Kinamik isumaqatigiissut nutaaq kalaallit avammut tunisassiornerannik siuarsaasinnaasoq
Danmarkip Kinallu isumaqatigiissutaat nutaaq aqqutigalugu aalisakkat nunatsinneersut Kinami niuerfissuarmi ajornannginnerusumik niuerutigineqarsinnaalissapput. Isumaqatigiissut kalaallit inuiaqatigiivinut periarfissatsialaasoq ministeri oqarpoq.
- Aalisakkat tukertitaanngitsut annikitsuinnarmik nioqqutigineqarput, taamaammallu Kinamiunit atuisunit piumaneqarluarput. Kinami niuerfiit angisoorsuupput, taamaammat periarfissaqarluarpoq, Danmarkimi inuussutissanut ministeri Jacob Jensen Ritzauimut oqarpoq.
Toqqorsivimmiit assi: Leiff Josefsen
Danmarkip Kinallu isumaqatigiissutaat nutaaq Beijingimi atsiorneqarpoq.
Danskit inuussutissanut ministeriat Jacob Jensen naapertorlugu isumaqatigiissut iluaqutigalugu aalisakkat avammut tunisat Kalaallit Nunaanneersut Kinami niuerutigineqartussat amerlineqarsinnaapput.
Ministeri maannakkut Danmarkimi nunatsinnilu inuussutissalerisut peqatigalugit Kinami avammut niuernermik siuarsaaqataavoq, isumaqatigiissullu Kalaallit Nunaannut periarfissatsialattut oqaatigaa.
Inuussutissalerinermut Naalakkersuisoqarfik naapertorlugu siornatigut malittarisassat naapertorlugit Kinamut tunisinnginnermi aalisakkat assigiinngitsut tamarmik immikkut akuerineqaqqaartariaqarnikuupput.
Akuersissutinik pissarsiniarneq pisariullunilu ukiut arlallit atorlugit suliarineqartarsimavoq, isumaqatigiissummili nutaami tamanna aaqqiivigineqarpoq, oqarpoq:
- Maanna Kalaallit Nunaannit aalisakkanik tukertitaanngitsunik Kinamut tunisinermi siornatigut akornutaasut piiarpavut.
- Tamanna kalaallit inuiaqatigiivinut periarfissatsialaavoq, taamaammat ministeritut kunngeqarfik tamaat sinnerlugu nuannaarutigiinnarsinnaavara, Jacob Jensen Ritzauimut oqarpoq.
Naatsorsueqqissaartarfik naapertorlugu aalisakkat Kalaallit Nunaanneersut 1,6 milliarder koruunit missaannik nalillit Danmark aqqusaarlugu Kinamut 2024-mi tunineqarput.
