Illersornissamut ministerip Troels Lund Poulsenip, Venstre, danskit illersornissaqarfiata Kangerlussuup mittarfiata atuunnarnissaanut aningaasartuutit ukiuni pingasuni atuuttussat Naalakkersuisunut juunimi isumaqatigiissutigai.
Illersornissamut ministerip folketingimut ilaasortamut Aaja Chemnitzimut Inuit Ataqatigiinneersumut akissummini erseqqissarpaa isumaqatigiissut piffissami killilimmi atuuttoq, Illersornissaqarfiullu Issittumi Atlantikullu Avannaani siunissami qanoq suliaqarniarnera erseqqissippat isumaqatigiissummik nutaamik taarserneqarnissaa naatsorsuutigineqartoq. Tamanna aatsaat 2024-33-mut illersornissamut isumaqatigiissut atuutilersinneqarpat paasinarsissaaq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit taamaallaat atuarneqarsinnaapput.
Atuarluarna.
Illersornissamut ministerip Troels Lund Poulsenip, Venstre, danskit illersornissaqarfiata Kangerlussuup mittarfiata atuunnarnissaanut aningaasartuutit ukiuni pingasuni atuuttussat Naalakkersuisunut juunimi isumaqatigiissutigai.
Sermitsiami allaaserisaq §37
naapertorlugu apeqqummik
kinguneqartoq
Qeqqata Kommuniani borgmesteri Malik Berthelsen Sermitsiami tallimanngornermi maajip pingajuanni saqqummertumi apersorneqarpoq. Nuummi mittarfissap ammarneqarnerata kingorna Kangerlussuarmi kommunip akileraarutitigut isertitarisimasaanik annaasaqarnerup taarsiivigineqarnissaa eqqortuusoq naleqquttuusorlu taanna isumaqarpoq.
Naleqqameersup Hans Enoksenip allaaserisaq atuareerlugu § 37 naapertorlugu apeqquteqarpoq.
Annaasaqaatinut taarseeqqusisoqarnersoq aningaasallu qanoq amerlassuseqarnersut Aningaasaqarnermut akileraartarnermullu naalakkersuisoqarfiup ilisimanngilaa.
Akileraartarnermullu naalakkersuisoqarfiup naatsorsorsinnaanngilaa kommunip Kangerlussuarmit akileraarutitigut isertitai qanoq amerlatiginersut.
Namminersorlutik Oqartussat suliffeqarfissuit marluk, Air Greenland aamma Mittarfeqarfiit, akileraarutinut A-nut 15,8 millionit koruuninik nalunaarutigaat, taakkunannga 9,8 millionit koruunit Qeqqata Kommunianut kommunimut akileraarutitut ingerlateqqinneqarlutik.
Kangerlussuarmi innuttaasut Atlantikoq qulaallugu timmisartuussisarnerup unitsinneqarnera pillugu ilisimatinneqarsimanersut Hans Enoksenip paaserusuppaa.
Ineqarnermut attaveqaasersuutinullu naalakkersuisup Hans Peter Poulsenip, Siumut, Kangerlussuarmit Atlantikoq qulaallugu timmisartuussisarnerup unitsinnissaanik pisortatigoortumik aalajangiisoqarsimannginnerarpaa:
– lngerlatseqatigiiffiit niuernermik tunngaveqartut Kangerlussuarmut aamma Kangerlussuarmiit angallaviit suut pilersinniarnerlugit namminneerlutik aalajangissavaat.
Illersornissamut ministerip folketingimut ilaasortamut Aaja Chemnitzimut Inuit Ataqatigiinneersumut akissummini erseqqissarpaa isumaqatigiissut piffissami killilimmi atuuttoq, Illersornissaqarfiullu Issittumi Atlantikullu Avannaani siunissami qanoq suliaqarniarnera erseqqissippat isumaqatigiissummik nutaamik taarserneqarnissaa naatsorsuutigineqartoq. Tamanna aatsaat 2024-33-mut illersornissamut isumaqatigiissut atuutilersinneqarpat paasinarsissaaq.
– Isumaqatigiissutaagallarpoq, isumaqatigiissummilu aningaasartuutit Folketingimi Aningaasaqarnermut Ataatsimiititaliamit akuerineqaqqaartussaapput, taannalu ukiup ingerlanerani allakkiamik saqqummiivigineqassaaq. (Ministeri aningaasaliissutinut aalajangersimasunut inatsimmi ilanngunneqarsimanngitsunut aningaasanik qinnuteqartariaqarpat, tamanna Aningaasaqarnermut Ataatsimiititaliamut allakkiamik saqqummiussinikkut pisinnaasartoq, aaqq.)
Ukiunut pingasunut isumaqatigiissummi aningaasat qanoq amerlatiginersut Troels Lund Poulsenip Aaja Chemnitzimut akissummini eqqaanngilaa.
– Illersornissaqarfik ukiuni pingasuni tulliuttuni Kangerlussuup atornissaanut qanoq akiliuteqassava?
– Qanoq amerlatiginersut ilisimanngilara, Aaja Chemnitz Sermitsiamut oqarpoq, Troels Lund Poulsenimulli apeqqutigeqqippaa qanoq amerlatiginersut paasiniarlugu.
Sermitsiap illersornissamut ministerimut aningaasat qanoq amerlatiginersut apeqqutigaa, allaaserisalli matuma naammassineqarnerani suli akissuteqarfigineqarsimanngilaq.
