NUTARTIGAQ: Suli pujuliugaatsiartoq nalunaarutigineqarpoq
Kangerlussuarmi suliffeqarfik tallimanngornermi ullaakkut ikuallappoq. Politiit nunaqarfimmi innuttaasut kajumissaarpaat pujoq eqqumaffigeqqullugu.
Tallimanngornermi ullaakkut Kangerlussuarmi ikuallattoqarpoq.
Assiliisoq: Pilunnguaq Johansen
Malugiuk: Pujuliornerup suli annertunera pillugu nal. 12.00 allaaserisaq nutarterneqarpoq
Kalaallit Nunaanni Politiit Kangerlussuarmi suliffeqarfik ikuallattoq tallimanngornerup ullaavani nalunaaqutaq 06.06 nalunaarfigineqarput.
Politiit qatserisartullu sumiiffimmiittut ikuallattorlu qaminniarsaralugu pigaartut pisortaat Poul Kreutzmann Sermitsiamut oqarpoq.
Ikuallattumik assilisat inuit nittartakkatigut naapittarfiini takuneqarsinnaapput ikuallattoq pujuliorujussuartoq.
Qatserisartut pisortaata nunaqarfimmi innuttaasut ikuallattumit pujuliorneq eqqumaffigeqqullugu, igalaat allallu matoqqateqqullugit kajumissaarpai.
Sumiiffimmit nalunaarutigineqartut kingulliit naapertorlugit ikuallattoq nunaqarfiup meeqqerivianut pujuliorpoq, taamaattumillu meeqqerivik ikuallattup qaminneqarnissaata tungaanut matoqqatinneqarnissaanik politiit qinnuigisimavaat.
- Ikuallatsitsinerunersoq imaluunniit ajutoorneranit ikuallattoqarnersoq naluarput, pigaartut pisortaat oqarpoq.
Pujuliornera suli annertusoq
Kalaallit Nunaanni Politiit Facebookikkut ulloqeqqanngitsiartoq paasissutisseeqqipput. Pujuliornera suli sakkortusoq politiit nalunaarutigaat:
- Kangerlussuarmi Mini Markedimi suli ikuallattoqarpoq, sakkortuumillu suli pujuliorluni.
- Innuttaasut piffiup qanigisaani najugallit qinnuigissavagut igalaat matullu matoqqaqqullugit. Piffiup nalaani najugaqaruit ernumallutillu, politiinut sianersinnaavutit oqarasuaat 701448, politiit allapput.
