Misilitsinnissaq annilaangagineqaleraangat

– Isumakulunneq timip aarlerinartoqarneranut kalerrisaarutitut atortarpaa. Pissutsini ilungersunartutut ulorianartulluulluunniit misigisatsinni pissusissamisoortumik qisuariaataasarpoq. Amerlanertigut isumakulunneq iluaqutaasinnaavoq, eqqumanerulersittarmatigut, ukkassinerulersilluta aamma tatineqarnermi sukkasuumik naleqquttumillu qisuariarsinnaalertarluta. Misilitsinnissamut annilaanganeq eqqartorneqaraangat, tassaaginnarpoq misilitsinnermut atatillugu aarlerisaarinermut qisuariarneq. 

– Ilaannut kajumissinartarpoq nukissaqarnerulersitsisarluni aallussilluarnerulersitsisarlunilu, allalli ima annilaangatigisarput sapinngisaminnik takutitsinngitsoortarlutik, psykologi Caroline Lund Qinngornermilu ulluinnarni aqutsisoq oqarpoq. Qinngorneq meeqqat atuarfianni atuartunut psykoterapimik neqerooruteqartarpoq.

Tatineqarnermi angusaqarluarneq

Qinngorneq – Inuleriviup ataaniittoq – tarnip pissusaa pillugu aamma siunnersorneqarnissaq pillugu immikkoortortaqarfik - illoqarfinni ilinniarfiusuni tallimani immikkoortortaqarpoq.

Caroline Lund Sisimiuni najugaqarpoq ilinniartunillu internet atorlugu aamma orninneqarluni oqaloqateqartarluni.

– Pingaaruteqarpoq erseqqissassallugu misilitsinnissamut annilaanganeq ajornartorsiutaanngitsoq. Tatineqarnermi angusaqarluartariaqarnermut tamanna pissusissamisoorpoq. Ilinniartut amerlasuut misilitsinnissamut annilaangasarput, tamannalu nalinginnaavoq — qanorluunniit piareersarsimalluartigigaluaraanni. Misilitsinnerit amerlanngitsunit nuannarineqartarput, tassami tassani nalilersortinneq pisarmat.

Caroline Lund naapertorlugu annilaanganeq peerluinnarniarnissaa anguniagaassanngilaq, misilitsinnissamulli annilaanganerup paasinissaa iliuuseqarfiginissaalu sulissutigisariaqarput, taamaalillunilu annilaanganeq sunniinerpaajujunnaarsinneqassalluni. 

- Misilitsinnissamut annilaanganeq annertuallaaleraangat piareersarnissamut akornutaasinnaasarpoq. Eqqarsaatit annilaanganermut samminerulersinnaasarput, suliassat eqqarsaatiginissaat ajornakusuulersarluni, taamaasisoqartillugu suliassanik aallussisinnaanissaq ajornakusoornerulersarpoq.

Eqqarsaatit ajugaaffiginiarneqartariaqartut

Misilitsinissamut annilaanganeq akiorniarlugu iliuuserineqarsinnaasut pitsaanerpaat ineriartortinnissaat pingaaruteqarpoq, annilaanganerup aqussinnaanissaa aqutsisuutilinnginnissaalu anguniarlugu.

– Misissuinerit takutippaat isumakulunnermut pissutaasoq ilisimalluarnerugaanni iliuuseqarfigiuminarnerusoq. Pingaaruteqarnerpaat ilagaat eqqarsaatinik eqqumaffiginninneq taakkuninngalu ajugaaffiginnissinnaalerneq. Eqqarsaatit misigissutsinik, pissusilersoriaatsitsinnut iliuutsitsinnullu sunniuteqartunik pilersitsisinnaapput. Assersuutigalugu imminut isornartorsiornikkut imminut naammaginnginnermik pilersitsisinnaapput, imaluunniit misilitsinnermi ajorluinnartumik angusaqarnissaq kisimi eqqarsaataalersinnaasarluni. Eqqarsaatit taamaattut isumakululersitsisinnaapput timimillu eqqissisimajunnaartitsisinnaallutik, soorlu uummatikkut tilleruluttoornermik, naakkut anniarnermik, assaat kiagunnerulernerinik assigisaannillu. Tamatuma kingunerisinnaavaa atuakkanik atuarnissamik kinguartitsineq, piffissamik atorluaanani allamut saaqqajaaneq imaluunniit annertuallaamik piareersarpallaarneq. Ilaatigut aamma tamanna misilitsinnissamut peqataanngitsoornermik imaluunniit ajornerpaamik pisoqartillugu atuarnermik unitsitsinermik kinguneqarsinnaavoq, Caroline Lund oqarpoq.