Uagut suliassarinngilarput
Isumaqatigiissutaagallartoq, aningaasat qanoq amerlatigineri ilisimaneqanngitsumi akuerineqanngitsumilu, Kangerlussuup mittarfiata aningaasaqarnikkut siunissaanik nalorninartorsiortitsinermik annertusititsivoq.
– Isumaqatigiissut ukiup naanerani atuutilertussaavoq, tassa Atlantikoq qulaallugu timmisartuussinerit Kangerlussuarmiit Nuummut nuunneqarpata, Troels Lund Poulsen oqarpoq.
Timmisartortitseqatigiiffilli Air Greenland takornarialerisorlu namminersortoq Albatros Arctic Circle 2025-mi aasakkut Københavnimiit Kangerlussuarmut 62-eriarlutik Atlantikoq qulaallugu timmisartuussisoqarnissaanik pilersaaruteqarput.
Suliffeqarfiit taakku marluk isumaqatigiissutip imarisai – aamma Kangerlussuup 2025-mi mittarfittut atorneqarnissaanut Mittarfeqarfinnut akiliutissat – sukumiisumik oqaatigiumanngilaat.
Troels Lund Poulsenilli erseqqissarpaa Kangerlussuup sakkutuujunngitsunut atorneqarnissaa Illersornissaqarfimmut suliassaanngitsoq. Kalaallit Nunaata mittarfik suli pigaa, Mittarfeqarfiillu nunatta karsianit kiffartuussinissamik isumaqatigiissuteqarlutik suli ingerlappaat.
Illersornissamut ministerip, Naalakkersuisut Múte B. Egedep aamma Erik Jensenip illersornissaqarfiup Kangerlussuup atuinnarnissaa pillugu sinaakkutissatut isumaqatigiissut 2023-mi apriilip 24-anni atsiorpaat:
– Innuttaasunut timmisartuussinerit, nunat tamalaat akornanni timmisartuussinerit ilanngullugit, aningaasartuutit Illersornissaqarfiup akisussaaffiginngilai, isumaqatigiissummi aalajangersakkami allassimavoq.
- Kinali akiliissava?
– Atuisut, tassa timmisartortitseqatigiiffiit, akiliissapput, ineqarnermut attaveqaasersuutinullu naalakkersuisoq Hans Peter Poulsen, Siumut, oqarpoq.
Akiligassaq inuttaqanngitsoq
Mittarfeqarfiit pillugit inatsisissatut siunnersuutip 2022-meersup oqaaseqaataani atuarneqarsinnaavoq Kangerlussuarmi nunap immikkoortuani mittarfittut atorneqarneranut kiffartuussinissamik isumaqatigiissut ukiumut 105 millionit koruuninik akeqassasoq, Kangerlussuarlu Atlantikoq qulaallugu mittarfittut atorneqassappat kiffartuussinissamik isumaqatigiissut ukiumut 158 millionit koruuninik akeqassasoq.
Tassa 53 millionit koruunit atuisut akilissavaat.
Air Greenland kisiartaalluni Københavnimiit 2025-mi 62-eriarluni timmisartuussisassalluni maannamut nalunaarutigaa.
Kangerlussuarmi mittarfiup nunap immikkoortuini aqqutinut kiffartuussinissamut isumaqatigiissummut akiliutissanngorlugit aningaasanut inatsimmi 2025-mut atuuttussami 102 1⁄2 millionit koruunit immikkoortinneqarput, Naalakkersuisullu Kangerlussuup 2025-mi Atlantikoq qulaallugu angallannermut ammatinneqarnissaanik Mittarfeqarfinnut kiffartuussinissamut isumaqatigiissuteqanngillat.
Tamanna Naleqqap siulittaasuata Pele Brobergip tupigusuutigaa.
– Mittarfeqarfiit kiffartuussinissamut isumaqatigiissusiorfigineqarnikuunngitsut Air Greenland aamma Albatros Arctic Circle 2025-mi Atlantikoq qulaallugu timmisartuussinissaq pillugu tusagassiuutitigut nalunaaruteqarunik, Kangerlussuarmi mittarfiup Atlantikoq qulaallugu mittarfittut atorneqarnissaanut akiligassaq kimit akilerneqassanersoq inuttalinngilaat, Pele Broberg Sermitsiamut oqarpoq.
Kangerlussuup mittarfiata iluarsaanneqarnerata kingorna Illersornissaqarfimmit atorneqalernissaanut Atlantikorlu qulaallugu timmisartuussisarnissamut ammatinneqarnissaanut inuiaqatigiit aningaasaqarnerannut sunniutissai immikkut nalilersuisoqarsimanngitsut Naalakkersuisup Hans Peter Poulsenip Pele Brobergimut akissummini eqqaavaa.
– Air Greenland aamma Albatros Arctic Circle 2025-mi Atlantikoq qulaallugu timmisartuussinissamik pitsaasumik siunertaqaraluartut aqqut ammassanngilaat, Pele Broberg oqarpoq.
– Aqqut taanna marsimi 2025-mi ammarneqarsinnaasoq ilimaginngiliuk?
– Naamerluinnaq.
– Air Greenlandip timmisartuussinissaa kikkut unitsissavaat?
– Naalakkersuisup. Inatsisit mittarfiliornissamut tunngasut 2018-imeersut, 2022-mi Mittarfeqarfiit 2024-milu aningaasanut inatsisip Nuummi mittarfissuaq ammarpat Kangerlussuup Atlantikoq qulaallugu mittarfittut atorneqarunnaarnissaanik aallaaveqarput. Taamaappat naatsorsuutigaara Naalakkersuisut inatsisit atuuttut malissagaat, Pele Broberg oqarpoq.