Nunatta karsiata naatsorsuutaanik paatsiveerusimaarnartumik suliarinnittoqareersoq Atassut siulittaasoqarfimmut maalaaruteqartoq

Inatsisartut nunatta karsiata 2025-mut naatsorsuutaanik suliarinninnerat sisamanngornermi ualikkut paatsiveerusimaarnartunngorpoq.

Naalakkersuisuni ilaasortaq Nivi Olsen KNQK-p naatsorsuutai pillugit marloriarluni, tassa Siumumit Naleqqamillu tatiginninnginnermik taasisitsussutigineqaraluartoq, kingornalu Naalakkersuisunit pinngitsoortinneqaraluartoq Atassut oqaaseqaatiminik saqqummiussinissaminik periarfissinneqanngitsoq siulittaasoqarfiup nunatta karsiata naatsorsuutaasa taasissutigineqarnissaat aalajangerpaat.

Atassut kingorna taaseqataaniaranani aalajangerpoq, oqaluuserisassarlu paatsiveerusimaartitsigami ataatsimiititaliamit suliareqqitassanngortariaqaraluartoq oqaatigaat.

Partii tamatuma kingorna naammagittaalliummik siulittaasoqarfimmut nassiussivoq. "Tamanna inuit tamat oqartussaaqataaneranut suussupaginninnertut taaneqarsinnaavoq aammalu Atassutip partiittut ataqqinassusaa innarlerneqarnera" Partiip siulittaasuata tullia Bentiaraq Ottosen Facebookimi allappoq.

“Akuersaaruminaatippara tamanna aamma partiitsinni politikkikkut siulittaasup tulliattut oqaaseqartinneqannginnatta. Inatsisartut siulittaasuata qulakkeertussaavaa tamat oqartussaaqataanera illersorlugu naamassineqassasoq, taamaattumik aqutsineq akuerisinnaanagu inerniliussaqarpunga.”