2025-mi kaaviiaartitat 5,7 milliarder koruuningajaagaluartut ingerlatsinermilu sinneqartoorutit 299 millionit koruuniugaluartut Royal Greenland A/S-ip akileraarutit ilanngaatigereerlugit angusai 107 millionit koruuninik amigartooruteqarfiupput.
Tassa amigartooruteqangaarneq, ilaatigut piginnittup Namminersorlutik Oqartussat Naalakkersuisullu siuttoralugit maluginiarsimasaat. Royal Greenlandimi ataasinngornermi maajip 18-iani ataatsimeersuartoqassaaq.
Royal Greenland 2025-mi ukiut pingasujussaannik amigartooruteqarpoq.
2024-mi akileraarutit ilanngaatigereerlugit amigartoorutit 265 millionit koruuniullutillu 211 millionit koruuniusimapput.
Kisitsisit taakku 2025-mut naatsorsuutini Royal Greenlandip ukioq manna maajip sisamaani nassiussaani takuneqarsinnaapput.
Royal Greenlandip ukiumoortumik naatsorsuutit maajip sisamaani saqqummiunneqartut pillugit tusagassiutitigut nalunaarummi akileraarutit suli ilanngaatiginagit 6 million koruuninik sinneqartooruteqarsimalluni erseqqissarpaa. Tusagassiutitigut nalunaarummi amigartoorutit 107 millionit koruuniusut eqqaaneqanngillat.
Chilemi 189 millionit koruuninik nalikilliisoq
Ukioq manna akileraarutit suli ilanngaatiginagit angusat - 6 millionit koruuniusut - Kalaallit Nunaanni Canadamilu toqqaannartumik aallaaveqanngitsunit malunnaatilimmik sunnerneqarput. Royal Greenlandili ukiut aappassaat tulleriisiinnarlugit pingaarnertut niuernermi malunnaatilimmik siuariarpoq, tamannalu ineriartornerup ingerlateqqinnissaanut tunngavissaalluarpoq.
Aqutsisoqatigiit 2025-mut ukiumoortumik nalunaarusiami taamatut allapput, ilaatigut Chilemi nalikilliliinermik sunnerneqartumik.
Royal Greenland Chilemi ingerlatsinermi amigartooruteqarfiusup tuniniarneqarnissaa eqqarsaatigalugu suliaq aallartissallugu siorna aalajangerpoq.
Nalunaarusiaq naapertorlugu piserusussinnaasut oqaloqatigineqarsimapput. Royal Greenlandilli 2025-mut naatsorsuutit naammassimmagit pisisussanik pituttuisumik isumaqatigiissuteqartoqarsimanngilaq.
Taamaammat Royal Greenlandip Chilemi niuernermi pissarsiassai, imaluunniit taarsigassai, 189 millionit koruuniusut Royal Greenlandip 2025-mut naatsorsuutaani allassimapput, ukiumoortumik nalunaarusiami tamanna atuarneqarsinnaavoq.
Siusinnerusukkut allaaserisatsitut ukiut naatsorsuusiorfiusut kingulliit Royal Greenlandip nunani allani suliffeqarfiutaasa annersaat, Chilemi suliffeqarfik, aningaasanik atuiffiungaatsiarsimavoq.
Royal Greenland Chilemi 2023-mi 85 millionit koruuninik amigartooruteqarpoq. Suliffeqarfissuup Chilemi niuernermini akiitsui 2024-mi 220 millionit koruuninik nalikillineqarput.
Norgemi saattuarniut tuniniarneqartoq
Norskit saattuarniutaat Arctic Opilio, Royal Greenlandip Norgemi suleqataanit Bent Are Korneliussenimit Tromsømeersumit pigineqartoq, tuniniarneqarpoq. Aalisariutip saattuarniarnissamut akuersissutini annaasimavaa.
Assi: Leiff Josefsen
Royal Greenlandip Norgemi saattuarniarnini unitsissallugu norskerlu suleqatini, umiarsuaatileqatigiiffimmik piginnittoq Bengt Are Korneliussen, suleqatigiunnaassallugu siorna aalajangerpoq.
