KNR-imi pisortaagallartoq toqqarneqarpoq
Annga Lyngep angerlartinneqarnerata kingorna Bjørk Lange Olsen KNR-imi pisortaagallartunngorpoq.
Leiff Josefsen
KNR-imi pisortaq Annga Lynge atorfimminit sapaatip-akunnerani kingullermi tallimanngornermi suliunnaarsitaavoq. Ulloq taanna aningaasaqarnermut tuniniaanermullu pisortaq Bjørk Lange Olsen tusagassiorfimmi pisortaagallartunngorpoq.
Tamanna LinkedInimi nalunaarutigaa.
- Tallimanngornermi KNR-imi pisortaagallartutut atuuffeqalerpunga, Bjørk Lange Olsen allappoq, taassumalu Inatsisartunut qinersisoqarnissaa pissutigalugu ulapaarfiusussami atorfimmut pilluni tikkuarpaa.
- Qinersinerup qineqqusaarnerullu peqqissaartumik, soqutiginartumik illuinnasiunngitsumillu sammineqarnissaata qulakkeernissaa akisussaaffigaarput pingaarutilik, tamannalu nunami tamat oqartussaaqataanerannut qitiuvoq, Bjørk Lange Olsen allappoq, suliassanilu qilanaarai:
- Piffissaq tulliuttoq qilanaaraara, tulluusimaarutigalugulu qujamasuppunga – KNR-imi sulisut pikkorissut amerlasuut peqatigalugit – suliassap tamatuma suliarineqarnerani siuttuusinnaagama. Akisussaaffik maniguullunga tiguara, aammali piumassuseqarnerput piginnaasagullu upperilluinnarpakka.
KNR-imi sulisut taarseraannerat sulinermilu atugassarititaasut naammagineqannginnerat piffissami sivitsortumi atuupput, tamannalu ilaatigut pissutigalugu pisortaq Annga Lynge tallimanngormat suliunnaarsitaavoq.
Bjørk Lange Olsen Inatsisartunut qinersinermi kingullermi Demokraatit sinnerlugit qinigassanngortippoq piffissamilu aalajangersimasumi Anna Wangenheimimut sinniisutut Inatsisartunut ilaasortaalluni.
Grønlandsbankenimi atorfeqareerluni KNR-imi 2024-mi aggustimi atorfinitsinneqarpoq.
