KL

DK

KNI A/S ukiup qiteqqunerani appasinnerujussuarnik angusaqartoq

KNI A/S arlalitsigut unammillerneqarpoq, tamannalu ukiup qiteqqunnerani angusanut sunniuteqarpoq. Aqutsisut ukiumut angusat siornamut sanilliullugit “ikinnerussaqisut” ilimagaat.

KNI-ip Narsami orsussaasiviani. KNI A/S-ip ikummatissaqarnermik ingerlatsivia orsussamik siornatigumut sanilliullugu akisunerusumik maanna pisiortorpoq.
Tusagassiortoq
Saqqummersinneqarpoq

KNI A/S siorna 143 millionit koruuninik sinneqartooruteqarsimasoq, ukioq manna ukiup qiteqqunnerani angusani saqqummiunneqaqqammersumi 64 millionit koruuninik sinneqartooruteqarpoq. Tamanna 55 procentit sinnerlugit appariarneruvoq.

Isertitat taama appariartigisimanerannut pissutaasut arlaqarput:

Nioqquteqarnermik ingerlatsivik:

  • Nuuk Imeq matuneqarmat siammarterinissamik suleqateqarneq taamaatinneqarpoq, tamannalu isertitanut sunniuteqarpoq. Annertuunik pisisartut kingullersaat KNI-mik suleqateqarunnaarnertik septembarimi nalunaarutigaat.

Ikummatissaqarnermik ingerlatsivik:

  • Ikummatissat imerpalasut akikitsumik pisiaralugit qularnaarneqarnikuusut uninngasuutaasullu nungupput, ikummatissanillu nutaanik pisiortorneq akisunerujussuuvoq. Atuisut pisiortornermi akit qaffariarujussuarnerinik eqqorneqarnissaasa ingalassimatinnissaa qulakkeerniarlugu ukiut siuliini sinneqartoorutaasarsimasut atuisunut iluaqutissanngortinneqarnissaat aalajangiunneqarpoq. Tamanna ikummatissaqarnermik ingerlatsivimmut kisitsisinullu najoqqutassanut sunniuteqarnerlussaaq

  • Ikummatissaqarnermik ingerlatsiviup isertitai umiarsuarnik takornariartaatinik orserusuttartunit pitsaasumik suli sunnerneqarluartarput, siornamulli sanilliullugu appasinnerullutik. Umiarsuit takornariartaatit sikorsuarnik pissuteqartumik 2024-mi angalaniarnerat ajornartorsiorfiusimavoq, tassami nunatsinnut tikittussaagaluit arlallit tikinngiinnarsimapput.

    • Kaaviiaartitat aamma appariarsimasut paasissutissiissutigineqarput. Tamannalu poortuutissat pillugit nalunaarutip nutaap kinguneranik pivoq. Ukioq manna ukiup affaani siullermi kaaviiaartitat 1.446 mio. koruuniupput, ukiup siuliani 1.575 mio. koruuniullutik.

Ukiumut angusat appariangaatsiartut

Immikkoortuni taakkunani marlunni ineriartorneq pissutigalugu ukiumut angusat siornamut sanilliullugit “annikinnerujussuanngornissaat” KNI A/S-ip naatsorsuutigaa.

Assersuutigalugu Nuummi mittarfissap ammarneqarnera Kangerlussuarmi akileraarutitaqanngitsumik pisiniarfiup matuneqarneranik kinguneqarpoq, tamannalu nioqquteqarnermik ingerlatsiviup isertitassaanut sunniuteqassasoq naatsorsuutigineqarpoq. Tamatuma saniatigut Kangerlussuarmi innuttaasut minnerpaamik 20 procentiisa nuunnissaat Namminersorlutik Oqartussat suliffeqarfiutaata naatsorsuutigaa, tamannalu kaaviaartitanut sunniuteqarnerlussasoq ilimagineqarpoq.

Ukiup affaata matuma naatsorsuiffiusup naalernerani 969 mio. koruuninik akiitsoqartoqarpoq ukiumi siuliani 730 mio. koruuniusoq. Tamannalu 239 mio. koruuninik qaffariaataavoq.

- Taamatut nikerarneq pisiortornermi ikummatissap akitsorneranik pingaarnertut pissuteqarpoq aammali nioqquteqarnermik ingerlatsivimmi aamma ikummatissaqarnermi ingerlatsivimmi isertitat ikileriarnerinit, tassani aamma ilanngullugu:

Akisussaassuseqanngitsumik aningaasanik nalunaarsuineq

- Ernianut aningaasaliinerit pinnginnerini 80 mio. koruuninik sinneqartoorfiugaluartoq ingerlatsinermi ingerlatani aningaasat ingerlaarnerat katillugit 501 mio. koruuninik amigartoorfiuvoq. Tamanna tunngaveqarpoq KNI ukiussamut amerlasoorsuarnik eqqanaarsartarmat, ukiullu affaata ingerlanerani ingerlatsinermi aningaasaatit 589 mio. koruuninik nalinginut qaffaateqartitsipput, paasissutissiissutigineqarpoq.

Ukiup naatsorsuiffiusup affaani kingullermi ingerlatsinermi aningaasaatit appariaateqarnissaat naatsorsuutigineqarpoq. Suliffeqarfik 1.250 mio. koruuninik akiitsorsinnaanermik atugassaqartinneqarpoq.

Kaaviiaartitanut iluanaarutinit tamakkiisunit matussutissat 71 mio. koruunit siorna piffissami tassani kaaviiaartitat amerlaqatigigaat paasissutissiissutigineqarpoq. Nunatta Kujataani Tasiusami pisiniarfiup nungullarluinnartup taartissaanik nutaamik pisiniarfiliorneq ilaatigut aningaasaliivigineqarpoq.

halvårsrapport erhverv brændstofpriser inuiaqatigiit omsætning kni a/s nuuk imeq

ATORFIIT Se alle jobs

Powered by Labrador CMS