KNQK: Vancep nulia aggersanngilarput
Kalaallit Nunaanni Qimussertartut Peqatigiiffiat, KNQK, sapaammi pisortatigoortumik oqariartuuteqarput, tassanilu arfininngorpat qimussimik sukkanniunnissamut USA-mit aallartitat isiginnaariarnissaannut qaaqqusisimannginnertik tikkuarpaat. Peqatigiiffilli Amerikamiut sinniisoqarfiat aqqutigalugu aningaasaasanik tapiissutinik tigusaqarsimavoq.
KNQK-p Usha Vance Amerikamilluunniit aallartitaq alla arfininngorpat Avannaata Qimussersuanut isiginnaariaqqusimanngikkaa, KNQK ilisimatitsivoq.
Assi: KNQK
- KNQK USA-p
vicepræsidentiata tulliata nulia Kalaallit Nunaannut Sisimiunullu angalaneranut
attuumassuteqanngilaq. Qaaqqunikuunngilarput.
Taama KNQK-p sapaammi ullaap tungaani pisortatigoortumik nalunaarutaa
nipeqarpoq.
- Tikeraarnera kikkut tamarmik qimussimik sukkanniunnermik
isiginnaariarnissaannik tikilluaqqusaanerannik atuineratut paasivarput.
Kikkummi tamarmik pissartanngorniunnermik isiginnaarnissamut
tikilluaqqusaapput, pisumullu qaaqquneqartariaqarnatik, KNQK-p siulittaasua
Mikkel Jeremiassen oqarpoq.
Sinniisoqarfiup angallanneq akileraa
KNQK-p Facebookikkut saqqummiussamini peqatigiiffiup aningaasatigut
tapiiffigineqarnissamik neqeroorut angersimagaa nassuiaavoq, sinniisoqarfimmi
siusinnerusukkut kulturikkut aaqqissuussanut suliniutinullu allanut
aningaasanik tapiissuteqartarmat.
- Qimmit, qimussersut qamutillu piffimminnit sukkaniuffissamut utimullu
angallanneqarnerannut akiligassaq toqqaannartumik Air Greenlandimut
akilissallugu neqeroornikuupput. Neqeroorut tamanna tunuliaquttatta
siulersuisullu oqaasertalernagu akueraat, siusinnerusukummi kulturikkut
aaqqissuussanut tapiissuteqartarsimammata.
- Allatut oqaatigalugu sinniisoqarfik KNQK-p kontuanut toqqaannartumik
nuussisimanngilaq, en øriluunniit naamik. Nunanit allanit tapiissutinik
tigusikuttoorsinnaavugut, soorlu Danmarkimit, Australiamit allaniillu, Mikkel
Jeremiassen allappoq.
