KNQK-mi siulittaasup tullia ilaasortaajunnaarsinneqartoq: Nassuiaanissannut periarfissinneqanngilanga
Paninguak K. Rafaelsenip KNQK-mi siulittaasoq Mikkel Jeremiassenip siulittaasunngorniunnermi marsimi ataatsimeersuartoqarmat unammillerpaa. Maanna siulersuisunut ilaasortaajunnaarsinneqarpoq.
Avannaata Qimussersuata kingorna suli aaqqiagiinngittoqarpoq. Maanna siulittaasup tullia siulersuisunit ilaasortaajunnaarsinneqarsimasoq KNQK-p siulittaasuata peqatigiiffiup Facebookimi quppernerani uppernarsarpaa.
Assi: Qimusseq Sisimiut
Paninguak K. Rafaelsen KNQK-mi marsimi 2024-mi ataatsimeersuartoqarmat siulittaasutut qinigassanngortippoq. 13-init qinerneqarpoq. Mikkel Jeremiassenili 15-init qinerneqarluni siulittaasutut qinigaaqqippoq, Susanne Berthelsen pingasunit qinerneqartoq.
Ataatsimeersuarnermiilli qaammat ataaseq qaangiuttoq pisoqarpoq.
Paninguak K. Rafaelsen apriilip 27-ani siulersuisut Facebookimi matoqqasumik allaqatigiittarfianniit peerneqarsimalluni Sermitsiamut oqaluttuarpoq. Nassuiaaffigineqaqqulluni siulittaasoq arlaleriarluni attaveqarfiginiaraluarlugu soqutigineqanngilaq. Aatsaat ullualuit qaangiummata pisortatigoortumik tunngavilersuut mailikkut nassiussarsiaraa.
Naak immikkoortortaqarfimmik tunuliaqutaqanngikkaluarluni ataatsimeersuarnermi peqataasimasoq KNQK-p siulersuisuisa nalilersimagaat E-mailimi nassuiarneqarpoq. Taamaammat peqataanera – siulersuisunilu ilaasortaanera – atuutinngilaq.
KNQK allakkatigut nassuiaateqartoq
Siulersuisut KNQK-p Facebookimi quppernerani ima allapput:
- Siulittaasumut tullinngoraluartumik tunuartitsisariaqarsimaneq ilumoorpoq. Inummut tunngammat killeqarpoq tamanut ammasumik eqqartornissaa. Tunuliaqutaqartussaanermilli naammassinninngimmat sinniisussaq siulleq ivertinneqarpoq.
Paninguak Rafaelsenip pisimasoq pillugu nammineq oqaaseqarnissaminut periarfissinneqarsimannginnini attatiinnarpaa:
- Peqatigiiffiup Facebookianiit matoqqasumillu allaqatigiittarfianiit peerneqarpunga. Oqaloqatigineqarnissannut periarfissinneqanngilanga. Siulersuisut aalajangiinerat pillugu akissuteqarnissamut periarfissinneqanngilanga.
Klubbimini, Qimusseq Sisimiuni, ilaasortaanermut akiliutini piffissaq eqqorlugu akilersimannginnamiuk peersitaasimasinnaalluni aamma eqqaavaa. Kingornali akiliivoq.
Sermitsiamiit KNQK-p siulittaasua Mikkel Jeremiassen oqaaseqartinniarlugu sulissutigineqarpoq.
