Kisitsisit nutaat: Kangerlussuarmiit nuuttut amerlasut
Nuummi mittarfissuup atulernerata kingorna Kangerlussuarmi innuttaasut 20 procentingajaat nuussimapput.
Inuit 100-nit amerlanerusut Kangerlussuarmiit siorna septembarimiilli nuussimapput.
Assi: Leiff Josefsen
Innuttaasut 2025-p qaammataani pingasuni siullerni 193-inik amerleriarsimasut, taamaalillutik katillugit 56.735-iulersut Naatsorsueqqissaartarfiup 2025-mi apriilip aallaqqaataani innuttaasut amerlassusaat pillugit kisitsisaataasa takutippaat.
Ukiulli ataatsip ingerlanerani innuttaasut 131-nik ikileriarsimapput.
Kalaallit Nunaanni inunngorsimasut ukiup siulianut sanilliullugit 158-inik ikileriarput, maannalu 49.816-iullutik.
Taakku misissoqqissaaraanni kisitsisit soqutiginartut tupaallannartut takuneqarsinnaapput.
Tassa Kangerlussuarmiut qassiunerat. Mittarfissuup Nuummiittup atulernera Kangerlussuarmut qanoq kinguneqarsimanersoq.
2024-mi septembarimiit ukioq manna apriilip aallaqqaataata tungaanut inuit 533-niit 431-nut ikileriarsimapput. Tassa inuit 100-t sinnerlugit nunaqarfimmiit nuussimapput - tassa 20 procentingajaat.
Nuummi mittarfissuaq nutaaq novembarimi atulermat atlantikoq qulaallugu timmisartuussisarnerit siornatigornit Kangerlussuarmukartartut ikileriarujussuarput.
Nuuttut amerleriartut
Ukiup qaammataani pingasuni siullerni Kalaallit Nunaannut nuuttut nunamut allanut nuuttunit 86-inik amerlanerusut kisitsisit aamma takutippaat.
Takussutissaq naapertorlugu Kalaallit Nunaannut ukiup aallartinnerani tikittut nuuttuniit amerlanerukkajuttarput. Aasaaneranilu nuuttut hunnorujukkaajusarput tikittuniillu amerlanerusarlutik.
Ukiuni 30-ni kingullerni agguaqatigiissillugu ukiumut inuit 367-it Kalaallit Nunaanniit nuuttarput. Ukioq manna 1000-it sinnerlugit nunamut allamut nuussasut naatsorsuutigineqarput, 700-ngajaallu Kalaallit Nunaannukassangatinneqarlutik.
Aammattaaq Nuummi innuttaasut 20.000-inngorput, apriilip aallaqqaataani illoqarfiit pingaarnersaanni innuttaasut siorna ullormut tassunga sanilliullugit 129-nik amerlanerupput.
Kalaallit Nunaata iluani nutsertut ukiut siuliinisut amerlatigipput.
