Greenland Airportsimi pisortat nikipput: Jens Lauridsenip aquut tunniuppaa

Jens Lauridsenip Ilulissani mittarfiup ammarneqarneratigut pisortaanertut tunuarnera Greenland Airportsimi pingasunngornermi ualilluartoq malunnartinneqarpoq.

Tamanna pivoq Greenland Airportsimi sulisut, suleqatigisartagaat allallu peqagtigalugit ilasseeqatigiinnermi. Jeppe Jensen KNI-miit nooqqammersoq ilasseqatigiinnermi pisortartaatut aamma tikilluaqquneqarpoq:

-Greenland Airportsip oqaluttuarisaanerani pissanarnerpaamik pisoqaleruttortoq takkupputit. Greenland Airportsip alloriarnissaanut tullernut pitsaanerusumik pissarsinissatsinnut allamik kissaateqanngilagut, siulersuisut siulittaasuat Jens Wittrup Willumsen pisortartaaminut taama oqarpoq.

Taava siulittaasoq Jens Lauridsenimut, 2020-mi suliffeqarfik Kalaallit Airportsimik ateqareerluni Greenland Airportsinngortumi pisortaasumut, saappoq.

- Kalaallit Nunaanni attaveqaasersuinermi poortugaq annerpaaq tunniukkakku suliassat naammassisimalerpat. Taamaammat suilersuisunit, suliffeqarfimmit inuiaqatigiinnillu tamanit qujassutissaqarfigaatsigit, Jens Wittrup Willumsen oqarpoq.

- Aalajaallutit anorersuit qajannaatsumik qaangertarsimavatit siunnerfiillu ukkattarsimallugu. Suliffeqarfik allanngorluinnarsimasoq aamma Kalaallit Nunaat nunanut allanut qaninnerulersimasoq qimalerpat.

Tusagassiorfiit uummammit qujassuteqarfiginissaat aamma nukissaqarfigineqarpoq:

-Eqqarsarpunga Sermitsiap qupperneri ikisimassagaluaqisut, Greenland Airports allaaserisarsimanngikkaluarunikku, siulersuisut siulittaasuat oqarpoq.

Angusaq qaqutigoortoq

Jens Lauridsenip siulittaasup nersualaarineranut akivoq:

- Angusakka tulluusimaarutigaakka, uanga kisima angusarinngilakka kisianni suliffeqrfiup angusarai.

Pisortaanerusimasunngortup nassuerutigaa, suut tamarmik aallaqqaataanertuussaagaluarpata allaanerusumik iliuuserisassaminik allattuisoqarsinnaagaluartoq. Sulialli suli tulluusimaarutigai:

-Ikitsuinnaat ukiut marluk ingerlaneranni mittarfinnik pingasunik ammaanissamut periarfissaqartarput, uagulli taamaaliorpugut, pisortaasimasoq oqarpoq, sulisut suleqatigisartakkatik minnerunngitsumillu ilaquttami aamma qutsavigai.

Jens Lauridsen naggataagut Jeppe Jensenimut suleqatikuminullu inuulluaqqusivoq:

- Iluatitsilluarnissassinnik kissaatingaarpassi, sulilluarisilu. Greeland Airports paarilluarumaarparsi.

Jens Lauridsenili Greenland Airportsimit inuulluaqquinneqanngilaq. Suliffeqarfimmut attuumassuteqaannarallassaaq, aqutsisut nikinnerani suleqataalluni.

Siunissami sulerinissani pillug Jens Lauridsen suli nalunaaruteqanngilaq, oqaatigiinnarluguli feriamut ilaqqutaminullu piffissaqarnerulissalluni.