Imminulli isornartorsiorneq nikallornartunillu eqqarsaqqajaasarneq allanngortinniarlugu sungiusartoqarsinnaavoq, taamaasiornikkut piviusorsiortumik eqqarsartaaseqalernermik taarserneqarsinnaalluni, tamannalu misigissutsinik, timip qisuariarneranik pissusilersorneranillu allannguisinnaalluni.

Ilisimassuseqarnermi diamantitut ittoq

Psykologimi ilisimassuseqarnikkut diamantitut naleqartigisutut eqqartorneqartartoq tassaavoq paasisimasaqassusermi sakkussaq, isumakuluuteqarnerup eqqarsaatit, misigissutsit, timip qisuariarnera pissusilersornerlu imminnut qanoq attuumassuteqarnersut paasinissaannut iluaqutaasartoq.

– Aamma isumakuluutit pillugit oqaloqateqarneq iluaqutaasarpoq. Qinngornermi oqartarpugut eqqarsaatit ajornakusoortut allanut oqaluttuarigaanni oqinnerulersartut. Tamatumunnga atatillugu ilinniartitsisut immaqaluunniit atuarfimmi pisortaq oqaluttuussinnaavat misilitsinnissamut annilaanganerit pillugu. Tamanna ilisimappassuk ilinnut toqqissisimanarsinnaavoq, taamaalillutit misilitsinnermi tamanna ilinniartitsisut eqqaamassammassuk.

Anersaartorluni sungiusarnerit

Aammattaaq annilaangajunnaartoqarsinnaavoq anersaartornerup sungiusarneratigut, timi eqqissisimanerulersarmat. Tamanna immaqa oqaluttualiaannaasutut nipeqarluni oqaatigineqaraluarpoq, misissuinerilli takutippaat tamanna sianiuteqarfimmut eqqissiallannartuusoq. Taassuma saniatigut piareersarluarnissaq pisariaqarpoq - atuagarsugarisimasat ilisimasaqarfiginerugaanni, angusaqarluarnissaq aamma angujuminarnerusarpoq.

– Misilitsinneqarnissamulli annilaanganerup annertuallaarnera pissutigalugu atuaqqissaarneq nuannaarnerlu akornuserneqarpallaarsimappata, assersuutigalugu misilitsinnissamut takkutinngitsoortarluni, taava ilinniagaqarnermut siunnersorti saaffigisariaqarpat imaluunniit Qinngornermi psykoterapeutimik ikiortissarsiorlutit. Ilinniartut ikiussallugit maani piareersimavugut, Caroline Lund oqarpoq.

Qinngorneq aamma ilinniagaqarnermut siunnersuisartunut internetikkut siunnersortitut supervisioniisartutullu aamma neqerooruteqarput, maajimilu sammisaq misilitsinnermi annilaangasarneq immikkut ukkataraat.

Inulerivik Mindhelper.gl-imi isumakulunneq pillugu internetikkut pikkorissartitsivoq, tassanilu aamma ulluinnarni eqqissisimanerulernissamut periutsit assigiinngitsut ilinniarneqarsinnaapput.

Allaaserisaq aviisimiit ilinniarneq pillugu sammisameersuuvoq, akeqanngitsumik una toorlugu atuarneqarsinnaavoq.