KNI-mi sulisooreersoq nioqqutissaqarnermut ingerlatsivimmi pisortanngortoq
Nanna Lynge KNI-mi nioqqutissaqarnermut pisortatut septembarip allaqqaataani atorfinippoq.
Nanna Lynge Isaksen KNI-mi nioqqutissaqarnermut ingerlatsivimmi pisortanngorpoq. Taanna Sisimiuni inunngorpoq peroriartorlunilu, nunatsinnilu niuernermik ukiuni aqqaneq-marlunni misilittagaqarluni.
Assi: KNI
KNI-mi nioqqutissaqarnermut ingerlatsivimmi pisortaq Brian Weuge Chemnitz atorfimminit tunuartoq apriilimi nalunaarutigineqarpoq, KNI-milu pisortaaneq Jeppe Jensen atorfiup inuttalernissaata tungaanut tassani atuuffeqarallarluni.
Suliffeqarfik Namminersorlutik Oqartussanit pigineqartoq sulisumi akornanni nioqqutissaqarnermut ingerlatsivimmi maanna pisortartaarpoq.
KNI-mi 2021-miilli pisiortornermut pisortaasoq Nanna Lynge Isaksen nioqqutissaqarnermut ingerlatsivimmi pisortatut atorfinippoq.
Pisortanngortoq Sisimiuni inunngorpoq peroriartorlunilu. Ukiut aqqaneq marluk sinnerlugit
nunatsinni niuernermik misilittagaqartoq, KNI allappoq. Copenhagen Business Academymi
nittarsaassinermi aningaasaqarnermi ilinniarsimasuuvoq saniatigullu aamma KNI-mi
aqutsisutut ilinniagaqarluni.
Unammilligassaqaqisoq
KNI-p atorfinititsineq tusagassiutinut nalunaarutigaa, nioqqutissaqarnermut ingerlatsivik piffissami matumani
unammilligassaqartoq nassuerutigalugu.
Ingerlatsinerup pitsanngorsarnissaa,
pilersuinermi qulakkeerinninnissaq, pisiortornermik
immikkoortortap, assartuinermi ataqatigiissaarineq pisiniarfiillu
suleqatigiinnerat aamma pitsanngorsagassaasoq, KNI allappoq.
Nanna Lynge Isaksenip atorfininneratigut unammilligassat aaqqiiviginissaat siunertaavoq, kiisalu suliffeqarfiup
unammillernikkut pitsaanerulernissaata ataqatigiinnerulernissaatalu
qulakkeernissaa, suliffeqarfik allappoq.
KNI-mi pisortaanerup Jeppe Jensenip suleqatigiinnissaq qilanaaraa:
- Nanna aqutsisuuvoq anguniakkaminut aalajangersimasoq,
ineriartortitsinermut aallussilluartoq qanilaartorlu. Akisussaaffimmik
tigusilluni anguniakkat suliamini ersersittarpai, periusissiamilu anguniakkat
iliuuseqarnermigut piviusunngortittarlugit. Nannap suleqatigeqqinnissaa
qilanaaraarput, atorfittaavanullu tikilluaqqullugu, oqarpoq.
