chemnitzimut (IA) allakkatigut akissuteqarluni ilisimatitsivoq.

Isumaqatigiissut ukiup naanerani atuutilissasoq, tassa timmisartuussinerit Kangerlussuarmit Nuummut nuunneqarpata, ministeri akissummini allappoq.

Isumaqatigiissut juunimi atsiorneqarpoq, pisariaqartunillu aningaasaleeqqinnissaq isumaqatigiissummi piumasaqaataavoq, Illersornissaqarfiup suliamut aningaasartuutai Folketingip akuerisassagai tamanna isumaqarpoq.

Isumaqatigiissutip utaqqiisaarutaanera erseqqissarneqarpoq:

- Eqqaaneqareersutulli isumaqatigiissut utaqqiisaarutaasumik isumaqatigiissutaavoq, Illersornissaqarfiummi Issittumi Atlantikullu Avannaani siunissami qanoq suliaqarnissaa paasinarsippat isumaqatigiissummik nutaamik taarserneqassasoq naatsorsuutigineqarmat, tamannalu 2024-2033-mut illersornissamut isumaqatigiissutip atuutilersinneqarnissaanut atatillugu paasinarsissaaq aalajangersarneqassallunilu, illersornissamut ministeri allappoq.

Powered by Labrador CMS