Taassuma umiarsuaateqarfik Maniitsoq AS, aalisariummik pisoqqamik saattuarniarnissamut akuersissummik annaasaqarsimasumik piginnittoq, pigaa. Taamaalilluni niueqatigiinnissamut tunngavissaaruppoq.
- Tamanna alianarpoq. Norgemi suleqatitsinnut Bengt Are Korneliussenimut Royal Greenlandimullu. Pinngitsoortikkusussimagaluarpara.
Preben Sunke, taamanikkut Royal Greenlandimi pisortaaneq maannalu siulersuisuni siulittaasup tullia, siorna oktobarip arfernani Sermitsiami eqqartuussiviup Hålogalandi Lagmannsretip Norgep avannaani Tromsømiittup aalajangiinera pillugu oqaaseqarluni taama oqarpoq.
Aalajangerneq tamanna Royal Greenlandip suleqataanut, umiarsuaatileqatigiiffimmik Tromsømeersumik piginnittumut Bent Are Korneliussenimut, inuussutissarsiutigalugu saattuarniarneq pillugu akuersissutaarunnermik kinguneqarpoq. Pisassinneqaqqissinnaanngilaq.
Umiarsuaatileqatigiiffiup Royal Greenlandillu Maniitsup saattuarniutaa, Royal Greenlandip ukiut ingerlaneranni taarsigassarsinikkut aningaasalersortarsimasaa, sivisuumik tuniniarneqarsimavoq.
Royal Greenlandip taassumalu akornanni niuernikkut suleqatigiinneq eqqartuussiviup aalajangiinerata kinguneranik tunngavissaaruppoq, Kalaallit Nunaanni aalisakkerinermik suliffeqarfissuaq inerniliivoq. Saattuarniarnermik suliniut suleqatigiinnerpullu, taamanikkut allaaserisatsitut, annaasaqarfiupput.
Saattuarniut Norgemi tunineqarpat qanoq annaasaqartoqassanersoq Royal Greenlandip 2025-mi ukiumoortumik nalunaarusiaani allassimanngilaq.
Sermitsiap paasissutissaatai naapertorlugit Royal Greenland ukiuni arlalinni kalaallit norskillu suleqatigiinneranni millioninik marlunnik, immaqa pingasunik kisitsisitalinnik annaasaqarsimavoq.
Tysklandimi immikkut akileraartussanngortoq
Royal Greenlandip 2025-mut ukiumoortumik nalunaarusiaa naapertorlugu akileraarutit ilanngaatigereerlugit angusat Tysklandimi akileraartarnermut oqartussanit aalajangerneqartumit, suliffeqarfissuup Tysklandip avannaani Wilhelmshafenimi tunisassiorfiata 2013-imi tunineqarneranut atatillugu aalajangiiffigineqarsimasumit, pingaarnertut sunnerneqarput.
Royal Greenland Tysklandimi akileraartarnermut oqartussat 68 million koruuninik akileraarutinut akiliisussanngortissimagaat ingerlatseqatigiiffik allappoq.
Royal Greenlandip akileraartarnermut oqartussat isumaqatiginngilai, aalajangiinerlu suliareqqitassanngortillugu. Suliffeqarfissuup suliami aalajangiisoqarnissaata tungaanut taamaammat aningaasat 2025-mi immikkoortikkallarpai.
Pingaarnertut ingerlatsinermi siuariartorluarneq
- Suliassama pingaarnerpaartaraa Royal Greenlandip siunissami Kalaallit Nunaanni suliffeqarfittut
nukittuujujuaannarnissaa qulakkiissallugu, suliffissanik pilersitsilluni nunamullu naleqartitsilluni. Upperaara
aqqut eqqortoq ingerlavigigipput, Toke Binzer oqarpoq.
Foto: Oscar Scott Carl
Royal Greenlandip pingaarnertut ingerlatsinermi sinneqartoorutai 2024-mut sanilliullugit 2025-mi 299 million koruuninngorlutik 86 procentimik qaffariarput.
Siorna 300 millionit koruunit sinnerlugit aningaasaliisoqarpoq. Tamanna siunissami ineriartornissaq unammillersinnaassuseqartuarnerlu qulakkeerniarlugit pivoq.
