Kangerlussuarmut aqqut borgmesterimit nuannaarutigineqarpoq
Qeqqata Kommuniani borgmesterip Malik Berthelsenip Kangerlussuup mittarfittut ataannarnissaa nuannaarutigaa, aappaagulu timmisartuussiffiunerpaaffiusumi Københavnip Kangerlussuullu akornanni timmisartuussisoqarsinnaanissaa anguniarlugu isumaqatigiissusiortut iliuuserqarsimammata nersualaarpai.
Nuummit Københavnimut Kangerlussuaq aqqusaarlugu timmisartuussisoqartarnissaa aappaagu qulakkeerneqarmat, Qeqqata Kommuniani borgmesterip Malik Berthelsenip nuannaarutigaa.
Assiliisoq: Leiff Josefsen
Københavnip Kangerlussuullu akornanni aappaagu timmisartuussisoqartalernissaa Air Greenlandip aamma Albatros Arctic Circlep qulakkeermassuk, Qeqqata Kommuniani borgmesterip Malik Berthelsenip (S) nuannaarutigaa. Kangerlussuarmiimmi Københavnimut utimullu marloriarluni timmisartuussisoqartalerpat, Kangerlussuarmi takornariaqarnerup ineriartortinnissaanut periarfissatsialaavoq.
- Air Greenlandip Albatros-illu suleqatigiinnissamik isumaqatigiissuteqarneratigut Kangerlussuarmi takornariaqarnerup piujuaannarnissaa qulakkeerneqartoq isumaqarpunga. Sumiiffit assigiinngitsut tikinneqarsinnaaneri suleqatigiissutigineqarpata tamanna nunatsinnut pitsaasumik sunniuteqarumaartoq upperaara, Malik Berthelsen Sermitsiamut oqarpoq.
Silaannakkut aqqut, 2025-mi marsip 17-ianit oktobarip 16-ianut ammasussaq, angallaviit arlallit aqqusaarlugit takornariaqarnermik inerisaanissaa kiisalu ullaakkut unnukkullu Nuummit Kangerlussuaq aqqusaarlugu Københavniliarsinnaanermik Københavnimillu ualikkut angalanissamik periarfissanik nassataqassasoq naatsorsuutigineqarpoq.
Takornarianik sullissinermik suliffeqarfik ingerlalluartoq
Takornarianik sullissinermik suliffeqarfik ukiuni kingullerni 20-ni Kangerlussuup takornariarfittut ineriartornissaa anguniartuarlugu aalluppaa, ullumikkullu nunaqarfimmi suliffeqarfiit annerit ilagaat, 100-t missaannik sulisulik, tusagassiuutinut nalunaarummi ilisimatitsissutaavoq.
Malik Berthelsen isumaqarpoq Kangerlussuarmut atlantikoq qulaallugu attaveqarneq sulisut siunissaannik qulakkeeriinnanngitsoq, aammali Kangerlussuup takornariarfissatut neqeroorutigisinnaasaanik takornarianik maannakkut paasisaqarsimasunik tikisitsinissamut periarfissanik pitsaanerusunik pilersitsissasoq.
- Albatros Kangerlussuarmi nunarsuarmilu takornariaqarnermik misilittagaqarluarpoq, nunattalu avataaniit timmisartumik Kangerlussuarmut tikisitsisarnissaminut naammattumik nukittussuseqartoq isumaqarpunga, Malik Berthelsen oqarpoq.
- Kangerlussuup mittarfiata allaat heliportinnanngortinneqarsinnaaneranik oqaluttoqarsimaneraniit isumaqarpunga siunissamut isumalluarnissatsinnut pissutissaqaluarluta, ingammik ATV-inut aqqusinissap atulernissaa eqqarsaatigalugu, naggasiivoq.
