Atassut: Naalakkersuisoqataanerput nalorninartorujussuarmiippoq

Inatsisartut sisamanngornermi novemberip tallimaani oqallinnerminni nunap karsiata 2025-mut naatsorsuutai oqaluuseraat.

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq, Nivi Olsen (D), illuatungiliuttunit tamanit, tassa Siumumit Naleqqamiillu, oqaluuserisami tassani ataatsimi, marloriarluni tatiginninnginnermik taasissutigineqaqqusissummik nittaavigineqarpoq. 

AAMMA ATUARUK:

Nunatta karsiata naatsorsuutaanik paatsiveerusimaarnartumik suliarinnittoqareersoq Atassut siulittaasoqarfimmut maalaaruteqartoq

Tassani Kalaallit Nunaanni Qimussertartut Kattuffiata, KNQK-p, 2025-mi nunap karsianit tapiissutinnattaavi ilaatigut pineqarput. Kukkunersiuinermut Ataatsimiititaliap isumaliutissiissutaani allassimasut naapertorlugit, Naalakkersuisut KNQK-p tapiissutit ilaat siunertanut atorsimanngikkaat ilisimavaat, kiisalu kattuffik 2025-mut naatsorsuutiminik suli tunniussinani nunap karsianit 2026-imi 250.000 koruuninik taperneqaqqissimasoq aamma allassimavoq.

Naalakkersuisup akisussaaffigisamini taama pinera, naalakkersuisoqatigiinni partiip Inatsisartuni ilaasortakinnerpaap, Atassutip, akueriuminaatsippaa. Naalakkersuisoqatiginniinnerlu siulittaasup maanna nalornissutigeqaa. 

Ippassaq pisut eqqarsaatigalugit partiimi siulittaasutut naalakkersuisoqatigiinnut peqataaneq eqqarsaatigalugu inissisimanerit sumiippa?

- Nalorninartorujummiippoq, unneqqarillunga oqassuunga.

- Taama ittumik pisoqarmat Bentiaraq (Ottosen, aaqq.) tunuartariaqarnikuuvoq. Assigiimmik pinnittussaatitaanermut naak periuseq? Taanna ippassaq takunngitsooratsigu uggornarami, Aqqalu C. Jeremiassen oqarpoq.

Bentiaraq Ottosen (A) naalakkersuisutut ukioq ataasinngulersoq matuma siornatigut nammineerluni tunuarpoq. Taassuma Sermitsiamut taamanikkut tunngavilersuutaanut ilaavoq, naalakkersuisutut siulimi suliniut aallartissimasaa aningaasartaqarsimanngitsoq kingornussimagini.

AAMMA ATUARUK:

Nivi Olsenip tatiginnikkunnaarnerit marluk anigorai

Atassut nuna tamakkerlugu sapaatit akunnerisa naaneranni kingullermi ataatsimeersuarpoq. Aqqalu C. Jeremiassen Atassutip tunuliaqutaasa naalakkersuisoqataaneq apeqqusinngikkaat, Sermitsiamut tamassuma kingorna oqarpoq. Taassuma naalakkersuisoqataaginnarnissartik naatsorsuutigalugu taamani aamma oqarpoq. Taamali oqarneq ullut tallimat qaangiuttut, tassa maannakkut, allarluinnarmiilerpoq.

Nivi Olsen tunuartariaqarnersoq akinngitsoq - assersuuteqartorli

Aqqalu C. Jeremiassenip Nivi Olsenip Naalakkersuisutut tunuartariaqaraluannginnera pillugu apeqqut, arlaleriarluni tusaraluarlugu toqqaannartumik akiumanngilaa.

- Suliat taama ittut assigiimmik pisussaaffiliisarput. Bentiaraq (Ottosen, aaqq.) suliamut taama ittumut tunuartariaqarnikuuvoq. Naak taava naalakkersuisoqatigiit iluanni naligiinneq? taanna aperaaq.

Naalakkersuisoqatigiinni partiit siulittaasui, Naalakkersuisut Siulittaasuat, Jens Frederik Nielsen (D), ulluni kingullerni Narsamut Qaqortumullu angalasoq, Nuummut tikeriarpat oqaloqatigiilaarnissaat Aqqalu C. Jeremiassenip pisariaqartillugu oqaatigaa. Partiilli siulersuisui sumilluunniit aalajangiigaluarpata taakkua isummernerat tusaassallugu aamma neriorsuutigaa.

Inatsisartut Siulittaasuat pakatsiffigigaa: Pisussaaffimminik uniuivoq

Inatsisartuni ippassaq oqallinnermi, Siumup Naleqqallu Nivi Olsenimik tatiginninnginnertik saqqummiutereeraat, nunap karsiata siornamut naatsorsuutai inaarutaasumik taasissutigineqarput. Taamaalilluni Atassut suliaq pillugu politikkiminik saqqummiussinanilu aperineqarnissaminut periarfissinneqanngilaq.

Inatsisartut Siulittaasuat, Kim Kielsen (ATT), suliaq taama ingerlanneqassasoq aalajangiisuuvoq. Tamannalu partiinut assigiinngisitsinerusoq, Atassutip siulittaasua isumaqarpoq. 

- Partiit sisamat oqaaseqareerneranni periarfissinneqanngilagut oqaaseqaatitsinnik saqqummiussinissatsinnut. Partiit sisamat imminnut apeqqarissaarfigilooreertut uagut qarsupinneqarpugut. 

- Tamat oqartussaaqataanerata aqqani partii qanorluunniit angissuseqaraluarpat isummagut annittussaatitaavagut, taanna oqarpoq.

Kim Kielsenip Atassutip oqaaseqaateqannginnissaanik aammalu immikkoortup suliarineqartup inaarutaasumik taasissutigineqarnissaanik aalajangernera, ataatsimiinnermi aqutsisup suliassaminik uniuineratut nalilerneqarpoq.  

- Pisussaaffimmik uniuinertut isigaarput, Aqqalu C. Jeremiassen oqarpoq.

Sermitsiaq Inatsisartut Siulittaasuannik, Kim Kielsenimik, pisoq pillugu apersuinissamik sulissuteqarpoq.