Aningaasanut inatsisissamut aningaasartuutit nutaat ilanngunneqarput — Neqi millionilikkaanik aningaasaliiffigineqassaaq

Aningaasanut missingersuusiorfiup siullermeerneraniilli 2027-miit 2030-mut atuuttumi, 69,9 million koruuninik ilaneqarput.

Aningaasanut inatsimmut 2027-miit 2030-mut tamakkiisumik atuutsinneqartussamut missingersuutigineqarpoq ingerlatsinermut sanaartornermullu aningaasartuutit katillugit 29,6 million koruuninik maanna amigartooruteqassasut.

Aningaasartuutit nutaat ilaatigut toqoraavimmut Namminersorlutik Oqartussanit pigineqartumut Neqimut, KNI-p suliffeqarfissuanut ilaasumut, atuutsinneqarpoq. Aningaasaqarnermut Naalakkersuisup Aqqaluaq B. Egedep (IA) aningaasaasanut inatsisissap aappassaaneerneqarnerani oqaatigaa 2027-mi 20 millionit koruuninik, aamma 2028-miit ukiumut 8 millionit koruuninik, Neqi aningaasaliiffigineqartassasoq.

Aningaasaliissutit taakku marlunnut agguaanneqarput:

- Siulleq 2027-mi suliffeqarfiup nillataartitsivianik, qerititsivianillu iluarsaassigasuarnissamut 12 mio. kr.-nik immikkut ittumik tapiissuteqarnermut tunngavoq. Iluarsartuussinerup aalaakkaasumik ingerlatsineq suliffeqarfiullu toqqorsiviani inuussutissanik isumannaatsumik toqqortaateqarsinnaaneq qulakkiissavaa. Tullia Neqi A/S- mik ukiumut 8 mio. kr.-nik sullissinnissamik isumaqatigiissuteqarnermik imaqarpoq.

– Isumaqatigiissutikkut savaatillit savanik, savaaqqanik nersussuarnillu tunisisarnissaat qulakkeerneqarpoq. Tamanna kujataani nunalerinermut annertuumik pingaaruteqarpoq. Tamatuma immikkoortumut periusaasinnaasumik nutaamik suli suliaqartoqarnera allanngortinngilaa, Aqqaluaq B. Egede oqarpoq.

Neqip saniatigut Naalakkersuisut Siulittaasuata Naalakkersuisoqarfiani attaveqaqatigiinnermut immikkoortortaqarfik (ukiumut 2,2 mio. kr.), inuusuttunut suliffissaqartitsineq ilinniagaqartitsinerlu pillugit siunnersuinerup nukittorsarneqarnissaa (AQQUT 2027-mi 2,3 mio. kr. aamma 2028-miit ukiumut 3,3 mio. kr.), kommunini nakkutilliineq (ukiumut 1 mio. kr.) kiisalu pinerluttulerinermi inatsisit angerlaanneqarnissaanut (ukiuni arlalinni 350.000 kr.) aningaasaliiffigineqassapput.

Eqqaaneqareersutut naatsorsuutigineqarpoq Naalakkersuisut partiinik isumaqatiginninniarnertik naammassippassuk 2027-mullu aningaasanut inatsit, akuersissutigineqarpat tamanna allanngorteqqinneqarsinnaasoq.