Nutaarsiassaqartitsivimmi pisortaasimasoq marsimi KNR-imi atorfinitsinneqarpoq qaammatillu sisamat qaangiuttut soraarluni. ASG-p pisortatut atorfillit isumaqatigiissutaa naapertorlugu qaammammut 59.906 koruuninik akissarsiaqartinneqartoq.
KNR-ip ilisimatitsissutigaa, ilanngullugulu oqaatigalugu soraarnermi aningaasartuutit 286.524,16 koruuniusut, soraarnerussutisiaqarnini angerlamullu bilitsi ilanngullugit.
PAASISSUTISSAT
AGGUSTIMI SORAARNIUTEQARTUT
1 tusagassiortutut taarti
1 tusagassiortoq
1 aaqqissuisoq (B&U)
1 nittartakkami aaqqissuisoq
AGGUSTIMI SEPTEMBARIMILU ATORFINITTUT
1 HR-Partneri
2 nutaarsiassaqartitsivimmi tusagassiortut
1 aningaasaqarnermut pisortaq
1 HR-imi siunnersorti
1 radiomi pisortaq
1 TV-mi pisortaq
1 nittartakkami aaqqissuisoq
Nutaarsiassaqartitsivimmi pisortaasimasoq marsimi KNR-imi atorfinitsinneqarpoq qaammatillu sisamat qaangiuttut soraarluni. ASG-p pisortatut atorfillit isumaqatigiissutaa naapertorlugu qaammammut 59.906 koruuninik akissarsiaqartinneqartoq.
KNR-ip ilisimatitsissutigaa, ilanngullugulu oqaatigalugu soraarnermi aningaasartuutit 286.524,16 koruuniusut, soraarnerussutisiaqarnini angerlamullu bilitsi ilanngullugit.
Atorfik qaammatit marluk qaangiummata inuttassarsiuunneqartoq
KNR-imi nutaarsiassaqartitsivimmi pisortaasimasoq juulimi 2024-imi pisortut atorfeqarunnaarpoq. Atorfiup inuttassarsiuunneqarnera qaammatit marluk qaangiummata suliffeqarfiup nittartagaani aatsaat inuttarsarsiuunneqalerpoq.
Tamanna Sermitsiami apeqqusernartinneqalerpoq, taamaattumillu KNR paasiniaaffigalugu attavigineqarpoq, tassani paasiniarneqarluni KNR-imi nutaarsiassaqarfimmi pisortatut atorfiup suli inuttarsiuunneqannginneranut suna peqqutaanersoq.
KNR-ip akissutai naapertorlugit sulinngiffeqarnerup nalaani atorfinitsitsinissamut ataatsimiititaliaq pilersinneqarniarnera ajornakusoorsimasoq.
- Sulinngiffeqarnerit maanna naareersimalerput, atorfitsitsinissamut ataatsimiititaliaq pilersinneqarsimalerpoq, taamaattumik atorfik maanna inuttassarsiuunneqarpoq, KNR-ip septembarip aallaqqaataata missaani nassuiaavoq.
Pisortaq ataatsimoortitsisinnaasoq ujartorneqarpoq
KNR-imi nutaarsiassaqarfimmi tusagassiortut nutaarsiassaqartitsivimmi pisortaasimasup atorfeqarnerata nalaani suliffimmi sulinermi atukkat pillugit isornartorsiuisareerput.
KNR-imilu sulisut juunip naanerani sulinermik unitsitsinissamik nalunaaruteqarput, tassani piumasarineqarluni pisortaq suliunnaarsinneqassasoq.
Isornartorsiut KNR-ip tusaatissatut
KNR-ip isornartorsiuineq tusaatissatut tiguaa maannalu nutaarsiassaqartitsivimmi pisortassamik nutaamik, suleqataarusussuseqartussamik peqataarusussuseqartumillu ujaasilluni:
- KNR-ip nutaarsiassaqartitsiviani pisortaasimasup nalaani sulinermi avatangiisit ajortut pillugit tusagassiortut tamanut oqaaseqarsimasut isertuunneqarsinnaanngilaq. KNR-ip tamanna paasivaa maannalu nutaarsiassaqartitsivimmi suleqataasinnaasumik peqataatitsisinnaasumillu pisortassarsiorluni, KNR Sermitsiamut allappoq.
KNR-imi aamma ilisimatitsissutigineqarpoq sulisut naammagisimaarneqarnerat ukiut tamaasa misissuiffigineqartartoq, tullianilu misissuineq oktobarip qiteqqunnerani pissasoq.
- Suliffimmi avatangiisit pitsaanerulersinniarlugit suliuartuaannarpugut.
