Kattuffiit akitsuineq sakkortuumik isornartorsioraat
KNAPK-p SIK-llu ikummatissap akiata marlunngornermi qaffanneqarnera ernummatigalugulu naammaginartinngilaat.
- Polar Oil maannakkut qaffaasoq aamma tupigaara, tassami nunarsuarmi orsussamut akit qaffakkiartunngimmata, Jess G. Berthelsen oqarpoq.
Foto: Leiff Josefsen
Sulisartut kattuffiata SIK-p aamma aalisartut piniartullu kattuffiata KNAPK-p ikummatissap ullumi akitsornera sakkortuumik isornartorsiorpaat.
Politikikkut sumiginnaasoqartoq sulisartut kattuffianni siulittaasoq Jess G. Berthelsen isumaqarpoq. Nunarsuarmimi niuernermi akit maanna appasinnerummata akitsuineq tupigusuutigaa.
- (..) qineqqusaarnerullu
nalaani qineqqusaartut pinngitsoqaratik neriorsueqattaarput maani
nunami inuuniarneq oqinnerulissasoq. Ilaatigullu
qineqqusaarnermi neriorsuutit ingasangaartarmata allaat
eqqarsarnarsisarluni aningaasat qilammit nakkaanersut.
- Qineqqusaartut
tamarmik neriorsueriarlutik inuuniarneq maani nunami
oqinnerulissasoq, maannakkut killormorluinnaq pisoqalerpoq, tassami
orsussaq 85 øremik ullumimiik qaffappoq, Jess G. Berthelsen tusagassiorfinnut nalunaarummut allappoq.
KNI Namminersorlutik Oqartussanit pigineqarpoq, suliffeqarfillu "KNI-mut ikummatissat akiinut sunniuteqartumik, ikummatissat qularnaarnerat akisunerummat" akitsuisoqartariaqartoq marlunngornermi ullaakkut nalunaarutigaat.
KNI-mit tamanna pillugu itisiliisoqanngilaq, siornatigulli paasissutissiissutigineqarnikuuvoq KNI piffissami sivisuumi ikummatissap akiata allanngujuissusianik qulakkeerisunik isumaqatigiissuteqartartoq.
Taamatut periaaseqarneq pissutigalugu Kalaallit Nunaanni 2021-miit 2024-mut akit nunarsuarmi niuerfinnut, ilaatigut Ukrainemi sorsunnerup kingunerisaanik akit qaffakkiartupiloorneranni, naleqqiullugit appasilluinnarput.
KNI-p akit siorna 60 øremik qaffappai, maannalu literimut 85 øremik qaffanneqarput.
Nunarsuarmi niuerfimmi akit appasitsitillugit akit qaffanneqarnissaat sooq pisariaqarnersoq KNI-mit itinerusumik tunngavilersuisoqarnissaa KNAPK-mi siulittaasup Nikkulaat Jeremiassenip aamma amigaatigaa.
Naalakkersuisullu aalajangernerat isornartorsiorpaa:
- Nunatsinni innuttaasut ajorsartunngortinneqarput, tassami uuliap sukuluiarneqanngitsup akia appasikkaluartoq ikummatissap akii qaffanneqarput. Naalakkersuisut pisussaaffitik iluamik atuarsimanngilaat, Nikkulaat Jeremiassen oqarpoq.
Isornartorsiuineq KNI-mit Naalakkersuisunillu akissuteqarfigineqarnissaa Sermitsiamit sulissutigaarput.
