Killilersuutit nutaat pissutigalugit Air Greenlandip timmisartuussinissai kinguaattoortut
Killilersuutit nutaat ilaasunut annertuumik sunniuteqassapput. Ilaat ullunik sisamaniit arfinillit pallillugit kinguaattooreersimapput.
Angallannermut Aqutsisoqarfik Nuummi mittarfimmut nutaamik killilersuuteqarpoq, taamaalillutik Nunatta iluani timmisartuussinerit ajornakusoornerulissapput.
Assi: Oscar Scott Carl
Angallannermut Aqutsisoqarfik Nuummi mittarfiup nalaani silaannakkut angallannermi killilersuutinik nutaanik qanittukkut atuutsitsilerpoq. Tamanna Greenland Airportsimut aalajangiinikkut pivoq.
Taama Air Greenland tusagassiuutinut nalunaarummi allappoq.
Isumannaallisaaneq timmisartuutileqatigiinni pingaarnerpaatinneqarmat Trafikstyrelsen oqartussaasutut maannakkorpiaq pisariaqartumik naliliisimammat paasilluarlugu, tamannali annertuumik kinguneqassasoq timmisartortitseqatigiiffik allappoq.
Air Greenlandip timmisartuussisarnera ima ingerlavoq, timmisartut amerlanersaat angallaffiunerpaamit – Nuummit – aallartarlutillu tassani naapittarmata. Taamaaliornikkut illoqarfiit nunaqarfiillu kiisalu nunanit tamalaanit timmisartuussinerit malillugit atassusiilluni ullormi tassani timmisartuussisoqarsinnaavoq.
Killilersuinerit nutaat malillugit Nuummi timmisartut nalunaaquttap-akunneranut amerlanerpaamik sisamat ingerlanneqassapput. Tassa imaappoq, timmisartut marluk tikillutillu marluk aallarsinnaapput, imaluunniit ataaseq tikillunilu pingasut aallarsinnaapput imaluunniit tikittoqarani sisamanik aallartoqarsinnaavoq.
Air Greenland siornatigut nalunaaquttap-akunneranut arfineq-pingasunik timmisartuussinermi ingerlataqartarsimavoq.
Taamaammat timmisartuussinermi pilersaarut kinguaattoortitsisumik ilaasullu unnuiffissaqartinneqartunik allanngortingaatsiarneqartariaqarpoq.
Nunatta iluani timmisartuussinerit eqqorneqassasut
Killilersuinerit nutaat ingammik Nunatta iluani angalanermik eqquissapput. Peqqussut sioqqullugu timmisartuvut Dash-8 ullaaralaakkut inissisimaffimminniit aallarsinnaapput, ataatsikkut Nuummut tikillutik, tassanngalu ataqatigiissaakkamik Atlantikoq qulaallugu nunallu immikkoortuinut timminissamut anngullutik.
Killersuinerit nutaat angallannikkut taamatut aaqqissuussinermik annertuumik killiliissapput. Saniatigut ingammik ornigassat Nuummut ungasissut killilersuinernit eqqugaassapput.
Silarluttoqarnera pissutigalugu kinguaattoornerit nunatsinni nalinginnaapput, maannali ilaasunik angerlaassinissaq Air Greenlandimut ajornakusoornerulissaaq.
Killilersuineq septembarip 22-ani erngerluni atuutilerpoq, Nuummilu ulluni marlunni silarlunnerata kingorna ilaasorpassuit maannakkut ulluni sisamaniit arfinilinni kinguaattoorlutik angalasussanngortinneqarput.
- Paasissallugu pingaartupilussuusimavoq ingerlatat ikilisinnerat Air Greenlandip angalanissamut pilersarutaasa naammassinissaannut taamaalillunilu sullitanik kiffartuussinitsinnut qanoq kinguneqassanersut. Maanna takusinnaavarput suliaq annertuupilussuussasoq angalanissamut pilersaarutit nutaamik katiteqqinniarnerat pilersaarutaaqqaartunut assingutinniarlugit, Air Greenlandimi ingerlatsinermut pisortaq Line Frederiksen oqarpoq.
Timmisartuussinernik ingerlatsinernik arfineq-pingasuniit amerlanerpaamik sisamanik ingerlatsisinnaalerneq malillugu sinerissamut Nuummullu ullormi tassani timmisartuussinissat 40 procentii pilersaarutit malillugit ingerlanneqarsinnaajunnaarput.
Nammineq akilikkamik unnuinerit amerlanerulissasut
Siunissami ilaasut amerlasuut unnuiffissaqarnissaq pilersaarutigisariaqalertussaavaat.
- Oqaatigisinnaalereerparput tamanna kiffartuussinermi ajorseriaataassasoq ingammik nunatta iluani aqqutini, sullitallu ilimagisariaqartassallugu unnuisariaqarnissartik apeqqutaalluni angalanerat sumi aallartillunilu naammassinersoq, Line Frederiksen oqarpoq.
Air Greenland maanna angalanissamut pilersaarutit allanngornerannik nassiussuivoq, aallarnissarlu sioqqullugu ullut 14 iluanni allanngortoqarnerani unnuinermut aningaasartutit Air Greenlandimit akilerneqassapput, tamatuma kingornagut tamanna sullitap nammineq akisussaaffigalugu.
Air Greenland Kalaallit Nunaanni attaveqaasersuutit sapinngisamik pisariaqanngitsumik ajorseriannginnissaat qulakkeerniarlugu timminissamut isumannaatsunik allanik nassaarniarluni Greenland Airportsimik suleqateqarpoq.
- Neriuppugut Air Greenland peqatigalugu timmisartornikkut isumannaallisaanermi allanik iluarsiissutinik pilersitsisinnaalluta, angalasunut kingunipilui sapaatit akunnerit sisamat tallimat tulliuttut annikillisarlugit, Greenland Airportsimi pisortaaneq Jens Lauridsen taama oqarpoq.
