Enosip allallu aalisariutitaarnissaat ajornannginnerulerpoq: - Takorloorpara aappaagu misiliissallunga
Tunumi Qaanaamilu aalisartut aalisariutitaarniarunik 85 procent tikillugu tapiiffigineqarsinnaalerput, namminerlu aningaasaliissutissaat 2 procentimut appartinneqarluni. Sumiiffinni taakkunani aalisarneq nukittorsarniarlugu tapiisarnermut periarfissat Naalakkersuisut allanngortippaat. Tasiilarmiu 23-nik ukiulik Enos Kristiansen aalisariutitaarnissamut neriullualersut ilagaat.
Enos Kristiansen allap umiatsiaa atorlugu siorna saarullinniarpoq. Namminerli umiatsiaqalersinnaaguni isaatitsinikkut iluaqutiginerusinnaallugu qularinngilaa.
Assiliisoq: Oscar Scott Carl
Enos Kristiansenip Naalakkersuisut nittartakkaminni marlunngormat maajip aqqaneq-aappaanni saqqummiussaat arajutsisimanngilaa.
Tassanimi nalunaarutigineqarpoq Tunumi Qaanaamilu aalisartut aalisariutinut tapiissuteqarfigineqartarnerat juunip aallaqqaataaniit pitsanngorsaavigineqartussanngortoq.
- Iluaqutaangaatsiassaaq Tasiilarmiunut aalisartunullu, Enos Kristiansen oqarpoq.
Tunumiut Qaanaarmiullu aalisartut aalisariutinut taperneqarniarunik 40 procentip tungaanut taperneqarsinnaanikuupput. Taperneqassagunik 10 procenti nammineq ileqqaarutigereersimasarlugu.
Juunilli aallaqqaataaniit 85 procent tikillugu taperneqarsinnaalissapput, namminnerlu aningaasaliissutissaat 2 procentimut apparneqarluni.
Enos Kristiansen aalisaqatinilu aalisaatinik uani aalisarput. Amuarfiilli automatiskit atorlugit pitsaassaqisoq Enos oqarpoq.
Assiliisoq: Oscar Scott Carl
Nammineq aalisariutitaarnissamut sinnattoq qanilliallappoq Tasiilarmiu 23-nik ukiulik Enos Kristiansen sanasuni maanna sulivoq, saarulliilli aggustimi takkuteqqippata aalisaqqilernissani siunertaraa.
Siorna aalisarnerani Sermitsiamiit Tasiilamiinnitsinni aalisaqataalu malinnaaffigisatsinnut ilaapput. Tassani saarullinniarneq aningaasatigut isaatitsilluarnarnerarlugu oqaluttuaraa.
Enos aappanilu ataatsimik meeraqarput, umiatsiartaarsinnaariarunilu ilaquttaminut pilersuilluarsinnaanerulissaaq.
- Takorloorpara ukiup tulliani misiliissallunga qinnuteqarlunga umiatsiamik, Enos oqarpoq.
Aammami nammineq umiatsiaqarluni kisimi aalisarneq imminut akilerluarsinnaanerusoq takorloorsinnaavaa.
- Maani aalisartut kisimiikkusuttarput, aningaasarsiat iluatigalugit, taakkua atortunik pisaarniassasut eqqarsaatigivara.
Saarulliit Tasiilap eqqaanit tammakaraangata qaleralinnik Sermiligaap Kuummiillu eqqaani sikunnginnerani misiliisarlutik Enosip oqaluttuaraa. Uani saarullinnik ammarterivoq.
Assiliisoq: Oscar Scott Carl
Aallarniutissaq 7.000 koruuni
QAANAAMI TUNUMILU TAPIISARNERMUT MALITTARISASSAT
Juunip aallaqqaataani 2026-mi atuutilersussat:
- Angallatit 6 aamma 9,5 meterit akornanni angissusillit 85 % tikillugu taperneqarsinnaapput. Nammineq aningaasaliissutissat 2 %-iussallutik.
- Angallatit 9,5 meterit sinnerlugu angissusillit 60 % tikillugu taperneqarsinnaallutik. Nammineq aningaasaliissutissat 5 %-iussasut.
Maajip 31-ani 2026-mi atuukkunnaartussat:
- Angallatiniit 6 meteriniit qummut, aamma 9,5 meteri sinnerlugu, 40 % tikillugu taperneqarsinnaaneq.
- Nammineq aningaasaliissutissat 10 %.
Tapiissutit allannguiffigineqarnerani nammineq aallarniutissaq 2 procentimut apparneqarpoq. Assersuutigalugu umiatsiaq motoorilik atortulersoriigarlu katillugit 350.000 koruuneqarpat nammineerluni siuleqqutatut akiliutissaq taamaallaat 7.000 koruuniussaaq.
Aalisarnermut tapiissutinik iluatsitsigaanni 297.500 koruunit tapiissutigineqarpat, sinneruttoq taarsersorneqarsinnaalluni. Taamaammat qinnuteqarnissani orniginartippaa.
- Pilerinarnerulerpoq, Enos Kristiansen.
Umiatsiarlu suna pileriginerlugu takorluuillattaalereerpoq.
- Poca 770 eqqarsaatigineqarsinnaavoq.
Mikinerusorli aamma ajoriffissaqartinngilaa.
- Aamma Poca 600 pilerinarpoq, Enos Kristiansen oqarpoq.