Ingerlatsinermi ukioq kingulleq angusat Royal Greenlandip oqaluttuarisaanerani pitsaanerpaat ilagaat. Ukiup ingerlanerani 300 millionit koruunit sinnerlugit aningaasaliissuteqartoqarsimavoq. Tamanna siunissami ineriartornissaq unammillersinnaassuseqartuarnerlu qulakkeerniarlugit pivoq.
- Tunisassiassanik ikinnerusunik suliaqaraluarluta kaaviiaartitat attatiinnarsinnaasimavagut. Tamanna niuerfinni akit qaffakkiartornerannik pissuteqarpoq, kisiannili annerpaamik aamma suliffeqarfimmi siunnerfilimmik
suliniuteqarnermik, aningaasartuutinik sukannersumik aqutsinermik unniuteqarluartumillu aaqqissuussinernik pissuteqarluni, taamaalilluta naggataatigut tunisassiassanit naleqarnerusumik pissarsisinnaalerluta, Royal Greenlandimi pisortaaneq Toke Binzer maajip sisamaani tusagassiutitigut nalunaarummi oqarpoq.
Nangilluni ima allappoq:
„Isertitaqarnerput aningaasaqarnikkullu toqqavipput nukittorsarsimavagut, tamannalu ukiuni aggersuni Nunatsinni tunisassiornermut aamma nunami tunisassiorfinnut aningaasaliinissarput eqqarsaatigalugu pitsaanerujussuarmik allaavissaqalersippaatigut.
Aaqqissuussineq pitsanngorsaanerlu
Ingerlatseqatigiiffik naapertorlugu aaqqissuussineq pitsanngorsaanerlu pissutigalugit Royal Greenland 2024-mi 196 millionit koruuninik amigartooruteqarsimasoq 2025-mi akileraarutit suli ilanngaatiginagit 6 millionit koruuninik sinneqartooruteqarpoq.
Suliffeqarfissuup suliniutit aningaasartuutinillu sipaarniutit arlallit 2025-mi ingerlappai, taakkulu ingerlatsinermut, suleqatigiinnermut minnerunngitsumillu aningaasaqarnermut sunniuteqarput.
Tassami 2024-mi 2025-milu aningaasartuutit katillugit 150 millionit koruunit sinnerlugit appartinneqarput.
Suliniutit ilaatigut makkuupput:
- Peqqumaasivimmiittuutinik ikilisaaneq
- Naleqarnerulersitsiniarnermi aqqut tamakkerlugu pilersaarusiornerup pitsaanerulersinneqarnera
- Kalaallit Nunaata avataani allaffissornermi immikkoortortaqarfiit ikinnerulersinneqarnerat.
- Digitalikkut sakkunik pilersaarusiornermik aalajangiinermillu oqinnerulersitsisunik atuineq annerusoq.
2026-mi aallartilluarneq
Royal Greenlandimi ukioq 2026 aallartilluarpoq, ilaatigut tunisassiat niuerfinni akii pitsaajuarnerat iluaqutigalugu.
Tamatuma saniatigut suliffeqarfiup ingerlalluarnissani akillu pitsaasut pingaartittuarpai, ukiumoortumik nalunaarusiami tamanna takuneqarsinnaavoq.
- Suliassama pingaarnerpaartaraa Royal Greenlandip siunissami Kalaallit Nunaanni suliffeqarfittut nukittuujujuaannarnissaa qulakkiissallugu, suliffissanik pilersitsilluni nunamullu naleqartitsilluni. Upperaara aqqut eqqortoq ingerlavigigipput, Toke Binzer tusagassiutitigut nalunaarummi oqarpoq.
Royal Greenland suliffeqarfiuvoq siulersuisuni siulittaasoq Niels Thomsen naapertorlugu niuernermi allanngorartuaannartumi ingerlalluartuarsinnaalluni patajaatsumik isumannaatsumillu tunngaveqarluni ingerlasoq.
Royal Greenland suliffeqarfittut niuernermi allanngorartuaannartumi ingerlalluartuarsinnaalluni patajaatsumik isumannaatsumillu tunngaveqarluni ingerlasoq Siulersuisuni siulittaasoq Niels Thomsen 2025-mi ukiumoortumik nalunaarusiami oqarpoq.
