Timmisartumik aqqut nutaaq Kangerlussuarmut nutaarsiassatsialaavoq

Silaannakkut aqqut, 2025-mi marsip 17-ianit oktobarip 16-ianut ammasussaq, angallaviit arlallit aqqusaarlugit takornariaqarnermik inerisaanissaa kiisalu ullaakkut unnukkullu Nuummit Kangerlussuaq aqqusaarlugu Københavniliarsinnaanermik Københavnimillu ualikkut angalanissamik periarfissanik nassataqassasoq naatsorsuutigineqarpoq, taama timmisartortitseqatigiiffik takornarianillu sullissinermik suliaqarfik ataatsimut tusagassiuutinut nalunaarummi nalunaarput.

- Ukiuunerani angallanneq novembarip 28-anit 2025-mi marsip tungaanut ingerlasussaq piareersaleratsigu, 2025-p aasaanerani Dash 8-t pisarnermit nikerannginnerusumik angalanissaat pisariaqassasoq nalunngilarpoq, imarpik qulaallugu timmisartuussineq Kangerlussuarlu eqqarsaatigalugit. Taamaammat Albatros Arctic Circle kiisalu Qeqqata Kommuniata suliffeqarnermik ineriartortitsinermut suliffeqarfiutaa Arctic Circle Business oqaloqatigalugit aallartippavut, Air Greenlandip niuernermut ingerlatsinermi pisortaanera, Kasper Thomsen Rungfeldt, tusagassiuutinut nalunaarummi oqarpoq.

Pissutsit pitsaasut

Kangerlussuarmi mittarfik timmisartunut inuinnaat timmisartuinut anginerusunut atorneqarsinnaanera qanittukkut paasinarsimmat isumaqatigiissut piviusunngorpoq.

- Tamanna qulakkeerneqarmat, periarfissat takkussuupput. Kangerlussuup Københavnillu akornanni toqqaannartumik aqquteqarnissaa tunngavissaqarluartoq nalilerparput, aamma timmisartoq ingerlaqqiffiusinnaasunut allanut atorsinnaagatsigu. Nuummit Kangerlussuaq aqqusaarlugu Københavnimut ullaakkut unnukkullu angalasassaagut, Københavnimillu Kangerlussuarmut ualikkut angalasassalluta. Taamaalilluta angalanissamut neqeroorutivut nukittorsarpavut, unammilleqatigiinnermilu nukittunerusumik inissisimalissalluta, Kasper Thomsen Rungfeldt oqarpoq.

Albatros Arctic Circlep aqqummik piginneqataalersimanera pillugu nersualaarpaa.

- Neqeroorut upperalugulu aalajangeeqataaffigisimasinnaanngikkaluarpassuk piviusunngorsimassanngikkaluarpoq. Aningaasaleeqataapput, silaannakkullu aqqutip piviusunngortinneqarnissaanut ingerlallualernissaanullu tamanna tunngaviliisuvoq, Kasper Thomsen Rungfeld oqarpoq. 

Albatrosip pisortaa oqiliallattoq

Takornarianik sullissinermik suliffeqarfik ukiuni kingullerni 20-ni Kangerlussuup takornariarfittut ineriartornissaa anguniartuarlugu aalluppaa, ullumikkullu nunaqarfimmi suliffeqarfiit annerit ilagaat, 100-t missaannik sulisulik, tusagassiuutinut nalunaarummi ilisimatitsissutaavoq.

Albatros Arctic Circlemi pisortap Jørgen Larsenip Air Greenlandimik isumaqatigiissuteqartoqarnera oqiliallaatigaa.

- Kangerlussuaq maani najugaqartunut sulisunullu pingaarutilerujussuuvoq. Isumaqatigiissuteqarnitsigut sulisutta suliinnarsinnaanerat, nunaqarfittalu piujuarlunilu ineriartoqqissinnaanera qulakkeerparput. Tamassuma pingaaruteqassusaata nipituuliutigineranut nukippassuit atorpavut, tassami Kangerlussuaq tassaavoq nunatsinni takornarianik tikinneqartartut annerit tulliat. Kangerlussuaq takornarianut nunatsinni aamma sumiiffinnut allanut angalarusuttunut tikissallugu pitsaviuvoq, tassami Kangerlussuarmi takornariartut aamma Ilulissanut Sisimiunulluuniit ingerlasarput, Jørgen Larsen oqarpoq,  Kangerlussuarlu mittarfittut aqqusaartarfiinnartut atuuffeqarunnaarluni maanna takornariarfittut atuuffeqalernikuusoq tikkuarlugu.

Sermersuarmut angallassinerit saniatigut takornariartaatit sullittarpaat, taakkunani sulisut ilaasullu taartigiittarneri, taakkualu saniatigut unnuisarfiit Old Camp, Polar Lodge aamma Hotel Kangerlussuaq kiisalu neriniartarfiit Restaurant Roklubben Restaurant MuskOxilu pigisaraat.

Aqqut pillugu paasissutissat

• Aqqummi timmisartoq atorneqartussaq tassaavoq Jettime Boeing 737-800 180/189- inik ilaasoqarsinnaasoq, sapaatip-akunneranut marloriarluni piffissami 17. Marts – 16. Oktober 2025 timmisartuussisartussaq.

• Ataasinngornerit tamaasa timmisartoq Københavnimit nal. 16.30 aallartassaaq,

  Kangerlussuarmullu nal. 18.20 nunatta nalunaaqutaa malillugu mittassalluni.

  Minutsini 40-ni Kangerlussuarmeeriarluni nal. 19.00 Nuummut ingerlaqqitassaaq, Nuummut nal. 19.45 mittassalluni.

• Aqaguani marlunngornermi Nuummit Kangerlussuarmut nal. 7.45 aallartassaaq,

  tassanilu uninngalaariarluni nal. 9.10 Københavnimut aallartassalluni, nal. 16.40

  Danmarkip nalunaaqutaa malillugu mittassalluni.

• Sisamanngornerit tamaasa periuseq taannarpiaq atorlugu angalasassaaq,

  assigiinngissulli tassaassaaq, Nuummi unnuereerluni Kangerlussuup tungaanut nal. 19.30 aallartassagami, Kangerlussuarmilu uninngalaariarluni Københavnimut nal. 20.55 aallartassalluni, Københavnimut ullaassakkut Danmarkip nalunaaqutaa malillugu nal. 04.25 mittassalluni.